Новый Завет (на цсл., гражданский шрифт, с ударениями)

¹⁸ Сие́ же завеща́ние предаю́ тебе́ по бы́вших на тя пре́жде проро́чествиих, да во́инствуеши в них до́брое во́инство,

¹⁹ Име́я ве́ру и благу́ю со́весть, ю́же не́цыи отри́нувше, от ве́ры отпадо́ша.

²⁰ От ни́хже есть Имене́й и Алекса́ндр, и́хже преда́х сатане́, я́ко да нака́жутся не ху́лити.

Глава 2

¹ Молю́ у́бо пре́жде всех твори́ти моли́твы, моле́ния, проше́ния, благодаре́ния за вся челове́ки,

² За царя́ и за вся, и́же во вла́сти суть, да ти́хое и безмо́лвное житие́ поживе́м во вся́ком благоче́стии и чистоте́.

³ Сие́ бо добро́ и прия́тно пред Спаси́телем на́шим Бо́гом,

⁴ И́же всем челове́ком хо́щет спасти́ся и в ра́зум и́стины приити́.

⁵ Еди́н бо есть Бог, и еди́н хода́тай Бо́га и челове́ков, челове́к Христо́с Иису́с,

⁶ Да́вый Себе́ избавле́ние за всех, свиде́тельство времены́ свои́ми.

⁷ В не́же поста́влен бых аз пропове́дник и Апо́стол, [и́стину глаго́лю о Христе́, не лгу,] учи́тель язы́ков в ве́ре и и́стине.

⁸ Хощу́ у́бо, да моли́твы творя́т му́жие на вся́ком ме́сте, возде́юще преподо́бныя ру́ки без гне́ва и размышле́ния.

⁹ Та́кожде и жены́ во украше́нии ле́потном, со стыде́нием и целому́дрием да украша́ют себе́ не в плете́ниих, ни зла́том, или́ би́сером, или́ ри́зами многоце́нными,

¹⁰ Но [е́же подоба́ет жена́м обещава́ющимся благоче́стию,] делесы́ благи́ми.

¹¹ Жена́ в безмо́лвии да учи́тся со вся́ким покоре́нием.

¹² Жене́ же учи́ти не повелева́ю, ни владе́ти му́жем, но бы́ти в безмо́лвии.

¹³ Ада́м бо пре́жде со́здан бысть, пото́м же Е́ва.

¹⁴ И Ада́м не прельсти́ся, жена́ же прельсти́вшися, в преступле́нии бысть.

¹⁵ Спасе́тся же чадоро́дия ра́ди, [257] а́ще пребу́дет в ве́ре и любви́, и во святы́ни с целому́дрием.

Глава 3

¹ Ве́рно сло́во: а́ще кто епи́скопства хо́щет, добра́ де́ла жела́ет.

² Подоба́ет у́бо епи́скопу бы́ти непоро́чну, еди́ныя жены́ му́жу, тре́звену, целому́дру, благогове́йну, че́стну, страннолюби́ву, учи́тельну,

³ Не пия́нице, не би́йце, не сварли́ву, не мшелои́мцу, но кро́тку, не зави́стливу, не сребролю́бцу,

⁴ Свой дом до́бре пра́вящу, ча́да иму́щу в послуша́нии со вся́кою чистото́ю. [258]

⁵ [А́ще же кто своего́ до́му не уме́ет пра́вити, ка́ко о Це́ркви Бо́жией прилежа́ти возмо́жет?]

⁶ Не новокреще́нну, да не разгорде́вся в суд впаде́т и в сеть диа́волю.

⁷ Подоба́ет же ему́ и свиде́тельство добро́ име́ти от вне́шних, да не в поноше́ние впаде́т и в сеть неприя́знену.

⁸ Диа́коном та́кожде чи́стым, [259] не двоязы́чным, не вину́ мно́гу внима́ющим, не скверностяжа́тельным,

⁹ Иму́щим та́инство ве́ры в чи́стей со́вести.

¹⁰ И си́и у́бо да искуша́ются пре́жде, пото́м же да слу́жат, непоро́чни су́ще.

¹¹ Жена́м та́кожде чи́стым, [260] не клевети́вым, не нава́дницам, тре́звенным, ве́рным о всем.

¹² Диа́кони да быва́ют еди́ныя жены́ му́жие, ча́да до́бре заступа́юще и своя́ до́мы.

¹³ И́бо служи́вшии до́бре степе́нь себе́ добр сниска́ют и мно́гое дерзнове́ние в ве́ре, я́же о Христе́ Иису́се.

¹⁴ Сия́ пишу́ тебе́, упова́я приити́ к тебе́ ско́ро,

¹⁵ А́ще же заме́длю, да уве́си, ка́ко подоба́ет в дому́ Бо́жии жи́ти, я́же есть Це́рковь Бо́га жи́ва, столп и утвержде́ние и́стины.

¹⁶ И испове́дуемо ве́лия есть благоче́стия та́йна: Бог яви́ся во пло́ти, оправда́ся в Ду́се показа́ся А́нгелом, пропове́дан бысть во язы́цех, ве́ровася в міре, вознесе́ся во сла́ве.

Глава 4

¹ Дух же я́вственне глаго́лет, я́ко в после́дняя времена́ отсту́пят не́цыи от ве́ры, вне́млюще духово́м ле́стьчым и уче́нием бесо́вским,

² В лицеме́рии лжеслове́сник, сожже́нных свое́ю со́вестию,

³ Возбраня́ющих жени́тися, удаля́тися от бра́шен, я́же Бог сотвори́ в снеде́ние со благодаре́нием ве́рным и позна́вшим и́стину.

⁴ Зане́ вся́кое созда́ние Бо́жие добро́, и ничто́же отме́тно, со благодаре́нием прие́млемо,

⁵ Освяща́ется бо сло́вом Бо́жиим и моли́твою.

⁶ Сия́ вся сказу́я бра́тии, добр бу́деши служи́тель Иису́са Христа́, пита́емь словесы́ ве́ры и до́брым уче́нием, ему́же после́довал еси́.

⁷ Скве́рных же и ба́биих ба́сней отрица́йся, обуча́й же себе́ ко благоче́стию.

⁸ Теле́сное бо обуче́ние вма́ле есть поле́зно, а благоче́стие на все поле́зно есть, обетова́ние име́юще живота́ ны́нешняго и гряду́щаго.

⁹ Ве́рно сло́во и вся́каго прия́тия досто́йно.

¹⁰ На сие́ бо и тружда́емся и поноша́еми есмы́, я́ко упова́хом на Бо́га жи́ва, И́же есть Спаси́тель всем челове́ком, па́че же ве́рным.

¹¹ Завещава́й сия́ и учи́.

¹² Никто́же о ю́ности твое́й да неради́т, но о́браз бу́ди ве́рным сло́вом, житие́м, любо́вию, ду́хом, ве́рою, чистото́ю.

¹³ До́ндеже прииду́, внемли́ чте́нию, утеше́нию, уче́нию.

¹⁴ Не неради́ о свое́м дарова́нии живу́щем в тебе́, е́же дано́ тебе́ бысть проро́чеством с возложе́нием рук свяще́нничества.

¹⁵ В сих поуча́йся, в сих пребыва́й, [в сих разумева́й,] да преспе́яние твое́ явле́но бу́дет во всех.

¹⁶ Внима́й себе́ и уче́нию и пребыва́й в них: сия́ бо творя́, и сам спасе́шися и послу́шающии тебе́.

Глава 5

¹ Ста́рцу [261] не твори́ па́кости, но утеша́й я́коже отца́: ю́ноши, я́коже бра́тию,

² Cта́рицы, я́коже ма́тери, ю́ныя, я́коже сестры́, со вся́кою чистото́ю.

³ Вдови́цы чти, су́щия и́стинныя вдови́цы.