Том 1 (XI-XII века)

И отгнана бысть Агаръ раба съ сыномъ ее Измаиломъ, и Исаакъ, сынъ свободныа, наследникъ бысгь Аврааму, отцу своему.[34] И отгнани быша иудеи и расточени по странам, и чяда благодетьнаа христиании наследници быша Богу и Отцу.[35] Отиде бо светъ луны, солнцю въсиавъшу, тако и законъ, благодети явльшися, и студеньство нощьное погыбе, солнечьнеи теплоте землю съгревши. И уже не гърздится въ законе человечьство, нъ въ благодети пространо ходить.

Иудеи бо при свешти законнеи делааху свое оправдание, християни же при благодетьнеим солнци свое спасение зиждють. Яко иудеиство стенемь и закономъ оправдаашеся, а не спасаашеся, хрьстиани же истиною и благодатию не оправдаються, нъ спасаються.

Въ иудеихъ бо оправдание, въ христианыихъ же спасение. Яко оправдание въ семь мире есть, а спасение въ будущиимъ веце. Иудеи бо о земленыих веселяахуся, христиани же о сущиихъ на небесехъ. И тоже оправдание иудеиско скупо бе зависти ради, не бо ся простирааше въ ины языкы, нъ токмо въ Иудеи единои бе. Христианыихъ же спасение благо и щедро простираяся на вся края земленыа.[36]

Събысться благословение Манасиино на июдеихъ, Ефремово же на христьяныих. Манасиино бо стареишиньство левицею Иаковлею благословлено бысть. Ефремово же мнишьство десницею. Аще и стареи Манасии Ефрема, нъ благословлениемь Иаковлемь мнии бысть.[37] Тако иудеиство, аще прежде бе, нъ благодетию христиании больше быша.

Рекшу бо Иосифу къ Иакову: «На семь, отче, положи десницу, яко сь стареи есть», отвеща Иаковъ: «Веде, чядо, веде. И тъ будеть въ люди и възнесется, нъ братъ его мении болии его будеть, и племя его будеть въ множьство языкъ».[38]

Яко же и бысть. Законъ бо прежде бе и възнесеся въ мале, и отииде. Вера же христианьская, послежде явльшися, больши первыа бысть и расплодися на множьство языкъ. И Христова благодеть всю землю обятъ и ако вода морьскаа покры ю. И вси, ветъхая отложьше, обетъшавъшая завистию иудеискою, новая держать, по пророчьству Исаину: «Ветхая мимоидоша, и новая вамъ възвещаю; поите Богу песнь нову, и славимо есть имя его от конець земли, и съходящеи въ море, и плавающеи по нему, и острови вси».[39] И пакы: «Работающимъ ми наречется имя ново, еже благословится на земли, благословять бо Бога истиньнааго».[40]

Прежде бо бе въ Иеросалиме единомь кланятися, ныне же по всеи земли. Яко же рече Гедеонъ[41] къ Богу: «Аще рукою моею спасаеши Израиля, да будеть роса на руне токмо, по всеи же земли суша».[42] И бысть тако. По всеи бо земли суша бе прежде, идольстеи льсти языкы одержашти и росы благодетьныа не приемлющемь. Въ Иудеи бо тъкмо знаемь бе Богъ, и «въ Израили велие имя его»,[43] и въ Иеросалиме единомь славемь бе Богъ.

Рече же пакы Гедеонъ къ Богу: «Да будеть суша на руне токмо, по всеи же земли роса».[44] И бысть тако. Иудеиство бо преста и законъ отиде, жертвы неприатны, кивотъ[45] и скрижали, и оцестило[46] отъято бысть. По всеи же земли роса, по всеи бо земли вера простреся, дождь благодетныи оброси, купель пакыпорождениа сыны своа въ нетление облачить.

Яко же и къ самаряныни глаголааше Спасъ, яко грядеть година, и ныне есть, егда ни во горе сеи, ни въ Иеросалимехъ поклонятся Отцу, но будуть истиннии поклонници, иже поклонятся Отцу духомь и истиною, ибо Отец тацехъ ищеть кланяющихся ему,[47] рекше съ Сыномъ и съ Святыим Духомъ, — яко же и есть. По всеи земли уже славится Святаа Троица и покланяние приемлеть от всеа твари, малии, велиции славять Бога, по пророчьству; «И не научить кождо искреняго своего и человекъ брата своего, глаголя «познаи Господа», яко уведять мя от малыих до великааго».[48] Яко же и Спасъ Христос къ Отцу глаголааше: «Исповедаю ти ся, Отче, Господеви небеси и земли, яко утаилъ еси от премудрыихъ и разумныихъ и открылъ еси младенцемь, еи, Отче, яко тако бысть благоизволение пред тобою».[49]

И толма помилова благыи Богъ человечьскыи род, яко и человеци плотьнии крещениемь и благыими делы сынове Богу и причастници Христу[50] бывають. Елико бо рече евангелистъ: «Прияша его, дасть имъ власть чядомъ Божиемъ быти, веру яштиимъ въ имя его, иже не отъ кръве ни отъ похоти плотьскы, ни отъ похоти мужескы, нъ отъ Бога родишася»,[51] Святыимь Духъмъ въ святеи купели.

Вся же си Богъ нашь на небеси и на земли елико въсхоте, и сътвори.[52] Темже къто не прославить, къто не похвалить, къто не поклониться величьству славы его и къто не подивиться бесчисльному человеколюбию его.

Прежде векъ от Отца рожденъ, единъ състоленъ Отцу, единосущенъ, яко же солнцу светъ, съниде на землю, посети людии своих, не отлучивъся Отца, и въплотися отъ Девице чисты, безмужны и бесквернены, въшедъ, яко же самъ весть. Плоть приимъ, изиде, яко же и въниде.

Един сыи от Троице въ две естьстве: Божество и человечьство, исполнь человекъ по въчеловечению, а не привидениемь, нъ исполнь Богъ по божеству, а не простъ человекъ показавыи на земли божьскаа и человечьскаа: