Том 11 (XVI век, сочинения Ивана Грозного и Андрея Курбского)

ОРИГИНАЛ

ПОВЕСТЬ КРАТКА О СИМИОНЕ МЕТОФРАСТЕ, ЧЕГО РАДИ ГЛАГОЛЮТСЯ МНОГИЕ СЛОВЕСА И ПОВЕСТИ, АЩЕ НЕ ОНАГО НАПИСАНЫ, «В СИМИОНЕ МЕТОФРАСТЕ»

Не потреба было о том славном мужу воспоминати и изъявляти, егоже востокъ и запад ведает и почитает. Восточные, глаголю, церкви все, яже под 4 патриярхи, западные же, яже под папою римъскимъ. Но глубокаго ради варварства и неискуства языка нашаго, или, свойственнейше рещи, безпамятия ради и неведания, яже от лености человеком приключаются — не неполезно, мню, мало изъявити о том блаженном Симионе Метофрасте, што он во свои времена церкве Божии полезность принес, яко от еретическихъ замышлений обронил, — яко о нем свидетельствует мужъ ученый Псел, житие его риторски прекрасне пишуще. Но мы дерзнухом правити вкратце вашей любви, яже слышахомъ и навыкохомъ о нем.

Егда дьявол, супостат рода человеческаго, истощил тулы свои, стреляюще на церковь различными ересьми, и испразнилъ мехи, сеюще плевелы между чистою пшеницею (обличенны бо быша умышление его и стаинниковъ его на великих соборех нашими великими церковными учительми) — заградишася и затканны быша уста еретические. И благодатию Божиею преукрасилась церковь Христа, Бога нашаго, и провозсияла паче солнца во всей вселенной о пресущественном и трисианном Божестве феология, и проповедано ясное правоверие о вочеловечению Христове. И не токмо о техъ, но и о всех догматех церковных истинные правила и законоположение написашася прежреченными великими святыми, понеже помагаша им животворящаго Параклита сила. Яко сам Господ рече: «Не вы будете глаголюще, но Духъ Отца вашего будет глаголати в васъ».[1301]

Онже презлый дракон, или змий превеликий, видевъ собя побежденна и отогнанна со стаинники, или с помочниками своими, сиреч, со различными еретиками, — что начинает и что з безчисленныя и презлыя зависти исполненый замышляет? И по смерти их презлою завистию своею движет, хитролесными злокозньствы славу святых попрати хотяще, здес на церковь находит, аки бы мирная и полезная приносити хотяша, и под сладким медом яд сокрывати тщится, яко в Давыде речено о нем: «Благо же, благо же душамъ вашимъ будет!»[1302] Еретиковъ, паче же манентовы ереси,[1303] род подходит и научает, яже во всехъ скверных догматех своих сносудно и мечтателно пишут и глаголютъ, аки бы то похваляюще Христа и святых его, а все ложное и развращенна, на наругание церковное действует ими. Ктому и мужей, тщеславия и сребролюбия исполненыхъ, подходитъ, яже жалают корыстоватися благочестием, и поучает их преподобных жития и подвига (сый, иже в животе их непримирительные брани имелъ ажь до смерти их!), такоже и мученические борения и подвиги, на нихже мучителей научал различными муками, да крепость ума их во Христове вере преломит. Егда же еще зрит и прежде воскресения и суда Христова о небесных и земных прославляемых и преудивляемых ихъ, и человековъ верных во всехъ ревнующих, и подобящихся им, — тогда оных прежреченных, яко рехом, научает преизлишне хвалити преподобных, такоже и о мучениках ложные и развращенные, мечтанию и сном подобные, писати и замышляти. Тако в некоторых церквах насеял развращенных словес и повестей множество. А сие все творятъ того ради, иже техъ ради ложных и праведным, и истинным не было верено. Сие древле и при Моисеи сотворил: егда чудодействовал пророк пред царем во Египте за повелением Господним, он же Аньния и Мамврия[1304] с ложными чудесы подвиг. Сие и при других пророцех поставлял, всескверный, сие и при святых апостолех чрез Симона-волхва,[1305] противящася Богу и помрачающе ложными волхвовании и мечтании истинные чюдодействия и силы.

Видев же церковные епископы наши, паче же искусные и ученые, сих развращенных словес безчисленное множество во церквах Божиих насеяно, потщашася со усердием, како бы последние таковые дьяволи превелы от церкви отогнати и истребити, а вместо техъ церковь Христову праведными и истинными преукрасити и ублаголепити. И заповедают со цесарским повелением все четыре великие архиепископи, и посылает посълания от своих патриаршеских престолов во всю вселенную, заповедующа, яко Словеса все на владычни праздники, и богородичны, и апостолские, тако и мученические, и преподобных подвиги и жития да отовсюду принесутся в Константинов град. И избирают соборне онаго прежреченнаго, преученнейшаго в жителстве и в добрых нравех просвещеннаго благороднаго мужа, на негоже в то время во всей вселенной не обрестеся добрейшъ и искуснейшъ, подвижут же сего и молят соборне на сие достохвалное дело: да прочтет, искусит вся сия, и еже согласные апостолом и пророком, истинным отцем, сия да приимет и церкви Христове в похвалу да возложитъ, разврещенные же да отложит.