Русский Мисопогон. Петр I, брадобритие и десять миллионов «московитов»

В середине декабря 1763 г. Раскольническая контора была упразднена, причем в указе о передаче ее функций по управлению делами «раскольников» местным органам власти нет ни слова о другой важнейшей ее обязанности – контроле за бородачами[874]. Вместе с Раскольнической конторой ушла в прошлое и борьба с бородой в Российской империи.

Приложение № 1 [1686 г. марта 21 – 1687 г. июня 9.] – Проект постановления Освященного собора о запрещении брадобрития под угрозой отлучения от Церкви [875]

(Л. 433) ИЗГЛАШЕНИЕ великаго господина святейшаго кир Иоакима, патриарха московскаго и всеа России, и всех священнейших архиереев, и всего Священнейшаго Собора на необузданных юных брадобритие[876].

Понеже мира сего человеци не суть тверди в хранении заповедей Божиих, ниже постоянни в благонравном гражданском жителстве, наипаче же юннии удобоползовенни на прелестная мира сего, ничтоже сущая, оными же мнимая утешная, аще и противна кая закону Божию[877], того ради издревле от дней святых апостолов и по временем от бывших святых [В]селенских Синодов пастырем душ человеческих, священнейшим архиереем, яко слово о пастве воздадущым, повелеся собиратися на всякое лето и поползновения и некая пренебрежения, бываемая в человецех и гражданских жителствех между христианы, разсмотряти и исправляти, деющыя же нелепая некая (Л. 433 об.) и вводящия странная жителству и обычаю христианскому наказовати и умоляти, еже престати от таковых начинаний и умышлений, не покаряющыяся же словесным кротким и умолным учением запрещати, и церквей вход таковым возбраняти, и от прочих верных, яко согнившыя уды сущыя главы Христа Бога нашего, отлучати, и благословения и молитв архиерейския и иерейския таковым не подавати, и Божественных Таин не сподобляти. «Непокаянно же живущия, и в том умершыя, ниже по обычаю христиан православных погребения и церковнаго помяновения сподобляти»[878], – то бо есть, и не ино что, кроме того писанное в канонех святых отцев запрещение и отлучение.

Мы, святейший Иоаким, милостию Божиею патриарх царствующаго града Москвы и всея России и всего Севера, и Священный во Христе Собор: Адриан, митрополит Казанский и Болгарский[879], Пав[е]л, митрополит Сибирский и Тоболский[880], Маркел, митрополит Псковский (Л. 434) [и] Изборский[881], Варсонофий, митрополит Сарский и Подонский[882], Павел, митрополит Нижегородский и Алатарский[883], [Авраамий[884]], митрополит Белоградский и Обоянский[885], имуще волю и согласие всех преосвященнейших архиереев, братий наших и не присущих ныне зде, собравшеся в настоящем лете сем в царствующий град Москву, и, между иными некиими узрехом в людех христианских, наипаче же во юнных, проникающий еллинский блуднический гнусный обычай, древле многащи возбраняемый, и оттоле, прежде мала времене, во днех блаженныя памяти благочестивейшаго великаго государя нашего царя и великаго князя Алексиа Михайловича всея Великия и Малыя и Белыя России самодержца всесовершенно искорененный, паки ныне юнонеистовнии начаша образ, от Бога мужу дарованный, губити: израстающую им красоту мужескаго совершенства – браду – брити и творити себе ниже мужы, ниже жены, ради блуднаго, и сквернаго, и скаред[н]аго к женам рачителства и похотения, инии ради богоненавистнаго возгордения и тщеславия[886]. (Л. 434 об.) И другий еллинский же идолоугодный обычай вводимый – на главах власоращения – в пренебрегающых слово святаго апостола Павла, глаголющее: «Не самое ли естество учит вы, аще муж власы растит, безчестие ему есть: то бо слава есть и честь жены, но не мужа»[887]. Безбожнии убо еллини, привождаху дети своя на жертву идолом, долгыя власы имущыя на главах их[888].