Том 11 (XVI век, сочинения Ивана Грозного и Андрея Курбского)

Аще пророцы плакали и рыдали о граде Ерусалиме и о церкве преукрашеной, от каменей прекраснейшей созданной, и о сущих, живущих в нем, погибающих,[274] како не достоит нам зело восплакати о разорению града Бога живаго, или церкви твоей телесной, юже создал Господь, а не человекъ. В нейже некогда Духъ Святый пребывал,[275] яже по прехвальном покаянию была вычищена и чистыми слезами измыта, от неяже чистая молитва, яко благоуханное миро или фимияна, ко престолу Господню возходила;[276] в нейже, яко на твердом основанию правоверные веры, благочестивые дела созидашася, и царская душа в той церкви, яко голубица крылы посребренными, между же рамия ея блисталася, пречистейши и пресветлейше злата,[277] благодатию Духа Святого преукрашенна делами укрепления ради и освящения тела Христова и надражайшие его крови, еюже нас откупил от работы дияволи! Се такова твоя прежде бывала церковь телесная! А за тем того ради все добрые последовали хоругвям крестоносным християнским. Языцы различные варварские не токмо со грады, но и со целыми царствы их покоряхуся тобе,[278] и пред полками християнскими архангел хранитель хождаше со ополчением его, «осеняюще и заступающе окрестъ боящихся Бога»,[279] по положению пределов языка нашего, яко реклъ святый пророк Моисей,[280] врагов же устрашающе и низлагающе супостатов. Тогда было, тогда глаголю, егда со избранными мужи избранен бывал еси, и со преподобными преподобен, и со неповинными неповинен, яко рече блаженный Давидъ,[281] и животворящаго креста сила помогаше ти и воинству твоему.

Егда же развращенныи и прелукавыи развратиша тя, сопротив обрелся еси и по таковом покоянию возвратился еси на первую блевотину[282] за советом и думою любимых твоих ласкателей, егда церковь твою телесную осквернили различными нечистотами, ноипаче же пятоградные гнусности пропастию[283] и иными бесчисленными и неизреченными злодействы напроказили, имиже всегубитель нашъ, диявол, род человеческий издавна гнусен творит и мерзок перед Богом и во последнюю погибель вревает, яко ныне и твоему величеству от него случилося: вместо избранных и преподобных мужей, правду ти глаголющих, не стыдяся,[284] прескверных паразитовъ[285] и маньяков поднес тобе; вместо крепких стратигов и стратилатов — прегнусодейных и богомерзких Бельских с товарыщи[286] и вместо храбраго воинства — кромешников, или опришнинцов кровоядных,[287] тмы тмами горших, нежели палачей; вместо богодухновенных книг и молитвъ священных, имиже душа твоя безсмертная наслаждалася и слухи твои царские освящалися, — скоморохов со различными дудами и богоненавистными бесовскими песнми,[288] ко осквернению и затворению слуха входу ко феологии;[289] вместо блаженнаго оного презвитера, яже тя был примирил ко Богу покаянием чистым,[290] и других советников, духовно часто беседующих с тобою,[291] яко нам зде поведают, не вем, есть ли правда — чаровников и волхвов от далечайших стран собираешь, пытающе их о счастливых днях,[292] яко скверный и богомерский Саул творил, оставя пророков Божиих, ко матропе или ко фотунисе, жене чаровнице, притекалъ, пытающе ея о сражению настоящем, яже ему похотения его мечтанием бесовским Самуила пророка, аки воставшаго от мертвых, в мечте показала, яко о том толкует светле святый Августын во своих книгах.[293] А што же тому за конец случился? Сие сам добре вешь. Погибель ему и дому его царскому, яко и блаженный Давидъ рече: «Не пребудут долго пред Богом, которые созидают престолъ беззакония»,[294] сииречь трудные повеления, или декреты, неудобь терпимыи.

И аще погибают царие или властели, яже созидают трудные декреты и неудобь подъемлемые номоканоны, а кольми паче не токмо созидающе неудобь подъемлемые повеления или уставы з домы погибнути должны, но во яковых сии обрящутся, яже пустошат землю свою и губят подручных всеродне, ни сосущих младенцов не щадяще, за нихже должни суть властели, кождый за подручных своих, кровь свою против врагов изливати, и девиц, глаголют, чистых четы собирающе, за собою их подводами волочаще и нещадно чистоту их разтлевающе,[295] не удовлився уже своими пятма или шестма женами![296] Еще к тому на неисповедимое ко слышанию ужастное разтление выдавающе их чистоту. О беда! О горе! В каковую пропасть глубочайшую диявол, супостат нашъ, самовластие и волю нашу низвлачит и вревает!

Еще другие и другие, яко нам зде от твоея земли приходящие поведают, тмы тмами крат гнуснейшие и богомерские, оставляю писати, ово сокращения ради писанейца сего, ово ждуще суда Христова, и, положа персты на уста, преудивляюся зело и плачю сего ради.