Новый Завет (на цсл., гражданский шрифт, с ударениями)

¹¹ Держа́щу же ся исцеле́вшему хромо́му Петра́ и Иоа́нна, притеко́ша к ним вси лю́дие в притво́р, нарица́емый Соломо́нов, ужа́сни.

¹² Ви́дев же Петр отвещава́ше к лю́дем: му́жие Изра́ильтяне, что чудите́ся о сем, или́ на ны что взира́ете, я́ко свое́ю ли си́лою или́ благоче́стием сотвори́хом его́ ходи́ти?

¹³ Бог Авраа́мов и Исаа́ков и Иа́ковль, Бог оте́ц на́ших, просла́ви О́трока Своего́ Иису́са, Его́же вы преда́сте, и отверго́стеся Его́ пред лице́м Пила́товым, су́ждьшу О́ному пусти́ти.

¹⁴ Вы же Свята́го и Пра́веднаго отверго́стеся, и испроси́сте му́жа уби́йцу да́ти вам,

¹⁵ Нача́льника же жи́зни уби́сте, Его́же Бог воскреси́ от ме́ртвых, ему́же мы свиде́тели есмы́.

¹⁶ И о ве́ре и́мене Его́, сего́, его́же ви́дите и зна́ете, утверди́ и́мя Его́, и ве́ра, я́же Его́ ра́ди, даде́ ему́ всю це́лость сию́ пред все́ми ва́ми.

¹⁷ И ны́не, бра́тие, вем, я́ко по неве́дению сие́ сотвори́сте, я́коже и кня́зи ва́ши:

¹⁸ Бог же, я́же предвозвести́ усты́ всех проро́к Свои́х пострада́ти Христу́, испо́лни та́ко.

¹⁹ Пока́йтеся и обрати́теся, да очи́ститеся от грех ва́ших.

²⁰ Я́ко да прии́дут времена́ прохла́дна от лица́ Госпо́дня, и по́слет пронарече́ннаго вам Христа́ Иису́са,

²¹ Его́же подоба́ет небеси́ у́бо прия́ти да́же до лет устрое́ния всех, я́же глаго́ла Бог усты́ всех святы́х Свои́х проро́к от ве́ка.

²² Моисе́й у́бо ко отце́м рече́: я́ко Проро́ка вам воздви́гнет Госпо́дь Бог ваш от бра́тии ва́шея, я́ко мене́, Того́ послу́шайте по всему́, ели́ка а́ще рече́т к вам.

²³ Бу́дет же, вся́ка душа́, я́же а́ще не послу́шает Проро́ка о́наго, потреби́тся от люде́й.

²⁴ И вси же проро́цы от Саму́ила и и́же по сих, ели́цы глаго́лаша, та́кожде предвозвести́ша дни сия́.

²⁵ Вы есте́ сы́нове проро́к и заве́та, его́же завеща́ Бог ко отце́м ва́шим, глаго́ля ко Авраа́му: и о се́мени твое́м возблагословя́тся вся оте́чествия земна́я.

²⁶ Вам пе́рвее Бог, воздви́гий О́трока Своего́ Иису́са, посла́ Его́ благословя́ща вас, во е́же отврати́тися вам кому́ждо от злоб ва́ших.

Глава 4

¹ Глаго́лющим же им к лю́дем, наидо́ша на них свяще́нницы и воево́да церко́вный и саддуке́и,

² Жа́ляще си, за е́же учи́ти им лю́ди и возвеща́ти о Иису́се воскресе́ние ме́ртвых.

³ И возложи́ша на них ру́ки и положи́ша их в соблюде́ние до у́трия, бе бо ве́чер уже́.

⁴ Мно́зи же от слы́шавших сло́во ве́роваша: и бысть число́ муже́й я́ко ты́сящ пять.

⁵ Бысть же нау́трие собра́тися князе́м их и ста́рцем и кни́жником во Иерусали́м,

⁶ И А́нне архиере́ю и Каиа́фе и Иоа́нну и Алекса́ндру, и ели́цы бе́ша от ро́да архиере́йска.

⁷ И поста́вльше их посреде́, вопроша́ху: ко́ею си́лою или́ ко́им и́менем сотвори́сте сие́ вы?

⁸ Тогда́ Петр, испо́лнився Ду́ха Свя́та, рече́ к ним: кня́зи лю́дстии и ста́рцы изра́илевы,

⁹ А́ще мы днесь истязу́еми есмы́ о благодея́нии челове́ка не́мощна, о чесо́м сей спасе́ся,

¹⁰ Разу́мно бу́ди всем вам и всем лю́дем изра́илевым, я́ко во и́мя Иису́са Христа́ Назоре́а, Его́же вы распя́сте, Его́же Бог воскреси́ от ме́ртвых, о Сем сей стои́т пред ва́ми здрав.

¹¹ Сей есть ка́мень укоре́ный от вас зи́ждущих, бы́вый во главу́ у́гла, и несть ни о еди́ном же ино́м спасе́ния.

¹² Несть бо ино́го и́мене под небесе́м, да́ннаго в челове́цех, о не́мже подоба́ет спасти́ся нам.

¹³ Ви́дяще же Петро́во дерзнове́ние и Иоа́нново и разуме́вше, я́ко челове́ка некни́жна еста́ и про́ста, дивля́хуся, зна́ху же их, я́ко со Иису́сом бе́ста.

¹⁴ Ви́дяще же исцеле́вшаго челове́ка с ни́ма стоя́ща, ничто́же имя́ху проти́ву рещи́.

¹⁵ Повеле́вше же и́ма вон из со́нмища изы́ти, стяза́хуся ко друг дру́гу,

¹⁶ Глаго́люще: что сотвори́м челове́кома си́ма? Я́ко у́бо наро́читое зна́мение бысть и́ма, всем живу́щим во Иерусали́ме я́ве, и не мо́жем отврещи́ся.

¹⁷ Но да не бо́лее простре́тся в лю́дех, преще́нием да запрети́м и́ма ктому́ не глаго́лати о и́мени сем ни еди́ному от челове́к.

¹⁸ И призва́вше их, запове́даша и́ма отню́д не провещава́ти ниже́ учи́ти о и́мени Иису́сове.

¹⁹ Петр же и Иоа́нн отвеща́вше к ним ре́ста: а́ще пра́ведно есть пред Бо́гом вас послу́шати па́че, не́жели Бо́га, суди́те?

²⁰ Не мо́жем бо мы, я́же ви́дехом и слы́шахом, не глаго́лати.

²¹ Они́ же призапре́щше и́ма, пусти́ша я́, ничто́же обре́тше ка́ко му́чити их, люде́й ра́ди, я́ко вси прославля́ху Бо́га о бы́вшем.

²² Лет бо бя́ше мно́жае четы́редесяти челове́к той, на не́мже бысть чу́до сие́ исцеле́ния.

²³ Отпуще́на же бы́вша апо́стола приидо́ста ко свои́м и возвести́ста, ели́ка к ни́ма архиере́и и ста́рцы ре́ша.

²⁴ Они́ же слы́шавше единоду́шно воздвиго́ша глас к Бо́гу и реко́ша: Влады́ко, ты, Бо́же, сотвори́вый не́бо и зе́млю и мо́ре и вся, я́же в них!

²⁵ И́же усты́ Дави́да о́трока Твоего́ рече́: вску́ю шата́шася язы́цы, и лю́дие поучи́шася тще́тным?

²⁶ Предста́ша ца́рие зе́мстии, и кня́зи собра́шася вку́пе на Го́спода и на Христа́ Его́.

²⁷ Собра́шася бо вои́стинну во гра́де сем на Свята́го О́трока Твоего́ Иису́са, Его́же пома́зал еси́, И́род же и Понти́йский Пила́т с язы́ки и людьми́ изра́илевыми,

²⁸ Сотвори́ти, ели́ка рука́ Твоя́ и сове́т Твой преднарече́ бы́ти.