Новый Завет (на цсл., гражданский шрифт, с ударениями)

⁴ А́ще же ка́я вдови́ца ча́да или́ внуча́та и́мать, да уча́тся пре́жде свой дом благочести́вно устро́ити и взае́м воздая́ти роди́телем, сие́ бо есть благоуго́дно пред Бо́гом.

⁵ А су́щая и́стинная вдови́ца и уедине́на, упова́ на Бо́га и пребыва́ет в моли́твах и моле́ниих день и нощь.

⁶ Пита́ющаяся же простра́нно, жива́ умерла́.

⁷ И сия́ завещава́й, да непоро́чни бу́дут.

⁸ А́ще же кто о свои́х, па́че же о при́сных [262] не промышля́ет, ве́ры отве́рглся есть и неве́рнаго го́рши есть.

⁹ Вдови́ца же да причита́ется не ме́ньши лет шести́десятих, бы́вши еди́ному му́жу жена́,

¹⁰ В де́лех до́брых свиде́тельствуема, а́ще ча́да воспита́ла есть, а́ще святы́х но́зе умы́, а́ще стра́нныя прия́т, а́ще ско́рбным утеше́ние бысть, [263] а́ще вся́кому де́лу бла́гу после́довала есть.

¹¹ Ю́ных же вдови́ц отрица́йся: егда́ бо разсвире́пеют о Христе́, [264] посяга́ти хотя́т,

¹² иму́щя грех, я́ко пе́рвыя ве́ры отверго́шася.

¹³ Ку́пно же и пра́здны уча́тся обходи́ти до́мы, не то́чию же пра́здны, но и бляди́вы и оплази́вы, [265] глаго́лющия, я́же не подоба́ет.

¹⁴ Хощу́ у́бо ю́ным вдови́цам посяга́ти, ча́да ражда́ти, дом стро́ити, ни еди́ны же вины́ дая́ти проти́вному хулы́ ра́ди.

¹⁵ Се у́бо не́кия разврати́шася вслед сатаны́.

¹⁶ А́ще кто ве́рен или́ ве́рна и́мать вдови́цы, да довли́т их, я́ко да не тяготи́тся Це́рковь, да су́щих и́стинных вдови́ц удово́лит.

¹⁷ Прилежа́щии же до́бре пресви́тери сугу́быя че́сти да сподобля́ются, па́че же тружда́ющиися в сло́ве и уче́нии.

¹⁸ Глаго́лет бо Писа́ние: вола́ молотя́ща не оброти́ши, и досто́ин де́латель мзды своея́.

¹⁹ На пресви́тера хулы́ не прие́мли, ра́зве при двою́ или́ трие́х свиде́телех.

²⁰ Согреша́ющих же пред все́ми и облича́й, да и про́чии страх и́мут.

²¹ Засвиде́тельствую пред Бо́гом, и Го́сподем Иису́с Христо́м, и избра́нными его́ А́нгелы, да сия́ сохрани́ши без лицеме́рия, ничесо́же творя́ по уклоне́нию.

²² Руки́ ско́ро не возлага́й ни на кого́же, ниже́ приобща́йся чужи́м грехо́м, себе́ чи́ста соблюда́й.

²³ Ктому́ не пий воды́, но ма́ло вина́ прие́мли, стома́ха ра́ди твоего́ и ча́стых твои́х неду́гов.

²⁴ Не́ких же челове́к греси́ явле́ни суть, предваря́юще на суд, не́ким же и после́дствуют.

²⁵ Та́коже и до́брая дела́ явле́на суть, и су́щая и́нако, утаи́тися не мо́гут.

Глава 6

¹ Ели́цы суть под и́гом раби́, своя́ господы́ вся́кия че́сти да сподобля́ют, да и́мя Бо́жие не ху́лится и уче́ние.

² Иму́щии же ве́рны господы́ да не нерадя́т о них, поне́же бра́тия суть, но па́че да рабо́тают, зане́ ве́рни суть и возлю́блени, и́же благода́ть восприе́млющии. Сия́ учи́ и моли́.

³ А́ще ли кто и́нако учи́т и не приступа́ет к здра́вым словесе́м Го́спода на́шего Иису́са Христа́ и уче́нию, е́же по благове́рию,

⁴ Разгорде́вся, ничто́же ве́дый, но неду́гуяй о стяза́ниих и словопре́ниих, от ни́хже быва́ет за́висть, рве́ние, хулы́, непщева́ния лука́ва,

⁵ Бесе́ды злы́я растле́нных челове́ков умо́м и лише́нных и́стины, непщу́ющих приобре́тение бы́ти благоче́стие. Отступа́й от таковы́х.

⁶ Есть же сниска́ние ве́лие благоче́стие с дово́льством.

⁷ Ничто́же бо внесо́хом в мир сей я́ве, я́ко ниже́ изнести́ что мо́жем.

⁸ Име́юще же пи́щу и одея́ние, си́ми дово́льни бу́дем.

⁹ А хотя́щии богати́тися впа́дают в напа́сти и се́ти, и в по́хоти мно́ги несмы́сленны и врежда́ющия, я́же погружа́ют челове́ки во всегуби́тельство и поги́бель.

¹⁰ Ко́рень бо всем злым сребролю́бие есть, его́же не́цыи жела́юще заблуди́ша от ве́ры, и себе́ пригвозди́ша боле́знем мно́гим.

¹¹ Ты же, о челове́че Бо́жий, сих бе́гай. Гони́ же пра́вду, благоче́стие, ве́ру, любо́вь, терпе́ние, кро́тость.

¹² Подвиза́йся до́брым по́двигом ве́ры, емли́ся за ве́чную жизнь, в ню́же и зван был еси́, и испове́дал еси́ до́брое испове́дание пред мно́гими свиде́тели.

¹³ Завещава́ю ти пред Бо́гом оживля́ющим вся́ческая, и Христо́м Иису́сом свиде́тельствовавшим при Понти́йстем Пила́те до́брое испове́дание,

¹⁴ Соблюсти́ тебе́ за́поведь нескве́рну и незазо́рну, да́же до явле́ния Го́спода на́шего Иису́са Христа́.

¹⁵ Е́же во своя́ времена́ яви́т блаже́нный и еди́н си́льный, Царь ца́рствующих и Госпо́дь госпо́дствующих,

¹⁶ Еди́н име́яй безсме́ртие и во све́те живы́й непристу́пнем, Его́же никто́же ви́дел есть от челове́к, ниже́ ви́дети мо́жет, ему́же честь и держа́ва ве́чная. Ами́нь.

¹⁷ Бога́тым в ны́нешнем ве́це запреща́й не высокому́дрствовати, ниже́ упова́ти на бога́тство погиба́ющее, но на Бо́га жи́ва, даю́щаго нам вся оби́льно в наслажде́ние,

¹⁸ Благо́е де́лати, богати́тися в де́лех до́брых, благопода́тливым бы́ти, общи́тельным,

¹⁹ Сокро́вищующе себе́ основа́ние добро́ в бу́дущее, да прии́мут ве́чную жизнь.

²⁰ О, Тимофе́е, преда́ние сохрани́, уклоня́яся скве́рных суесло́вий и прекосло́вий лжеиме́ннаго ра́зума.

²¹ О не́мже не́цыи хва́лящеся, о ве́ре погреши́ша. Благода́ть с тобо́ю. Ами́нь.

Второ́е посла́ние к Тимофе́ю

Глава 1

¹ Па́вел, Апо́стол Иису́с Христо́в во́лею Бо́жиею, по обетова́нию жи́зни, я́же о Христе́ Иису́се

² Тимофе́ю возлю́бленному ча́ду благода́ть, ми́лость, мир от Бо́га Отца́ и Христа́ Иису́са Го́спода на́шего.