Минея праздничная

Слава: Игра́ния я́ко глаго́лы употреби́в, Христе́, вели́кий Предте́ча / поклони́ся Тебе́ в чре́ве де́вственнем, сам носи́мь утро́бою Елисаве́тиною, Иису́се, / отце́в на́ших Бо́же, благослове́н еси́.

И ныне,Богородичен: Луна́ Елисаве́т, внутрь нося́щи звезду́, боже́ственнаго Предте́чу, / поклони́ся све́тлому о́блаку, Мари́и, Со́лнце нося́щей, Христа́, / плотоноси́ма от Нея́ на спасе́ние на́ше.

Катавасия: Не послужи́ша тва́ри Богому́дрии, / па́че Созда́вшаго, / но о́гненное преще́ние му́жески попра́вше, / ра́довахуся, пою́ще: / препе́тый отце́в Госпо́дь и Бог благослове́н еси́.

Песнь 8

Ирмос: Из пла́мене преподо́бным ро́су источи́л еси́ / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Женихо́в друг предуготовля́ется, / глас же Сло́ва нача́ло прие́млет, / и в непло́дней ны́не утро́бе пита́ется / Всецаря́ вели́кий во́ин.

Непло́дным сердца́м де́латель процвете́, / страсте́й секи́ра уже́ куе́тся, / теле́ц честны́й воздержа́ния пита́ется, Предте́ча вели́кий: / лю́дие, весели́теся.

Благослови́м Отца́ и Сы́на и Свята́го Ду́ха, Го́спода.

У́зы я́коже дре́вле непло́дныя, / моего́ помышле́ния си́це окамене́ние разреши́, Крести́телю, / и плоды́ покая́ния мя сотвори́ возраща́ти, / и жи́ти во ве́ки.

И ныне,Богородичен: Чревоно́сную Тя, Отрокови́це, я́ко Елисаве́т ви́де, / боже́ственне возра́довася, / внутрь ея́ младе́нцу взыгра́вшуся, / я́ко позна́вшу своего́ Влады́ку.

Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.

Катавасия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.

Песнь 9

Ирмос: Бо́га / челове́ком невозмо́жно ви́дети, / на Него́ же не сме́ют чи́ни а́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и Тя ублажа́ем.

Припев: Святы́й вели́кий Иоа́нне, Предте́че и Крести́телю Госпо́день, моли́ Бо́га о на́с.

Христо́в вели́кий и боже́ственный Предте́ча, непло́дная ны́не врата́ отве́рз, / водворя́ется, я́ко во ца́рских, в боку́ ма́тере: / да я́ко во́ин произы́дет, Всецаря́ пути́ уготовля́я.

Бо́жий проро́че, ста́рче, лику́й, роди́ши бо сы́на, / его́же бо́льший в челове́цех не воста́, Иоа́нна, Госпо́дня Предте́чу, / взыгра́й, Елисаве́т, земля́ вся, ра́дуйся, / хвалу́ всех Творцу́ Бо́гу принося́щи.

Слава: Нас, ве́рою благохва́лящих тя, помяни́ ны́не, Госпо́день проро́че и Предте́че, / от душе́вных страсте́й избавля́я: / спаса́й ны от бед, / к Небе́сней стези́ путево́ждствуя боголе́пно, присноблаже́нне.

И ныне,Богородичен: Чи́стую Ма́терь я́ве позна́ Тя, / непло́дных уз Елисаве́т я́ко ощути́ разреше́ну себе́ и нося́щу Предте́чу / во утро́бе Твое́й Все́льшагося, / Чи́стая Де́во, Мариа́м Богора́дованная.

Катавасия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.

Светилен. Подобен: Со ученики:

Предте́чево сла́вное зача́тие предвозвеща́ет из Де́вы хотя́щаго роди́тися Царя́, / я́ко сей от Елисаве́ти непло́дныя и безча́дныя, / ста́рца же и иере́я Заха́рии вели́каго. / И́хже моли́твами, и Богоро́дицы, / и Иоа́нна, Крести́теля Твоего́, Го́споди, / спаси́ и уще́дри вся. Дважды.

Слава, и ныне,Богородичен: Сотвори́ я́ко и́стинно с Тобо́ю вели́чия Сын предве́чный сове́том Оте́ческим, / Жизнь бо безсме́ртную безстра́стно родила́ еси́, / и пребыла́ еси́ я́ко пре́жде рождества́, ма́терских избе́гши, / и Де́ва по рождестве́ пребыла́ еси́, Де́во.

На хвалитех стихиры на 4, глас 1. Подобен: Небесных чинов:

Весели́тся тварь в зача́тии твое́м, / проро́че и Предте́че, Крести́телю Иоа́нне, боже́ственное бо твое́ рожде́ние / предзнамену́ет нам Влады́чнее Рождество́, / и сего́ ра́ди согла́сно, / су́щии на земли́, досто́йно восхваля́ем тя.

Я́ко чу́дное свиде́тельство / обре́т А́нгел зача́тие непло́дныя, / Мари́и приво́дит, ко увере́нию принося́. / Тем и мы Елисаве́ти непло́дствие, / и Заха́рию, сопру́жника ея́, / и Иоа́нна восхва́лим.

Богоустро́енный свети́льник / присносу́щнаго Све́та, Жениха́ друг, / Со́лнца сла́вы вели́кий светоно́сец, / живы́й глас Бо́жия Сло́ва, / Предте́ча прише́ствия Госпо́дня, / а́нгельским приглаше́нием ны́не зачина́ется.