Небесные покровители земного воинства

Сед а́ лен

глас 4

Я́ко до́блему страда́льцу и во́ину кре́пку Всецарю́ющаго Христа́, взыва́ем псало́мски: ра́дуйся, му́чеников украше́ние и ле́пота*; ра́дуйся, све́тлая Це́ркве звездо́ и стено́, и приста́нище прибега́ющих к тебе́, великому́чениче сла́вне Дими́трие, тя пою́щия спаса́й от вся́каго вре́да чужда́го и озлобле́ния вся.

С лава, и ныне: Удиви́ся Ио́сиф, е́же па́че естества́ зря, и внима́ше мы́слию, и́же на руно́ дождь, в безсе́меннем зача́тии Твое́м, Богоро́дице, купину́ огне́м неопали́мую, жезл Ааро́нов прозя́бший, и свиде́тельствуя обру́чник Твой и храни́тель, свяще́нником взыва́ше: Де́ва ражда́ет, и по рождестве́ па́ки Де́вою пребыва́ет.

Песнь 4

Ирмос: Вознесе́на Тя ви́девши Це́рковь на Кресте́, Со́лнце Пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святый великомучениче Димитрие, моли Бога о нас.

П обеди́вшаго лжу нече́стия, Бо́жие Всевысоча́йшее ви́дев Сло́во, сла́вою венча́ тя, Дими́трие, пою́ща: сла́ва си́ле Твое́й, Го́споди.

Припев: Святый великомучениче Димитрие, моли Бога о нас.

Н а лесть побе́ду возста́вив, победи́тельный вене́ц пра́вды прия́л еси́, Дими́трие, зовя́ Зижди́телю* твоему́: сла́ва си́ле Твое́й, Го́споди.

С лава: Направля́ем дла́нию* жизноно́сною, к приста́нищем дости́гл еси́ тиша́йшим, иде́же ны́не ра́дуяся, зове́ши, Дими́трие: сла́ва си́ле Твое́й, Го́споди.

И ныне: Я́ко тва́рей всех Свяще́ннейшая, Ма́ти Бо́га бы́ти еди́на сподо́билася еси́, Сего́ бо ро́ждши, мир благода́тию богозна́ния просвети́ла еси́.

Песнь 5

Ирмос: Ты, Го́споди мой, Свет в мир прише́л еси́, Свет Святы́й, обраща́яй из мра́чна неве́дения ве́рою воспева́ющия Тя.

Припев: Святый великомучениче Димитрие, моли Бога о нас.

О гнь любве́ Боже́ственныя в се́рдцы прие́м, огнь угаси́л еси́ безбо́жнаго идолонеи́стовства, сла́вне Дими́трие.

Припев: Святый великомучениче Димитрие, моли Бога о нас.

И збавля́я ны от бед, яви́ся, Дими́трие, моли́твами твои́ми покрыва́я ве́рою и любо́вию восхваля́ющия тя.

С лава: И́же ве́рою к твоему́ усе́рдно притека́юще хра́му, Дими́трие, неду́гов и страсте́й душетле́нных вско́ре избавля́ются.

И ныне: Сло́во Бо́жие, Отцу́ Единосу́щное, Твой быва́ет, Богома́ти, па́че ума́ же и сло́ва, Сын, Тебе́ Единосу́щен.