Новый Завет (на цсл., гражданский шрифт, с ударениями)

⁸ Я́коже Ианни́й и Иамври́й проти́вистася Моисе́ю, та́кожде и си́и противля́ются и́стине, челове́цы растле́нни умо́м и неиску́сни о ве́ре.

⁹ Но не преуспе́ют бо́лее: безу́мие бо их явле́но бу́дет всем, я́коже и о́нех бысть.

¹⁰ Ты же после́довал еси́ моему́ уче́нию, житию́, приве́ту, ве́ре, долготерпе́нию, любви́, терпе́нию,

¹¹ Изгна́нием, страда́нием, якова́ ми бы́ша во Антиохи́и, и во Икони́и, и в Ли́стрех, якова́ изгна́ния прия́х, и от всех мя изба́вил есть Госпо́дь.

¹² И вси же хотя́щии благоче́стно жи́ти о Христе́ Иису́се гони́ми бу́дут.

¹³ Лука́вии же челове́цы и чароде́и преуспе́ют на го́ршее, прельща́юще и прельща́еми.

¹⁴ Ты же пребыва́й в ни́хже науче́н еси́ и я́же вве́рена суть тебе́, ве́дый, от кого́ научи́лся еси́.

¹⁵ И я́ко из мла́да свяще́нная писа́ния уме́еши, могу́щая тя умудри́ти во спасе́ние ве́рою, я́же о Христе́ Иису́се.

¹⁶ Вся́ко Писа́ние богодухнове́нно и поле́зно есть ко уче́нию, ко обличе́нию, ко исправле́нию, к наказа́нию е́же в пра́вде,

¹⁷ Да соверше́н бу́дет Бо́жий челове́к, на вся́кое де́ло благо́е угото́ван.

Глава 4

¹ Засвиде́тельствую же аз пред Бо́гом и Го́сподем на́шим Иису́с Христо́м, хотя́щим суди́ти живы́м и ме́ртвым в явле́нии Его́ и Ца́рствии Его́.

² Пропове́дуй сло́во, насто́й благовре́менне и безвре́менне, обличи́, запрети́, умоли́ со вся́ким долготерпе́нием и уче́нием.

³ Бу́дет бо вре́мя, егда́ здра́ваго уче́ния не послу́шают, но по свои́х по́хотех изберу́т себе́ учи́тели, че́шеми слу́хом.

⁴ И от и́стины слух отвратя́т, и к ба́снем уклоня́тся.

⁵ Ты же трезви́ся о всем, злопостражди́, де́ло сотвори́ благове́стника, служе́ние твое́ изве́стно сотвори́.

⁶ Аз бо уже́ жрен быва́ю, и вре́мя моего́ отше́ствия наста́.

⁷ По́двигом до́брым подвиза́хся, тече́ние сконча́х, ве́ру соблюдо́х,

⁸ Про́чее у́бо соблюда́ется ми вене́ц пра́вды, его́же возда́ст ми Госпо́дь в день он, пра́ведный Судия́, не то́кмо же мне, но и всем возлю́бльшим явле́ние Его́.

⁹ Потщи́ся ско́ро приити́ ко мне.

¹⁰ Дима́с бо мене́ оста́ви, возлюби́в ны́нешний век, и и́де в Солу́нь, Кри́скент в Галати́ю, Тит в Далма́тию.

¹¹ Лука́ еди́н есть со мно́ю. Ма́рка пое́м приведи́ с собо́ю, есть бо ми благопотре́бен в слу́жбу.

¹² Тихи́ка же посла́х во Ефе́с.

¹³ Фело́н, его́же оста́вих в Троа́де у Ка́рпа, гряды́й принеси́, и кни́ги, па́че же ко́жаныя.

¹⁴ Алекса́ндр кова́чь мно́га ми зла сотвори́, да возда́ст ему́ Госпо́дь по дело́м его́,

¹⁵ От него́же и ты себе́ блюди́, зело́ бо проти́вится словесе́м на́шим.

¹⁶ В пе́рвый мой отве́т никто́же бысть со мно́ю, но вси мя оста́виша, да не вмени́тся им.

¹⁷ Госпо́дь же мне предста́ и укрепи́ мя, да мно́ю пропове́дание изве́стно бу́дет, и услы́шат вси язы́цы, и изба́влен бых от уст львов.

¹⁸ И изба́вит мя Госпо́дь от вся́каго дела́ лука́ва и спасе́т во Ца́рствие Свое́ Небе́сное, Ему́же сла́ва во ве́ки веко́в. Ами́нь.

¹⁹ Целу́й Приски́ллу и Аки́лу и Ониси́форов дом.

²⁰ Ера́ст оста́ в Кори́нфе, Трофи́ма же оста́вих в Мили́те боля́ща.

²¹ Потщи́ся пре́жде зимы́ приити́. Целу́ют тя Евву́л и Пуд, и Лин, и Клавди́а, и бра́тия вся.

²² Госпо́дь Иису́с Христо́с со ду́хом твои́м. Благода́ть с ва́ми. Ами́нь.

Посла́ние к Ти́ту

Глава 1

¹ Па́вел, раб Бо́жий, Апо́стол же Иису́с Христо́в, по ве́ре избра́нных Бо́жиих и ра́зуму и́стины, я́же по благоче́стию,

² О упова́нии жи́зни ве́чныя, ю́же обетова́ нело́жный Бог пре́жде лет ве́чных,

³ Яви́ же во времена́ своя́ сло́во Свое́ пропове́данием, е́же мне поруче́но бысть по повеле́нию Спаси́теля на́шего Бо́га,

⁴ Ти́ту, при́сному ча́ду по о́бщей ве́ре, благода́ть, ми́лость, мир от Бо́га Отца́ и Го́спода Иису́са Христа́ Спа́са на́шего.

⁵ Сего́ ра́ди оста́вих тя в Кри́те, да недоконча́нная испра́виши и устро́иши по всем градо́м пресви́теры, я́коже тебе́ аз повеле́х.

⁶ А́ще кто есть непоро́чен, еди́ныя жены́ муж, ча́да имы́й ве́рна, не во укоре́нии блуда́, или́ непокори́ва.

⁷ Подоба́ет бо епи́скопу без поро́ка бы́ти, я́коже Бо́жию строи́телю: не себе́ угожда́ющу, не де́рзу, не напра́сливу, не гневли́ву, не пия́нице, не би́йце, не скверностяжа́тельну,

⁸ Но страннолюби́ву, благолю́бцу, целому́дренну, пра́ведну, преподо́бну, воздержа́тельну,

⁹ Держа́щемуся ве́рнаго словесе́ по уче́нию, да си́лен бу́дет и утеша́ти во здра́вем уче́нии, и проти́вящияся облича́ти.

¹⁰ Суть бо мно́зи непокори́ви, суесло́вцы и умо́м прельще́ни, наипа́че же су́щии от обре́зания,

¹¹ И́хже подоба́ет уста́ загражда́ти, и́же вся до́мы развраща́ют, уча́ще я́же не подоба́ет, скве́рнаго ра́ди прибы́тка.

¹² Рече́ же не́кто от них, свой им проро́к: Кри́тяне при́сно лжи́ви, зли́и зве́рие, утро́бы пра́здныя.

¹³ Свиде́тельство сие́ и́стинно есть. Ея́же ра́ди вины́ облича́й их неща́дно, да здра́ви бу́дут в ве́ре,

¹⁴ Не внима́юще иуде́йским ба́снем, ни за́поведем челове́к отвраща́ющихся от и́стины.

¹⁵ Вся у́бо чи́ста чи́стым, оскверне́ным же и неве́рным ничто́же чи́сто, но оскверни́ся их и ум и со́весть.

¹⁶ Бо́га испове́дуют ве́дети, а де́лы отме́щутся Его́, ме́рзцы су́ще и непокори́ви и на вся́кое де́ло благо́е неиску́сни.

Глава 2

¹ Ты же глаго́ли, я́же подоба́ет здра́вому уче́нию.