Том 11 (XVI век, сочинения Ивана Грозного и Андрея Курбского)

Богъ нашъ Троица, иже прежде векъ сый и ныне есть, Отецъ и Сынъ и Святый Духъ, ниже начала имеетъ, ниже конца, о немже живемъ и движемся, имже царие величаются и силнии пишут правду, иже дана бысть единороднаго слова Божия Исусъ Христомъ, Богомъ нашимъ, победоносная хоруговь — крестъ честный, и николи же победима есть, первому во благочестии царю Констянтину[44] и всемъ православнымъ царемъ и содержителемъ православия. Понеже смотрения Божия слова всюду исполняшеся, и божественнымъ слугамъ Божия слова всю вселенную, яко же орли летаниемъ, обтекше, даже искра благочестия доиде и до Росийскаго царствия. Сего убо православия истиннаго Росийскаго царствия самодержавство Божиимъ изволениемъ поченъ от великого князя Владимира, просветившаго Рускую землю святымъ крещениемъ, и великого князя Владимира Мономаха, иже от грекъ высокодостойнейшую честь приимшу,[45] и храбраго великого государя Александра Невского, иже над безбожными немцы велию победу показавшаго, и хваламъ достойнаго великого государя Димитрия,[46] иже за Дономъ над безбожными агаряны велию победу показавшаго, даже и до мстителя неправдамъ, деда нашего, великого государя Иоанна, и закосненнымъ прародителствия землямъ обретателя, блаженыя памяти отца нашего великого государя Василия, даже доиде и до насъ, смиренныхъ, скипетромдержания Росийского царствия. Мы же хвалимъ Бога за премногую его милость, произшедшую на насъ, еже не попусти доселе десницъ нашихъ единоплеменною кровию обагритися, понеже не восхотехомъ ни под кимъ же царства, но Божиимъ изволениемъ и прародителей своих и родителей благословениемъ, яко же родихомся в царствии, тако и воспитахомся и возрастохомъ и воцарихомся Божиимъ велениемъ, и прародителей своих и родителей благословениемъ свое взяхомъ, а чюжаго не восхотехомъ. Сего православнаго истиннаго християнского самодержавства, многими владычествы владеющаго, повеления, нашъ же християнский смиренный ответъ бывшему прежде православнаго истинного християнства и нашего самодержания боярину и советнику и воеводе, ныне же крестопреступнику честнаго и животворящаго креста Господня, и губителю хрестиянскому, и ко врагомъ християнскимъ слагателю, отступшему божественнаго иконнаго поклонения и поправшему вся священная повеления, и святые храмы разорившему, осквернившему и поправшему священныя сосуды и образы, яко же Исавръ, Гноетезный, Арменинъ,[47] и симъ всимъ соединителю, — князю Андрею Михайловичю Курбскому, восхотевшему своимъ изменнымъ обычаемъ быти ярославскому владыце,[48] ведомо да есть.

Почто, о княже, аще мнишися благочестие имети, единородную свою душу отверглъ еси? Что же даси на ней измену в день Страшнаго суда? Аще и весь миръ приобрящеши, последи смерть всяко восхититъ тя; чесо ради на теле душу предалъ еси, аще убоялся еси смерти, по своихъ бесоизвыкшихъ друзей и назирателей ложному ихъ слову? И всюду, яко же беси на весь миръ, тако же и ваши изволившия быти друзи и служебники,[49] насъ же отвергшеся, преступивше крестное целование, бесовъ подражающе, на насъ многоразличными виды всюду сети поляцающе и бесовскимъ обычаемъ насъ всячески назирающе, блюдуще глаголания и хождения, мняще насъ аки безплотныхъ быти,[50] и от сего многая сшивающе на насъ поношения и укоризны, и во весь миръ позорующихъ и к вамъ приносяще. Вы же имъ воздарие многое за сие злодейство даровали есте нашею же землею и казною, называючи ихъ ложно слугами; и ото сихъ бесовскихъ слуховъ наполнилися есте на мя ярости, яко же ехидна смертоносна, возъярився на мя и душу свою погубивъ, и на церковное разорение стали есте. Не мни праведно быти: возъярився на человека и Богу приразитися; ино бо человеческо есть, аще перфиру носитъ, ино же Божествено есть. Или мниши, окаянне, како уберечися того? Никако же! Аще ти с ними воеватися, тогда ти и церкви разоряти, и иконы попирати и крестияны погубляти; аще и руками где не дерзнеши, но мыслию яда своего смертоноснаго много сия злобы сотвориши.

Помысли же, како браннымъ пришествиемъ мяхкая младенческая удеса конскими ногами стираема и разтерзаема! Егда убо зиме належащи, сия наипаче злоба совершается. И сие убо твое злобесное изменное собацкое умышление како не уподобится Иродовому злому неистовству, еже во младенцехъ убийство показа? Сие ли убо мниши быти благочестие, еже сицевая творити злая? Аще ли же насъ глаголеши воюющихъ на кристьянъ, еже на германы и литаоны[51] — ино несть сие, несть. Аще бы и кристияне были в техъ странахъ, и мы воюемъ по прародителей своихъ обычаю, яко же и прежде сего многажды случилося; ныне же вемы, в техъ странахъ несть християнъ,[52] разве малейшихъ служителей церковныхъ и сокровенныхъ рабъ Господнихъ. К сему убо и литовская брань учинилася вашею изменою и недоброхотствомъ и нерадениемъ[53] безсоветнымъ.