Том 11 (XVI век, сочинения Ивана Грозного и Андрея Курбского)

А твоего величества лютость ни единаго Непотияна и прочих дву неповинных,[261] но бесчисленных воевод и стратилатовъ благородныхъ[262] и великихъ в роде, и пресветлых в делесех и в разуме, и в военных вещах искусившихся от самые юности своея, и в полкоустроениях, и свидетельствованных сущих мужей, еже бываетъ наилепшее и наикрепчайшее в борениях ко преодолениям супостатов, различными смертми разтерзал еси и всеродне погубил без суда и без права,[263] приклонивши ухо единой стране, сииречь презлым ласкателемъ, пагубником отечества. И бывша в таковых сквернах и кровопролитиях, посылаешь в чюждую землю армату великую християнскую под чюждыи грады без ыскусных и свидетельствованных стратилатов, и к тому отнюдъ не имущихъ мудраго и храбраго простатора, или гетмана великаго, что бывает в войске паче всего погибельнейшее и поветреннейшее, сииречь вкратце рещи: без людей, с овцами или з зайцы, не имущими добраго пастыря, которые от ветру листу веющаго боятся, яко и во первой моей епистолии воспомянухом о каликах твоих,[264] ихже воеводишками усильствуешъ безстыдне творити вместо оных предреченных храбрых и нарочитых мужей, избиеных и разогнаных от тобя.

А ныне к тому приложил еси и другую срамоту прародителемъ своимъ, сромотнейшую и тысяща крат беднейшую: град великий Полоцк со всею целою церковью, сииречь со епископомъ и клирики, и воинством, и с народы предал еси, пред обличием твоим, егоже был достал еси персми своими, уже не глаголю, тешечи тебе, нашими верными службами и многими труды, бо еще тогда не всехъ был еси до конца погубил и розогнал, егда Полоцка досталъ былъ еси.[265] Собравшися со всемъ твоим воинством, за лесы забившися, яко един хороняка и бегунъ, трепещешъ и исчезаешъ;[266] никому же гонящу тя, токмо совесть твоя внутрь вопиюще на тя, обличающе за прескверные твои дела и бесчисленные крове. Только ти негли остовает сваритися, яко рабе пьяной, а что воистинну сану царскому належит или достоит, сииречь суд праведный и оборона, се уже подобно изчезла за молитвою и советом прелукавые четы осифлянския Васьяна Топоркова, яже ти советовал и шептал во ухо не держати мудрейшие рады при собе,[267] и других таковых советников твоих вселукавых мнихов и мирских. Се славу таковую от них получил еси! И светлую победу изообрели тобе, яко пророчествовал Костянтину Великому святый Николае за трех мужей[268] и тобе множество блаженный Селивестръ, исповедникъ твой, казняще тя и наказующе о непреподобных твоих делех и прелукавых нравех, на нь же и по смерти непримирительне враждуешь! Або не читал еси во Исайе пророце лежащаго: «Лутчи, — рече, — лоза или жезлъ приятеля, нежели ласкательные целования вражии?».[269]

Помяни первые дни и возвратися. Поки[270] нагою главою безстудствуешь сопротив Господа твоего? Або еще не час[271] образумитися, и покаятися, и возвратитися ко Христу? Поки еще есмя не распряглися от тела, понеже несть во смерти поминания и во аде исповедания или покаяния всяко. Мудръ бывал еси, и, мню, ведаешь о тричасном души, како порабощаются смертные части безсмертной. Аще ли же не ведаешь, и ты научися у мудрейших, и покори, и поработи зверскую часть Божию образу и подобию: все бо от века такъ спасаютца, покаряюще хуждшее[272] лутчему.

А еже от преизлишнаго надмения и гордости, мнящеся о собе мудръ и всея вселенныя учитель быти, пишеши до чюждие земли и до чюждых слуг, аки научающе ихъ и наказующе, яже паче зде смеюттися о семъ и наругаются. (...)

Писано во преславном граде Полоцку государя нашего светлого кроля Стефана, паче же преславна суща в богатырских вещах, во третий день по взятию града.[273]

Андрей Курбский, княжа на Ковлю.