Книга об Антихристе и о прочих действах иже при нем быти хотящих

Речет ли кто, яко Рим и римское царство давно уже разрушися и конец прият, даже от лет Карула Великаго, якоже свидетельствует святое писание в Книге о правой вере во главе 30-й, тако глаголющи: «На конец бо римскаго царства подобает всему совершитися. Что же? Несть ли убо совершилося о римских царех, яко престати сим царствовати: но ниже убо слышится имя римских царей за многая лета в последнее ныне время, якобы рещи от Великаго Карула». И в Книге Кирилове, в знамении 9-м, в толковании глаголет: «Яко от того времене антихристово царство в Риме зачнется, якоже глаголет: егда исполнятся лета римскаго царства, еже есть когда уже Римом цари не имут владети, якоже и ныне видим, иже не владеют». И отсюду явствуется, яко давно уже в Риме царская власть разрушися и антихристово царство начася.

Отвещаем: сие речение, яко от того времени антихристово царство в Риме начася, не свойственно-образное царствование от тех тех времен разумети подобает, но царствование чрез предотеч его бывающее, самого же его царствование в будущее время хотяще быти: понеже яве тако сказуется в том же толковании 9-го знамения рядом оных словес, рече бо: «Яко до его (антихристова) пришествия в Риме предотечи его римское властодержство и власть царскую приимут, имже имут властодержства множитися, и ему самому место уготовят: и то явно в Риме от того времени настала власть антихристовых предотеч, егда власть царей римских в Риме престала». Подобно и в Книге о вере, такожде рядом вышеписанных глагол сице пишет: «Всю же власть от тех времен (сиречь от Карула Великаго), царскую и святительскую папа на себе привлече, вкупе и царь и святитель наречеся, не явный ли сей антихристов предотеча» (гл. 30, л. 272).

Видиши ли, яко от оных времен не самый той антихрист в Риме воцарился есть, но его предотечи токмо держат власть царскую, и ему самому место уготовляют. И сего ради во опасное ведение возмем сполна оная словеса. Святый Кирил Иерусалимский в знамении 9 глаголет: «Приидет же преждереченный антихрист сицевым подобием. Егда исполнятся лета римския власти, то уже близ есть кончина миру: тогда востанут десять царей римских в разных градех, во едино время властьствующих. Таже паки по тех единыйнадесять антихрист, мечтательною злою хитростию приимет власть римскую. Тогда же трех царей прежде его бывших победит, других седмь имея под собою, и прочая. Толкование. Двоя подобия о наставании антихриста на царстве римском Кирил святый, от пророчества собрав, нам исповедает. Первое, от того времене антихристово царство в Риме зачнется, якоже глаголет, егда исполнятся лета римскаго царства, и не глаголет егда возмущено будет, но егда исполнятся лета, еже есть, когда уже Римом цари не имут владети, якоже и ныне видим, иже не владеют. Не разумею же, аще римское царство антихрист первое имать возмутити, а потом, своею силою взяв, сести на нем. Или не могл бы тако скоро где инде таковыю власть прияти, понеже сам последний едины полчетверта лета имать пребыти, но до его пришествия в Риме предотечи его римское властодержство и власть царскую приимут, имже имут властодержства множитися, и ему самому место уготовят. Се суть антихристовы предотечи и его властели, якоже Златоустый пишет, глаголя, егда изгубится римская власть, тогда антихристово начнется властельство: и то явно, в Риме от того времене настала власть антихристовых предотеч, егда власть царей римских в Риме престала, тогда человек духовный папа римский Божию и святительскую власть нача держати». И паки выше в знамении 2-м в толковании пишется: «Ибо дух антихристов, един от духовных старейший, Лев Третий папа римский, бывый по Рожестве Христове 884 лета, той содела сие: иже первое вси западныя властодержства от области греческия и от цареградскаго престола отведе и другаго царя в Риме у себе учини Карула Великаго».

В римском же летописце Барониеве сказуется, подобно и в Книге о правой вере, во главе 20-й, яко сей папа римский Леон, или Лев III, бе в лето 797-е по Христове воплощении, раздор же царства римскаго от греческаго, сиречь учинение на римское царство царя Карула Великаго, бысть в лето 800-е, о сем тамо зри лето Господне 797-е.