Книга 3. Письма. Творения гимнографические. Эпиграммы. Слова

Христовы апостоли, земным светила, сокровища миробогатная, всемудраго разума Бога нашего; вас поющия искушений избавите святыми вашими молитвами, и время нам постное проводити юношески подающи в мире жизнь нашу; да благоугодно предваривше страсть Христову, со дерзновением приносим пения Богу нашему.

В четверток второй седмицы

По 3-м стихословии седален, глас 6

Господи благоуветлив буди нам, в сие божественное время, слезы точити Тебе от сердца сподоби всегда, ко отмовению скверн душевных, и к прозябению святых заповедей: яко да сице постящеся, достойно благоугодим Тебе, и всечестную Твою страсть всем видети благоизволи, молитвами Твоих мироспасительных апостол, слава Тебе.

Богородичен: Милосердия источник Пречистая, Честная Дево Мати Богородице, богатно на ны Чистая излей, и даруй нам согрешений оставление: Ты бо еси предстательство наше и Божественный покров.

Трипеснец. Глас 6

Песнь 4

Ирмос: Услыша пророк пришествие Твое Господи, и убояся, яко хощеши от Девы родитися, и человеком явитися, и глаголаше: услышах слух Твой и убояхся, слава силе Твоей Господи.

Двоенадесятице апостолов, Петре, Павле, Иакове и Иоанне, Андрее, Варфоломее, Филиппе, Фомо и Матфее и Иакове, с Симоном и Иудою (ср. Мф. 10:2–4), молитвы сотворите Христу, спастися нам.

Мрежи учений ввергше в море жития странно, к трием сто и пятьдесят (Ин. 21:11), тайно языки яко рыбы прежде уловисте, сия ко Господу приведше святии апостоли.

Троичен: Сына от Отца и Духа славлю, яко от солнца свет, и лучу. Оваго убо рождественне, зане и рождение: Оваго же происходне, зане и происхождение, собезначальную Божественную Троицу, покланяемую от всякия твари.

Богородичен: Дево Младенца родившая, и чистоту соблюдшая, Чистая Ты явилася еси, Бога рождши и Человека, единаго Того во обою зраку (ср. Флп. 2:6–7): чудо Твое Дево Мати, ужасает всякий слух и помысл.

Вы есте свет миру, якоже вам рече Христос (Мф. 5:14), сиянием слова; но молитеся апостоли, великодушно препроводити нам поприще воздержания, и поклонитися Того Воскресению.

Песнь 8

Ирмос: Егоже воинства небесная славят, и трепещут Херувими и Серафими, всяко дыхание и тварь, пойте, благословите, и превозносите во вся веки.

Из Иакова яко дванадесятоколенное (ср. 3 Цар. 18:31), апостол из Тебе другая двоенадесятица явися Христе в мире, еюже отродися всякий верный в слове, Тебе воспеваяй во веки.

Мысленнаго фараона колесницы потопивше тайне, яко в Чермнем (ср. Исх. 14:28), люди Господни к земли боговедения изведосте поющия, апостоли, во веки.

Троичен: Единаго Бога по Существу чту, три Ипостаси пою определительне, иныя, но не инаковыя, понеже Божество едино в триех Лицех: ибо Отец, и Сын, и Божественный Дух.

Богородичен: Из светлейшаго чрева Твоего прошед, яко Жених из чертога (ср. Пс. 18:6) возсия Христос, свет велий сущим во тьме, ибо правды Солнце (Мал. 4:2) облистав, просвети Чистая мир.

Христовы таинницы и сопрестольницы, прилежно о нас грешных всегда молящиися, и ныне молите пощение все чисте преити.

Песнь 9

Ирмос: Безсеменнаго зачатия Рождество несказанное, Матере безмужныя нетленен Плод: Божие бо Рождение обновляет естества, темже Тя вси роди, яко Богоневестную Матерь, православно величаем.

В мире яко безплотнии, и во плоти яко Ангели, слово едино в сердце носяще, привлекосте языки Христову едину веру, премудрыя и ветии яко юроди обличивше разумом, всеблаженнии апостоли.

Петре, веры каменю (ср. Мф. 16:18), и основание; Павле проповедниче, и учителю языков (2 Тим. 1:11); сына Зеведеова, с прочею осмерицею Христу молитеся прилежно, благомощно преити нам пощения поприще.

Троичен: Единаго единородителю, единороднаго Сына Отче, и едине единаго свете, света сияние; и единый едине единаго Бога, Святый Душе, Господа Господь воистинну сый. О Троице, Единице Святая, спаси мя богословяща Тя.

Богородичен: Чудо рождества Твоего удивляет мя Всенепорочная, како зачинаеши безсеменно необыменнаго? Рцы, како девствуеши, рождши яко Мати? Еже паче естества верою прием, Рожденному поклонися: елика хощет бо, и может. Слава Тебе Боже наш, слава Тебе.

Силою Духа к царем и князем изшедше, никакоже убоявшеся, ни огня, ни меча, победисте всякую прелесть, и спасаете человеки, воеводы Господни суще, всеблаженнии апостоли.

Стихира на Господи воззвах, глас 5

Господи, животворящий Твой Крест воспеваем: сей бо жизнь в мире процвете, смерть умертвив; егоже Тебе и ныне в молитву приводим: во днех святых укрепи ны постящияся, и даруй на страсти крепость, и мира победное, за множество милости Человеколюбче.

В пяток второй седмицы

По 3-м стихословии седален, глас 5

Сияет Господи, благодать Креста Твоего, всю вселенную облистающая, крепость бесовскую потребляет, и пощения течение ныне благоукрашает: в немже укрепляя, помилуй нас.