Том 11 (XVI век, сочинения Ивана Грозного и Андрея Курбского)

Ты же тела ради душу погубилъ еси, и славы ради мимотекущия нетленную славу презрелъ еси, и на человека возъярився, на Бога возсталъ еси. Разумей же, бедникъ, от каковыя высоты и в какову пропасть душею и теломъ сшелъ еси! Збысться на тебе реченное: «Иже имея мнится, взято будетъ от него».[54] Се твое благочестие, еже самолюбия ради погубилъ ся еси, а не Бога ради? Могутъ же разумети и тамо сущии и разумъ имуще твой злобный ядъ, яко славы ради сея маловременныя жизни скоротекущаго веку и богатства ради сие сотворилъ еси, а не от смерти бегая. Аще праведенъ и благочестивъ еси, по твоему глаголу, почто убоялся еси неповинныя смерти,[55] еже несть смерть, но приобретение? Последи же всяко умрети же. Аще ли же убоялся еси ложнаго на тя отречения смертнаго, по твоихъ друзей, сотонинскихъ слугъ, злодейственному солганию, се убо явно есть ваше изменное умышление от начала и до ныне. Почто же апостола Павла презрелъ еси, якоже рече: «Всяка душа владыкамъ превладеющимъ да повинуется; никоя же бо владычества, яже не от Бога, учиненна суть: темъ же противляяйся власти Божию повелению противится».[56] Смотри же сего и разумей, яко противляяйся власти Богу противится; аще убо кто Богу противится, — сей отступник именуется, еже убо горчайшее согрешение. Сие же убо реченно бысть о всякой власти, еже убо кровми и бранми приемлюще власти. Разумей же реченное, яко не восхищениемъ прияхомъ царство; темъ же наипаче противляяйся власти Богу противится. Тако же и апостолъ Павелъ рече, ты же и сия словеса презрелъ еси: «Раби, послушайте господий своихъ, не перед очима точию работающе, яко человекомъ угодницы, но яко Богу, и не токмо благимъ, но и строптивымъ, не токмо за гневъ, но и за совесть».[57] Се бо есть воля Господня, еже благое творяще пострадати.[58] И аще праведенъ еси и благочестивъ, про что не изволилъ еси от мене, строптиваго владыки, страдати и венецъ жизни наследити?

Но ради привременныя славы, и самолюбия, и сладости мира сего все свое благочестие душевное со крестиянскою верою и з закономъ попралъ еси, уподобился еси семени, падающему на камени и возрастшему;[59] возсиявшу же солнцу со зноемъ, абие словесе ради ложнаго соблазнился еси, и отпалъ еси и плода не сотворилъ еси; и по ложныхъ словесехъ убо, подобно на пути падающему семени, сотворилъ еси, еже убо всеявше слово к Богу веру истинну и к намъ прямую службу — сие убо врагъ все из сердца твоего изхитилъ есть и сотворилъ в своей воли ходити. Темъ же и вся Божественная Писания исповедуютъ, яко не повелеваютъ чадомъ отцемъ противитися, а рабомъ господиямъ кроме веры. Аще убо сие от отца твоего, диявола, восприимъ, много ложными словесы своеми сплетаеши, яко веры ради избежалъ еси — и сего ради живъ Господь Богъ мой, и жива душа моя,[60] — яко не токмо ты, но и все твои согласники, бесовские служители, не могутъ в насъ сего обрести. Паче же уповаемъ, Божия слова воплощениемъ и пречистыя его матери, заступницы христианския милостию и всехъ святыхъ молитвами, не токмо тебе сему ответъ дати, но и противу поправшихъ святыя иконы, и всю християнскую божественную тайну отвергшимъ, и Бога отступльшимъ (к нимъ же ты любителне совокупился еси), словесъ сихъ нечестие изобличити и благочестие явити и воспроповедати, яко же благодать возсия.

Како же не устрамишися раба своего Васки Шибанова?[61] Еже убо онъ свое благочестие соблюде, пред царемъ и пред всемъ народомъ, при смертныхъ вратехъ стоя, и крестнаго ради целования тебе не отвержеся и похваляяся всячески, умрети за тебе тщашеся. Ты же убо сего благочестию не поревновалъ еси: единаго ради малаго слова гневна не токмо свою едину душу, но и своихъ прародителей души погубилъ еси, понеже Божиимъ изволениемъ деду нашему, великому государю, Богъ ихъ поручилъ в работу, и они, давъ свои души, и до своей смерти служили, и вамъ, своимъ детямъ, приказали служити деда нашего детямъ и внучатомъ. И ты то все забылъ еси, собацкимъ изменнымъ обычаемъ преступивъ крестное целование, ко врагомъ християнскимъ соединился еси; и к тому, своея злобы не разсмотря, сицевыми скудоумными глаголы, яко на небо камениемъ меща, нелепая глаголеши, и раба своего благочестия не стыдишися, и подобная тому сотворити своему владыце отвергся еси.