Полный Тропарион. Том II

Предста́телие страны́ на́шея неусы́пнии,/ хода́таи о нас ко Творцу́ непреста́ннии,/ не пре́зрите моле́ний на́ших,/ но предваря́юще на по́мощь, я́ко сро́дницы на́ши,/ ускори́те на моли́тву/ и потщи́теся на умоле́ние,/ предста́тельствующе при́сно о чту́щих вас.

Величание Пресвятой Троице

Велича́ем Тя,/ Триипоста́сный Влады́ко,/ ве́рою правосла́вною зе́млю Ру́сскую озари́вшаго/ и святы́х сро́дников на́ших/ сонм ве́лий в ней просла́вльшаго.

Величание Пресвятой Богородице

Досто́йно есть велича́ти Тя,/ Богоро́дице,/ земли́ Ру́сския Цари́цу Небе́сную/ и люде́й правосла́вных/ Влады́чицу Держа́вную.

Величание святым

Ублажа́ем вас,/ чудотво́рцы на́ши сла́внии,/ зе́млю Ру́сскую доброде́тельми ва́шими озари́вшии/ и о́браз спасе́ния нам/ светоя́вленно показа́вшии.

Ино величание святым

Велича́ем вас,/ святи́и вси, в земли́ Росси́йстей просия́вшии,/ и чтим святу́ю па́мять ва́шу,/ вы бо мо́лите о нас/ Христа́ Бо́га на́шего.

Собор преподобных отцев, на святой горе Афонской просиявших (В неделю 2-ю по Пятидесятнице)

Тропарь, глас 1

Пусты́ни Афо́нския отцы́,/ а́нгелы во пло́ти,/ испове́дники вку́пе и преподо́бныя,/ святи́тели же и му́ченики в пе́ниих почти́м,/ подража́юще доброде́телем их,/ зову́ще согла́сно и глаго́люще:/ сла́ва Просла́вльшему вы,/ сла́ва Венча́вшему вы,/ сла́ва в беда́х предста́тели нам вы Показа́вшему.

Кондак, глас 4

Онебеси́вшия Го́ру сию́,/ и показа́вшия в ней житие́ а́нгельское,/ и мно́жество мона́хов собра́вшия отцы́,/ прииди́те, благохва́лим вси, к ним взыва́юще:/ вся́кия беды́ и искуше́ния нас изба́вите,/ мно́жество преподо́бных,/ Афо́нская похвало́.

Величание

Ублажа́ем вас,/ преподо́бнии отцы́ Афо́нстии,/ в горе́ сей пости́вшиися,/ и чтим святу́ю па́мять ва́шу,/ наста́вницы мона́хов/ и собесе́дницы /Ангелов.

Собор всех святых, в Болгарии просиявших (В неделю 2-ю по Пятидесятнице)

Тропарь, глас 4

Собо́р ваш честны́й почита́юще/ и па́мять святу́ю пра́зднующе,/ святи́и, от бо́лгар просия́вшии,/ приле́жно мо́лим вы:/ Го́спода о всех моли́те,/ па́че же о при́сных,/ сохрани́тися земли́ Бо́лгарстей от вся́ких бед/ и наро́ду утверди́тися на ве́ки в ве́ре Правосла́вней,/ я́ко да, ми́рное житие́ благоче́стно пожи́вше,/ вку́пе с ва́ми улучи́м ве́чное Оте́чество/ в блаже́ннем Христа́ Бо́га Ца́рствии.

Кондак, глас 2

В моли́твах не усыпа́юще/ и в предста́тельствах не престаю́ще,/ Го́спода ми́лостива нам твори́те,/ святи́и, от бо́лгар просия́вшии,/ я́ко да, па́мять ва́шу пра́зднующе,/ с ра́достию сию́ твори́м,/ до втора́го Судии́ прише́ствия и всех Воскресе́ния.

Величание

Велича́ем вас,/ святи́и вси, в земли́ Бо́лгарстей просия́вшии,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.

Собор всех новоявленных мучеников Христовых, по взятии Царяграда пострадавших (после 1453) (В неделю 3-ю по Пятидесятнице)

Тропарь, глас 3

Но́вии му́ченицы,/ дре́внюю пре́лесть тве́рдым боре́нием низложи́вшии,/ вознесо́ша ве́ру правосла́вных,/ беззако́нное бо служе́ние уничижи́вше,/ дерзнове́нно Христа́ пропове́даша,/ Бо́га соверше́нна,/ и ны́не непреста́нно моля́тся/ дарова́ти нам ве́лию ми́лость.

Кондак, глас 1

Весели́ся та́инственно, Христо́ва Це́рковь,/ ви́дящи своя́ сыны́, но́выя му́ченики,/ о́крест трапе́зы твоея́ стоя́щия в моще́х,/я́ко новонасажде́ния ма́сличная,/ и Зижди́телю всех возопи́й:/ Ты му́чеников еси́, Христе́, утвержде́ние.

Величание

Велича́ем вас,/ новоявле́нии Христо́вы му́ченицы,/ по взя́тии Царягра́да пострада́вшии,/ и чтим честна́я страда́ния ва́ша,/ я́же за Христа́/ претерпе́ли есте́.

Собор всех святых земли Новгородской (В неделю 3-ю по Пятидесятнице)

Тропарь, глас 8

Я́ко всесве́тлии свети́льницы,/ яви́стеся во стране́ се́й,/ святи́телие Новгоро́дстии, преподо́бнии, и Христа́ ра́ди юро́дивии, и вси пра́веднии,/ посто́м насажде́ннии, воздержа́нием напая́еми,/ сего́ ра́ди и сподо́бистеся бы́ти прия́телище Бо́жия Ду́ха/ и чудеса́ де́йствовати,/ моли́те Христа́ Бо́га за вся лю́ди,/ спасти́ся душа́м на́шим.

Ин тропарь, глас 4

Пусты́нное житие́ возлюби́вше, преподо́бнии отцы́,/ яви́стеся Новгоро́дстей стране́, я́ко ино́е со́лнце,/ озаря́юще сию́ мо́лниями чуде́с ва́ших,/ и просвеща́ете ве́рою воспева́ющих вам:/ ра́дуйтеся, по́стников похвало́ и пра́ведных удобре́ние.

Кондак, глас 5

Преподо́бнии отцы́ и чудотво́рцы,/ уго́дницы Христо́вы,/ Новгоро́дстии свети́льницы,/ и́же а́нгельским житие́м просия́вше,/ Боже́ственных сподо́бистеся даро́в,/ Спа́су служа́ще со а́нгелом непреста́нно,/ моли́те изба́витися нам от вся́каго прегреше́ния/ и душа́м на́шим дарова́ти ве́лию милость.

Величание

Велича́ем вас,/ святи́и вси земли́ Новгоро́дския,/ и чтим святу́ю па́мять ва́шу,/ вы бо мо́лите за нас/ Христа́ Бо́га на́шего.