Книга 3. Письма. Творения гимнографические. Эпиграммы. Слова

Богородичен: Честнейшая преславных Херувимов еси Всечистая Дево: они бо Божественныя не терпяще силы, крилами покрывше лица, службу совершают: Ты же воплощенна Слова, самозрительно видящи носиши: Егоже непрестанно моли о душах наших.

Трипеснец. Глас 7

Песнь 1

Ирмос: Поим Господеви, погрузившему всю силу фараонову в мори, победную песнь, яко прославися.

Живоносному Древу поклонившеся, отсюду идем путем пощения к страсти Христовой радующеся.

Христу последующе, отвержемся мира, и возмем крест на рамо, соображающеся Его Божественным страстем.

Троичен: В трех Лицех, пресущное едино Божество, воспоим вси Отца, и Сына, и Святаго Духа.

Богородичен: Егоже родила еси недомысленно, тления не разумевши Чистая, Иисуса Спаса умилостиви ныне о рабех Твоих.

Егда в славе приидеши со Ангелы, судити всяческим, добрый ответ дати Тебе Христе, нас сподоби.

Песнь 8

Ирмос: Страшнаго Херувимом, и чуднаго Серафимом, и миру Творца, священницы, и раби, и дуси праведных, пойте, благословите, и превозносите Его во веки.

Воздержания с Богом крепость имуще вернии, прочее юношески тецем святое поприще, и венцы приимем.

Безплодие зря многоболезненныя моея души, еще потерпи Христе, и не посецы мене, якоже смоковницу оную проклятую (ср. Лк. 13:6–9; Мф. 21:19).

Троичен: Единоначальная Троице, и Триипостасная Единице, Отче, Сыне и Душе, от всяких избави искушений и бед Тя воспевающия.

Богородичен: Радуйся, горо Божия: радуйся, присносветлая свеще: радуйся, новое небо: радуйся, уме блистаяйся: радуйся, храме Господень: радуйся Всепетая.

Страшное Твое испытание помышляя Христе, ужасаюся, трепещу, и вопию: неизмерную имеяй велию милость, спаси мя окаяннаго.

Песнь 9

Ирмос: Паче естества Матерь, и по естеству Деву, едину в женах благословенную, песньми вернии Богородицу величаем.

Тихое плавание пощения, духовным дыханием преплывше, ко пристанищу страстей Христовых, достигнути помолимся.

Хананеи поревновав, помилуй мя вопию Ти, Сыне Давидов Боже, и исцели мою изнемогшую душу, якоже оныя дщерь (см. Мф. 15:22–28).

Троичен: Божества Естество, единствующее Единицу, и начертаньми треми тройствующее, Отца, и Сына, и Духа воспоим.

Богородичен: Во чреве заченшая непостижимаго Слова, и Сего без семене плоти рождшая, моли прилежно спастися душам нашим.

Оправдавый мытаря, очисти мя вопиюща: и мне грешному милостив буди, всех Судие, прощая моя согрешения.

Стихира на Господи воззвах, глас 8

Богосветлая благодать воздержания, возсиявши нам днесь солнца светлее, души наша просвещает, якоже облаки страсти греховныя отгоняющи. Сего ради вси притецем, благодушно сию лобызающе: радующеся совершаем божественное поприще того, егоже в веселиих учреждающеся возопиим Христу: освяти Блаже, сие совершающия верно.

Во вторник пятой седмицы

По 3-м стихословии седален, глас 2

Препрославленная благодать всечестнаго поста, имже Илиа пророк обретает колесницу огненную (4 Цар. 2:14), и Моисей скрижали приемлет (Исх. 32:19), Даниил же чудный бысть, Елиссей мертваго воздвиже (4 Цар. 8:5), отроцы же огнь угасиша (Дан. 3:50), и всяк кто к Богу присвоися. Тем питающеся возопиим: благословен Христос Бог наш, тако благоволивый, слава Тебе.

Богородичен: Необоримую молитву Твою стяжав в лютых, избавляюся от оскорбляющих мя паче надежды чудно, о Мати Божия! Ускорявши бо всегда просящим Тя верно, и разрешаеши содержимая искушения. Тем благодарственно вопию Ти: приими Владычице краткая благодарственная, вместо их еси мне во всех Дево помоще.

Трипеснец. Глас 2

Песнь 2

Ирмос: Внемлите людие знамением дел Божественныя Моея силы, и о сем уразумейте, яко един Аз Бог есмь всех.

Пощение чистое, молитвы, слезы, поучение Божественных и всякую иную добродетель совокупивше, Владыце Христу ныне принесем.

Ева пленена бысть плодом: виждь ты душе моя, не прельщайся, аще приложит тебе змий когда совещаяй, ясти тебе сластныя плоды (ср. Быт. 3:2–6).

Троичен: Три единаго зрака Лица славлю, Отца, Сына и Духа, едину державу Божества, Царство всех, и Божество.

Богородичен: Рождество Твое Чистая страшно бысть: Бог бо есть вочеловечивыйся безначально от Отца рождейся, и из Тебе в последняя без мужа родивыйся.

Кровоточивую, осязанием омет Твоих исцелил еси Христе мой (Мф. 9:20–22), и мене верою милости Твоея прикасающагося, здрава от страстей учини.

Песнь 8

Ирмос: Древле оросившаго еврейския отроки в пламени, и опалившаго Господа халдеи преславно в нем (Дан. 3:48–50), воспоим глаголюще: благословите и превозносите Его во веки.

Огнь не угасает, и червь, рече, не скончится (Мк. 9:44), убойся прещения, о душе моя, угождающи Христу! Да обрящеши наслаждение, идеже всем есть веселящимся жилище (ср. Пс. 86:7).

Опалением разжигаемую душу мою похотений, возстави Господи, молюся, осязанием Твоим, якоже Петрову тещу (Мф. 8:14–15), да обрящется работати Тебе благоугодно, исповедающися во вся веки.