Новый Завет (на цсл., гражданский шрифт, с ударениями)

²⁴ И ви́дев не́коего оби́дима, посо́бствова и сотвори́ отмще́ние оби́димому, уби́в Еги́птянина.

²⁵ Мня́ше же разуме́ти бра́тиям свои́м, я́ко Бог руко́ю его́ даст им спасе́ние: они́ же не разуме́ша.

²⁶ Во у́трий же день яви́ся им тя́жущимся и привлача́ше их в примире́ние, рек: му́жие, бра́тия есте́ вы, вску́ю оби́дите друг дру́га?

²⁷ Оби́дяй же бли́жняго отри́ну его́, рек: кто тя поста́ви кня́зя и судию́ над на́ми?

²⁸ Еда́ уби́ти мя ты хо́щеши, и́мже о́бразом уби́л еси́ вчера́ Еги́птянина?

²⁹ Бежа́ же Моисе́й о словеси́ сем и бысть пришле́ц в земли́ Мадиа́мстей, иде́же роди́ сы́на два.

³⁰ И испо́лньшимся ле́том четы́редесятим, яви́ся ему́ в пусты́ни горы́ Сина́йския А́нгел Госпо́день в пла́мени о́гнене в купине́.

³¹ Моисе́й же ви́дев дивля́шеся виде́нию: приступа́ющу же ему́ разуме́ти, бысть глас Госпо́день к нему́:

³² Аз Бог оте́ц твои́х, Бог Авраа́мов и Бог Исаа́ков и Бог Иа́ковль. Тре́петен же быв Моисе́й не сме́яше смотри́ти.

³³ Рече́ же ему́ Госпо́дь: иззу́й сапоги́ но́гу твое́ю, ме́сто бо, на не́мже стои́ши, земля́ свята́ есть.

³⁴ Ви́дя ви́дех озлобле́ние люде́й Мои́х, и́же во Еги́пте, и стена́ние их услы́шах, и снидо́х изъя́ти их: и ны́не гряди́, послю́ тя во Еги́пет.

³⁵ Сего́ Моисе́а, его́же отри́нуша, ре́кше: кто́ тя поста́ви нача́льника и судию́? Сего́ Бог кня́зя и изба́вителя посла́ руко́ю А́нгела я́вльшагося ему́ в купине́.

³⁶ Сей изведе́ их, сотво́рь чудеса́ и зна́мения в земли́ Еги́петстей и в Чермно́м мо́ри, и в пусты́ни лет четы́редесять.

³⁷ Сей есть Моисе́й реки́й сыно́м Изра́илевым: Проро́ка вам воздви́гнет Госпо́дь Бог ваш от бра́тии ва́шея я́ко мене́: Того́ послу́шайте.

³⁸ Сей есть бы́вый в це́ркви в пусты́ни со А́нгелом, глаго́лавшим ему́ на горе́ Сина́йстей, и со отцы́ на́шими, иже прия́т словеса́ жи́ва да́ти нам.

³⁹ Его́же не восхоте́ша послу́шати отцы́ на́ши, но отри́нуша и и обрати́шася се́рдцем свои́м во Еги́пет,

⁴⁰ Ре́кше Ааро́ну: сотвори́ нам бо́ги, и́же предъи́дут пред на́ми, Моисе́ю бо сему́, и́же изведе́ нас от земли́ Еги́петския, не ве́мы, что бысть ему́.

⁴¹ И сотвори́ша тельца́ во дни о́ны, и принесо́ша же́ртву и́долу, и веселя́хуся в де́лех руку́ свое́ю.

⁴² Отврати́ся же Бог и предаде́ их служи́ти во́ем небе́сным, я́коже пи́сано есть в кни́зе проро́к: еда́ заколе́ния и же́ртвы принесо́сте Ми лет четы́редесять в пусты́ни, до́ме Изра́илев?

⁴³ И восприя́сте ски́нию Моло́хову и звезду́ бо́га ва́шего Ремфа́на, о́бразы, я́же сотвори́сте покланя́тися им: и преселю́ вы да́лее Вавило́на.

⁴⁴ Сень свиде́ния бя́ше отце́м на́шим в пусты́ни, я́коже повеле́ Глаго́ляй Моисе́ови, сотвори́ти ю́ по о́бразу, его́же ви́де.

⁴⁵ Ю́же и внесо́ша прие́мше отцы́ на́ши со Иису́сом во одержа́ние язы́ков, и́хже изри́ну Бог от лица́ оте́ц на́ших, да́же до дний Дави́да.

⁴⁶ И́же обре́те благода́ть пред Бо́гом и испроси́ обрести́ селе́ние Бо́гу Иа́ковлю.

⁴⁷ Соломо́н же созда́ Ему́ храм.

⁴⁸ Но Вы́шний не в рукотворе́нных це́рквах живе́т, я́коже проро́к глаго́лет:

⁴⁹ Не́бо Мне престо́л есть, земля́ же подно́жие нога́ма Мои́ма. Кий храм сози́ждете Ми, глаго́лет Госпо́дь, или́ ко́е ме́сто поко́ищу Моему́?

⁵⁰ Не рука́ ли Моя́ сотвори́ сия́ вся?

⁵¹ Жестоковы́йнии и необре́заннии се́рдцы и ушесы́, вы при́сно Ду́ху Свято́му проти́витеся, я́коже отцы́ ва́ши, та́ко и вы.

⁵² Кого́ от проро́к не изгна́ша отцы́ ва́ши? И уби́ша предвозвести́вшия о прише́ствии Пра́веднаго, Его́же вы ны́не преда́теле и уби́йцы бы́сте,

⁵³ И́же прия́сте зако́н устрое́нием А́нгельским и не сохрани́сте.

⁵⁴ Слы́шаще же сия́, распыха́хуся сердцы́ свои́ми и скрежета́ху зубы́ нань.

⁵⁵ [Стефа́н же] сый испо́лнь Ду́ха Свя́та, воззре́в на не́бо, ви́де сла́ву Бо́жию и Иису́са стоя́ща одесну́ю Бо́га,

⁵⁶ И рече́: се ви́жу небеса́ отве́рста и Сы́на Челове́ча одесну́ю стоя́ща Бо́га.

⁵⁷ Возопи́вше же гла́сом ве́лиим, затыка́ху у́ши свои́ и устреми́шася единоду́шно нань.

⁵⁸ И изве́дше вне гра́да, ка́мением побива́ху его́, и свиде́телие, [сне́мше] ри́зы своя́ положи́ша при ногу́ ю́ноши нарица́емаго Са́вла,

⁵⁹ И ка́мением побива́ху Стефа́на, моля́щася и глаго́люща: Го́споди Иису́се, приими́ дух мой.

⁶⁰ Прекло́нь же коле́на, возопи́ гла́сом ве́лиим: Го́споди, не поста́ви им греха́ сего́. И сия́ рек у́спе.

Глава 8

¹ Са́вл же бе соизволя́я уби́йству его́. Бысть же в той день гоне́ние ве́лие на це́рковь Иерусали́мскую: вси же разсе́яшася по стра́нам Иуде́йским и Самари́йским, кроме́ Апо́стол.

² Погребо́ша же Стефа́на му́жие благогове́йнии и сотвори́ша плачь ве́лий над ним.

³ Са́вл же озлобля́ше це́рковь, в до́мы входя́, и влачя́ му́жи и жены́, предая́ше в темни́цу.

⁴ Разсе́явшиися же прохожда́ху, благовеству́юще сло́во.

⁵ Фили́пп же соше́д во град самари́йский, пропове́даше им Христа́.

⁶ Внима́ху же наро́ди глаго́лемым от Фили́ппа единоду́шно, слы́шаще и ви́дяще зна́мения, я́же творя́ше.

⁷ Ду́си бо нечи́стии от мно́гих иму́щих я́, вопию́ще гла́сом ве́лиим, исхожда́ху, мно́зи же разсла́бленнии и хро́мии исцели́шася.

⁸ И бысть ра́дость ве́лия во гра́де том.