Типикон

По 1–й кафисме седальны октоиха. По 2–й кафисме и по 3–й седален триоди. Канон праздника Богородицы, со ирмосом на 6, глас 6: и архангела на 6, глас 4. егда же приспеет трипеснец, и поем канон праздника Богородицы, и архангела, со ирмосом на 6: и трипеснец на 8. Катавасиа, ирмос триоди. По 3–й песни, седален, глас 4. Слава, и ныне, тойже: и чтение: По 6–й песни,

Кондак архангела, глас 8. Подобен: Взбранной: Пресветлыя, и честныя, и вседетельныя, пренеисчетныя и страшныя троицы, ты еси архистратиже славный служителю и молитвенниче, ныне непрестанно моли, избавитися нам от всяких бед и мук, да зовем ти: радуйся покрове рабом твоим.

По 9–й песни, светилен троичный гласа. На хвалитех стихиры архангела, на 4, глас 4. Подобен: Дал еси знамение: Слава, и ныне, праздника, глас 2: благовествует гавриил: На стиховне, триоди самогласен дне, дважды, и мученичен: Слава, и ныне, богородичен, и прочее все поем с поклоны. На трапезе же разрешение вина и елеа.

МРК Аще случится благовещение в субботу 3–ю, или 4–ю постов.

В пяток вечера, кафисмы не глаголем. На Господи воззвах стихиры на 10: триоди самогласен дне дважды, и праздника 8: Слава, и ныне, праздника, и чтения прежде дне, и праздника 5: и Да исправится молитва моя: и прочее преждесвященных. О 1–м же часе нощи поем повечерие великое, по обычаю. По 1–м трисвятом, тропарь праздника. По 2–м кондак праздника. По Слава в вышних: исхождение якоже предуказася в день постен. На Утрени, бывает служба вся праздника, ниже четверопеснец, ни ино что субботное поется, но все праздника: поем же и Славословие великое. Четверопеснец же поется в четверток, на повечерии. Такожде и На Литургии, все праздника. Пред литургиею же, во 2–й час дне, исхождение творим вне монастыря по обычаю: и возвращшеся поем литургию, и блаженна от канона праздника, песнь 3–я и 6–я.

МРК Подобает ведати, аще случится благовещение в неделю 3–ю постов.

На Велицей Вечерни, блажен муж: кафисма вся. На Господи воззвах, стихиры воскресны 3: и креста подобны 3: и праздника подобны 3, на 4. Слава, креста, глас 3: Христе Боже наш: И ныне, праздника, глас 6: Послан бысть с небесе: Таже вход, и чтений 5. На литии стихиры праздника самогласны 3, глас 1: и креста 3, писаны на хвалитех. Слава, праздника: И ныне, креста. На стиховне стихиры воскресны по алфавиту. Слава, креста: И ныне, праздника. На благословении хлебов тропарь праздника дважды, и креста единожды: и чтение в посланиих апостольских, или праздника. На Утрени, на Бог господь, тропарь воскресн гласа, дважды. Слава, креста: И ныне, праздника. По кафисмах седальны воскресны с богородичны их: и чтение во евангелии толковом. Полиелей, и седальны праздника вси по единожды. Слава, и ныне, праздника, и чтение праздника. Степенны гласа. Прокимен праздника. Всякое дыхание: и евангелие праздника. воскресение христово: псалом 50: Стихира праздника. Канон воскресн на 4: и креста на 4: и праздника на 6. Катавасиа праздника: отверзу уста моя: По 3–й песни кондак и икос креста: таже седален креста. Слава, и ныне, праздника: и чтение праздника. По 6–й песни кондак и икос праздника: и пролог. На 9–й песни поем, честнейшую: Светилен воскресн: Слава, креста: И ныне, праздника. На хвалитех стихиры воскресны 4, и праздника 3, глас 1. Подобен: небесных чинов: и самогласен, глас 2: еже от века таинство: с припевы их. Таже припев: воскресни Господи Боже мой: и поем триоди самогласен дне. Слава, тойже: И ныне: Преблагословенна еси: Славословие великое. и бывает последование крестопоклонное, по обычаю. и посем ектении, и отпуст. Слава, и ныне, стихира евангельская, и оглашение студитово, и час 1–й в притворе. На 1- м часе, тропарь воскресн. Слава, креста: И ныне, богородичен часов. По Отче наш, кондак креста, и прочая: и совершенный отпуст. Во вторый же час дне исходим вне монастыря, якоже предуказася: и возвращшеся поем часы, на нихже глаголется тропарь воскресн, и праздника, и креста, пременяюще. Такожде и кондаки. На Литургии, блаженна гласа на 4: и праздника песнь 3, на 4: и креста песнь 6–я, на 4. По входе тропарь воскресн, и креста, и праздника. Слава, кондак креста. И ныне, праздника. Вместо же трисвятаго поем: кресту твоему покланяемся владыко: Прокимен, апостол, Аллилуиа, евангелие и причастен прежде праздника, таже креста. Вместо Достойно, поем ирмос: яко одушевленному: Литургиа же великаго василиа. Такожде и во вся недели святых постов, в нихже аще праздник сей случится, бывает литургиа великаго василиа непременно.

МРК Аще случится благовещение в понедельник 4–я, или 5–я, или 6–я недели святых постов.