Минея праздничная

На Бог Господь: тропарь Предтечи, глас 4: Пе́рвее неражда́ющая непло́ды, возвесели́ся, / се бо зачала́ еси́ Со́лнца свети́льника я́ве, / просвеща́ти иму́ща всю вселе́нную, слепото́ю неду́гующую. / Лику́й, Заха́рие, вопия́ со дерзнове́нием: / проро́к Вы́шняго есть хотя́й роди́тися.

Слава, и ныне,Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.

По 1-м стихословии седален, глас 5. Подобен: Собезначальное Слово:

Елисаве́т непло́дствия свободи́ся, / Де́ва же па́ки Де́ва пребы́сть, / егда́ гла́сом Гаврии́ловым во чре́ве зача́т. / Но во утро́бе предыгра́ет, / и́же во чре́ве де́вственнем Бо́га предуве́дав и Влады́ку, Предте́ча Иоа́нн, / во спасе́ние на́ше воплоща́ема. Дважды.

Слава, и ныне: Ра́дуйся, горо́ свята́я и Богохо́дная; / ра́дуйся, одушевле́нная купино́ и неопа́льная; / ра́дуйся, еди́не к Бо́гу мíра мо́сте, / преводя́щий сме́ртныя к ве́чней жи́зни; / ра́дуйся, нетле́нная Отрокови́це, / неискусому́жно ро́ждшая спасе́ние душ на́ших.

По 2-м стихословии седален, глас 4. Подобен: Скоро предвари:

Го́рлица пустынолю́бная, / свяще́нный Крести́тель, / пропове́давый покая́ние / и яви́вый Христа́, бы́вша Челове́ка, / всех греша́щих роди́ся предста́тель, / всем обурева́емым помоществу́я неотсту́пне. / Того́ мольба́ми, Христе́, спаси́ мiр Твой. Дважды.

Слава, и ныне,Богородичен: Еди́на ро́ждшая Творца́ всех, / еди́на украси́вшая челове́чество рождество́м Твои́м, Пречи́стая, / изба́ви мя сете́й льсти́ваго велиа́ра, / поста́ви мя на ка́мени Христо́вых хоте́ний, / Того́ моля́щи приле́жне, Его́же воплоти́ла еси́.

КАНОН

Оба канона Октоиха без мученичнов и святаго на 6. Иоанна Дамаскина. Глас 6.

Песнь 1

Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Непло́дствующия души́ моея́ помышле́ния непло́дная исто́ргни, / непло́дныя прозябе́ние благохвали́ти начина́ющу, / твое́ во утро́бе ма́терни свято́е зача́тие.

Свяще́нный Заха́рия, в храм вшед, / ви́де Боже́ственнаго А́нгела, ему́ я́ве возвеща́юща: / сы́на в ста́рости, свяще́нниче, прии́меши Предте́чу.

Слава: Свети́льник Со́лнца сла́вы светоза́рен / во чре́ве зачина́ется возсия́ти ма́терни, / и́мже тьма разреша́ется страсте́й и непло́дствия у́зы, / вели́кий Предте́ча.

И ныне,Богородичен: Во чре́ве Твое́м Влады́ку, / в Ма́терни носи́ма, Богоро́дице Пречи́стая, чре́ве, ви́дев, / взыгра́ся я́ве Иоа́нн, / я́ко су́щий Того́ Предте́ча.

Катавасия: Отве́рзу уста́ моя́, / и напо́лнятся Ду́ха, / и сло́во отры́гну Цари́це Ма́тери, / и явлю́ся, све́тло торжеству́я, / и воспою́, ра́дуяся, Тоя́ чудеса́.

Песнь 3

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Непло́ды днесь плод свяще́нный зачина́ет, / и́же напосле́док все непло́дие душ секи́рою мы́сленною отсещи́ хотя́щ, / благода́тию.

Огло́хнув внутрь хра́ма, Заха́рия вели́кий / глас Сло́ва возвеще́нием стра́шным прие́млет / и све́тло велича́ет Го́спода благоутро́бнаго.

Слава: Показа́вый стезю́ тве́рду ве́рным покая́ния, / повеле́нием А́нгела во чре́ве ма́терни прозябе́, / Боже́ственным Сове́том па́че наде́жди, сла́вный Предте́ча.

И ныне,Богородичен: Во чре́ве носи́маго Христа́ Де́вы я́ко позна́, и́же из непло́дове, / взыгра́ся, провозвеща́я ра́дость, прише́дшую на зе́млю / се́тования вся изба́вите.

Катавасия: Твоя́ песносло́вцы, Богоро́дице, / живы́й и незави́стный Исто́чниче, / лик себе́ совоку́пльшия, духо́вно утверди́, / в Боже́ственней Твое́й сла́ве / венце́в сла́вы сподо́би.

Седален, глас 4. Подобен: Удивися Иосиф:

Кадя́щу в хра́ме Заха́рии свяще́нному, / Гаврии́л с Небесе́ предста́, глаго́ля к нему́: / я́ко в ста́рости твое́й возыме́еши плод благосла́вен, / и непло́дство пе́рвое Елисаве́ти ны́не разреши́тся а́бие, и непло́дства рожде́ние; / и, заче́нши, роди́т пропове́дника Иису́сова же и Предте́чу. / Тех мольба́ми, Спа́се мíра, спаси́ ду́ши на́ша. Дважды.

Слава, и ныне,Богородичен: Чи́стая, Всенепоро́чная и Неискусобра́чная, / еди́на Безле́тнаго Сы́на и Сло́во Бо́жие в ле́те ро́ждшая, / Того́ со святы́ми и честны́ми апо́столы, / му́ченики и проро́ки, преподо́бными / моли́ дарова́ти нам очище́ние и ве́лию ми́лость.