Том 11 (XVI век, сочинения Ивана Грозного и Андрея Курбского)

Речеши ли убо, яко едино слово обращая пишу? Понеже бо есть вина и главизна всемъ деломъ вашего злобеснаго умышления, понеже с попомъ положисте советъ, дабы азъ словомъ былъ государь, а вы б с попомъ деломъ. Сего ради вся сия случишася, понеже и доныне не престаете, умышляюще советы злыя. Воспомяни же, егда Богъ извождаше Израиля из работы, егда убо священника постави владети людми, или многихъ рядниковъ? Но единого Моисея, яко царя, постави владателя над ними; священствовати же ему не повеленно, Аарону, брату его, повеле священствовати,[78] людскаго же строения ничего не творити; егда же Ааронъ сотвори людскии строи, тогда от Господа люди отведе. Смотри же сего, яко не подобаетъ священникомъ царская творити. (...)

Смотри же убо се и разумей, како управление составляется в разныхъ началехъ и властехъ, понеже убо тамо быша царие послушны епархомъ и синклитомъ, и в какову погибель приидоша. Сия ли убо и намъ советуеши, еже к таковей погибели приити? И сие ли убо благочестие, еже не строити царства, и злодейственныхъ человекъ не взустити, и к разорению иноплеменныхъ подати? Или речеши ми, яко святителская поучения тамо приимаху? Ей благо и прикладно! Но ино убо еже свою душу спасати, ино же многими душами и телесы пещися; ино убо есть постническое пребывание, ино же во общемъ житии сожитие, ино же святителская власть, ино царско правление. Постническое пребывание подобно агньцу, непротивну никому же, или яко птице, иже ни сеявшу, ни жнущу, ни в житницу собирающу; во общемъ убо житии, аще и мира отрекшимся, но обаче строения и попечения имеютъ, тако же и наказание, аще ли сего невнимателни будутъ, то общее житие разорится; святителская же власть требуетъ зелнаго запрещения языкомъ по благословней же вине и ярости, славы и чести и украшения, и председания, еже инокомъ неприлично; царскому же правлению — страха, и запрещения, и обуздания, и конечнейшаго запрещения по безумию злейшихъ человекъ лукавыхъ. Се убо разумей разньство постничеству, и общежителству, и святителству, и царству. И аще убо царю се прилично, иже биющему в ланиту обратити другую? Се убо совершеннейшая заповедь. Како же управити, аще самъ без чести будетъ? Святителемъ же сие прилично. По сему разумей разньства святителству с царствомъ. Обрящеши же много и во отрекшихся мира наказания, аще и не смертию, но зело тяжкая наказания. Колми же паче въ царствие подобаетъ наказанию злодейственнымъ человекомъ быти!

Тако же убо и ваше хотение, еже вамъ на градехъ и на властехъ совладети, идеже быти, не подобаетъ. И что от сего случишася в Руси, егда быша в коемждо граде градоначалницы и местоблюстители[79] и какова разорения быша, от сего самъ своима беззаконныма очима видалъ еси, от сего можеши разумети, что сие есть. (...)

Како же убо изменниковъ сихъ доброхотными наречеши? Якоже убо во Израили случися с Авимелехомъ оженимыя Гедеоновы, сиречь наложницы, лжею согласившеся, и лесть сокрывше, во единъ же день избиша семдесятъ сыновъ Гедеоновыхъ,[80] еже убо от законныхъ женъ ему, и воцариша Авемелеха, тако же убо и вы, собацкимъ своимъ изменнымъ злымъ обычаемъ, похотесте в царствии царей достойныхъ истребити, да аще и не от наложницы, но от царствия разстоящеся колена и хотесте воцарити. И се ли убо доброхотны есте и души за мя полагаете, еже, подобно Ироду, ссущаго млеко младенца моего смертию пагубною хотесте света сего лишити, чюжаго же царя в царство ввести? Се ли за мя душу полагаете и доброхотствуете? И тако ли убо своимъ чадомъ хощете сотворити, егда убо въ яйца место подадите скорпию или в рыбы место камень?[81] Аще бо вы злы суще умеете даяния благая даяти чадомъ вашимъ, и аще убо доброхотны и благи наречетеся, — почто убо такихъ благихъ даяний не приносите чадомъ нашимъ, якоже своимъ? Но понеже убо извыкосте от прародителей своихъ измену учинити: якоже дедъ твой, князь Михайло Карамышъ, со княземъ Андреемъ Углецкимъ[82] на деда нашего, великого государя Иванна, умышлял изменныи обычаи, тако же отецъ твой, князь Михайло, с великимъ княземъ Дмитриемъ внукомъ[83] на отца нашего, блаженныя памяти великого государя Василия, многия пагубы и смерти умышлялъ, тако же и матери твоей деды,[84] Василей да Иванъ Тучки, многая поносная и укоризненная словеса деду нашему, великому государю Ивану, износили; такоже и дедъ твой, Михайло Тучковъ, на преставление матери нашея, великие царицы Елены, про нее дьяку нашему Елизару Цыплятеву многая надменная словеса изрече; и понеже еси порождение изчадья ехиднова, посему такой ядъ отрыгаеши. Се убо доволно указахъ ти, чесо убо ради по твоему злобесному разуму «супротивнымъ обретаяся разумевая», и «разумевая совесть прокаженну имуще», не мни, яже никакого от державы моея несть. А отцу твоему, князю Михайлу, гонения было много, да и убожества, а измены такой не учинилъ, яко же ты, собака.