Новый Завет (на цсл., гражданский шрифт, с ударениями)

²⁹ И ны́не, Го́споди, при́зри на преще́ния их и даждь рабо́м Твои́м со вся́ким дерзнове́нием глаго́лати сло́во Твое́,

³⁰ Внегда́ ру́ку Твою́ простре́ти Ти во исцеле́ния, и зна́мением и чудесе́м быва́ти и́менем Святы́м О́трока Твоего́ Иису́са.

³¹ И помоли́вшимся им, подви́жеся ме́сто, иде́же бя́ху со́брани, и испо́лнишася вси Ду́ха Свя́та и глаго́лаху сло́во Бо́жие со дерзнове́нием.

³² Наро́ду же ве́ровавшему бе се́рдце и душа́ еди́на, и ни еди́н же что от име́ний свои́х глаго́лаше свое́ бы́ти, но бя́ху им вся о́бща.

³³ И ве́лиею си́лою воздая́ху свиде́тельство Апо́столи воскресе́нию Го́спода Иису́са Христа́, благода́ть же бе ве́лия на всех их.

³⁴ Не бя́ше бо нищь ни еди́н в них: ели́цы бо госпо́дие се́лом или́ домово́м бя́ху, продаю́ще приноша́ху це́́ны продае́мых,

³⁵ И полага́ху при нога́х Апо́стол: дая́ше же ся коему́ждо, его́же а́ще кто тре́боваше.

³⁶ Иоси́а же, нарече́нный Варна́ва от Апо́стол, [е́же есть сказа́емо сын утеше́ния,] леви́т, Ки́прянин ро́дом,

³⁷ Име́я село́, прода́в принесе́ це́ну и положи́ пред нога́ми Апо́стол.

Глава 5

¹ Муж же не́кий, Ана́ниа и́менем, с Сапфи́рою жено́ю свое́ю, прода́ста село́,

² И утаи́ от цены́, све́дущей и жене́ его́, и прине́с часть не́кую, пред нога́ми Апо́стол положи́.

³ Рече́ же Петр: Ана́ние, почто́ испо́лни сатана́ се́рдце твое́ солга́ти Ду́ху Свято́му и утаи́ти от цены́ села́?

⁴ Су́щее тебе́ не твое́ ли бе, и прода́ное не в твое́й ли вла́сти бя́ше? Что я́ко положи́л еси́ в се́рдце твое́м вещь сию́? Не челове́ком солга́л еси́, но Бо́гу.

⁵ Слы́шав же Ана́ниа словеса́ сия́, пад и́здше. И бысть страх вели́к на всех слы́шащих сия́.

⁶ Вста́вше же ю́ноши взя́ша его́ и изне́сше погребо́ша.

⁷ Бысть же я́ко трем часо́м мину́вшим, и жена́ его́ не ве́дущи бы́вшаго вни́де.

⁸ Отвеща́в же ей Петр: рцы ми, а́ще на толи́це село́ отда́ста? Она́ же рече́: ей, на толи́це.

⁹ Петр же рече́ к ней: что я́ко согласи́стася искуси́ти Ду́ха Госпо́дня? Се, но́ги погре́бших му́жа твоего́ при две́рех, и изнесу́т тя.

¹⁰ Паде́ же а́бие пред нога́ма его́ и и́здше, вше́дше же ю́ноши обрето́ша ю́ ме́ртву и изне́сше погребо́ша близ му́жа ея́.

¹¹ И бысть страх вели́к на всей це́ркви и на всех слы́шаших сия́.

¹² Рука́ми же апо́стольскими бы́ша зна́мения и чудеса́ в лю́дех мно́га, и бя́ху единоду́шно вси в притво́ре Соломо́ни.

¹³ От про́чих же никто́же сме́яше прилепля́тися им, но велича́ху их лю́дие.

¹⁴ Па́че же прилага́хуся ве́рующии Го́сподеви, мно́жество муже́й же и жен.

¹⁵ Я́ко и на сто́гны износи́ти неду́жныя и полага́ти на посте́лях и на одре́х, да гряду́щу Петру́, поне́ сень его́ осени́т не́коего от них.

¹⁶ Схожда́ше же ся и мно́жество от окре́стных градо́в во Иерусали́м, принося́ще неду́жныя и стра́ждущия от дух нечи́стых, и́же исцелева́хуся вси.

¹⁷ Воста́в же архиере́й, и вси и́же с ним, су́щая е́ресь саддуке́йская, испо́лнишася за́висти.

¹⁸ И возложи́ша ру́ки своя́ на апо́столы, и посла́ша их в соблюде́ние о́бщее.

¹⁹ А́нгел же Госпо́день но́щию отве́рзе две́ри темни́цы, изве́д же их, рече́:

²⁰ Иди́те, и ста́вше, глаго́лите в це́ркви лю́дем вся глаго́лы жи́зни сея́.

²¹ Слы́шавше же внидо́ша по у́тренице [152] в це́рковь и уча́ху. Прише́д же архиере́й и и́же с ним, созва́ша собо́р и вся ста́рцы от сыно́в Изра́илевых и посла́ша во узи́лище, привести́ их.

²² Слуги́ же ше́дше не обрето́ша их в темни́це, возвра́щше же ся возвести́ша,

²³ Глаго́люще, я́ко темни́цу у́бо обрето́хом заключе́ну со вся́ким утвержде́нием и блюсти́тели стоя́щия пред две́рьми, отве́рзше же, внутрь ни еди́наго обрето́хом.

²⁴ Я́коже слы́шаша словеса́ сия́ архиере́й же и воево́да церко́вный и первосвяще́нницы, недоумева́хуся о них, что у́бо бу́дет сие́.

²⁵ Прише́д же не́кто возвести́ им, глаго́ля, я́ко се му́жие, и́хже всади́сте в темни́цу, суть в це́ркви стоя́ще и уча́ще лю́ди.

²⁶ Тогда́ шед воево́да со слуга́ми, приведе́ их не с ну́ждею: [боя́хуся бо люде́й, да не ка́мением побию́т их.]

²⁷ Приве́дше же их, поста́виша на со́нмищи, и вопроси́ их архиере́й, глаго́ля:

²⁸ Не запреще́нием ли запрети́хом вам не учи́ти о и́мени сем? И се испо́лнисте Иерусали́м уче́нием ва́шим и хо́щете навести́ на ны кровь Челове́ка Сего́.

²⁹ Отвеща́в же Петр и Апо́столи ре́ша: повинова́тися подоба́ет Бо́гови па́че, не́жели челове́ком.

³⁰ Бог оте́ц на́ших воздви́же Иису́са, Его́же вы уби́сте, пове́сивше на дре́ве.

³¹ Сего́ Бог Нача́льника и Спа́са возвы́си десни́цею Свое́ю, да́ти покая́ние Изра́илеви и оставле́ние грехо́в.

³² И мы есмы́ Того́ свиде́тели глаго́л сих, и Дух же Святы́й, Его́же даде́ Бог повину́ющимся Ему́.

³³ Они́ же слы́шавше распыха́хуся и совеща́ша уби́ти их.

³⁴ Воста́в же не́кий на со́нмищи фарисе́й, и́менем Гамалии́л, законоучи́тель че́стен всем лю́дем, повеле́ вне ма́ло что Апо́столом уступи́ти.

³⁵ Рече́ же к ним: му́жие Изра́ильтяне, внима́йте себе́ о челове́цех сих, что́ хо́щете сотвори́ти?

³⁶ Пред си́ми бо де́ньми воста́ Фе́вда, глаго́ля бы́ти вели́ка не́коего себе́, ему́же прилепи́шася число́м муже́й я́ко четы́реста: и́же убие́н бысть, и вси, ели́цы повину́шася ему́, разыдо́шася и бы́ша ни во что́же.