Том 14 (Конец XVI - начало XVII века, подступы к решительным переменам)

Бога ради, государи, моляще его, Всемилостиваго Бога, и Пречистую его Матерь, заступницу нашу, и молебницу, и помощницу всему роду нашему християньскому, и великих чюдотворцов, иже у нас в Троице[253] преименитых, и всехъ святыхъ, не нерадите о себе! Вооружимся на общих сопостат нашихъ и враговъ и постоимъ вкупе крепостне за православную веру, и за святыя Божия церкви, и за свои души, и за свое отечество, и за достояние, еже намъ Господь далъ, и изберем славную смерть! Аще и будет намъ то, и по смерти обрящем Царство Небесное и вечное, нежели зде — безчестное, и позорное, и горкое житие под руками враг своихъ.

Поревнуемъ и подивимся великому оному нашему граду Смоленьску, его же стояние к Западу, како в немъ наша же братия, православныя християне, сидятъ, и великую всякую скорбь и тесноту трпятъ, и стаят крепце за православную веру, и за святые Божия церкви, и за свои души, и за всехъ за нас, а общему нашему сопостату и врагу, королю, не покорятся и не здадутся. Сами ведаете, с коего времяни сидятъ и всякое великое утеснение терпятъ, и ни на которую меру не поползнутся и никакову ихъ вражию прелесть и на обещание не прельстятся, что имъ обещеваетъ и самъ нашь сопостат. И вси стоятъ единодушьно, и непреклонно, и неподвижно умомъ и душею на ихъ прелестное ложное обещание. И душь своих не потопят и во веки ими погибнути не хотят, а хотят славне умрети, нежели безчестне и горко жити. И каково мужество показали и какову славу и похвалу учинили во все наше Росийское государьство! Да не токмо в нашу во всю пресловущую землю, но и во иншия орды, в Литовскую, и Польскую, и во иные многие; чаят, и до Рима, или будет и дале паки же, ту славу и хвалу пустили, якоже и у насъ. Да и самого того короля, лютаго врага, сопостата нашего, и его способниковъ (таких же безбожниковъ, яко же и онъ, которыя с нимъ тамо, подо онымъ градомъ стоятъ и градъ тый, аки злыя волки, похитити хотятъ, и которые у нас зде, в великом нашем граде,[254] живутъ, и на сердцах нашихъ стоятъ и, аки лютыя лвы, всегда поглатити насъ хотят), и Сотворителя нас всех еще удивили. И ужасали еще и до самого ихъ злокозненаго и злоестественаго сердца имъ досадили, понеже у нихъ многихъ доброхотных ихъ, а нашихъ враговъ, перерубили, и перегубили, и позорныя смерти многимъ давали, да и ныне Божиею помощию всегда ихъ, враговъ, губятъ и зелне им грубятъ. Чаемъ, яко и малым детемъ слышавше, дивитися той ихъ, гражанъ, храбрости, и крепости, и великодушию, и непреклонному уму.

Аще будет ихъ до конца Богъ тако укрепит, яко же ныне, и учинят таковое свое крепкое стояние и великое скорбное терпение за православную веру, и за святыя Божия церкви, и за себя, и за всехъ за насъ, и усидятъ, и тою своею крепостию все царство удержатъ от лютаго нашего сопостата, по коихъ местъ, самъ Господь весть и, неизреченными своими судбами, невидимо великую свою милость подастъ всему нашему Великому государьству, и избавитъ нас всехъ от толиких неудобносимых бедъ, и изметъ нас из рукъ тех враговъ наших, аки агнецов изо устъ волчиихъ. Тогда кто готовъ будетъ изрещи ту ихъ доблесть и крепость?! Тогда и паки достоит дерзостно рещи, что такоже не в свою едину землю, но и во иныя многия орды: до Царяграда, и до Рима, и до Иерусалима, и к самому востоку же, и западу, к северу и югу славе той проити: «Во оном царстве самъ той град спасеся, и иных спасе, и сопостата и врага-короля попра и прогна, и все свое Великое государство удержа». Аще бы таких крепкостоятелных и поборательныхъ по вере градовъ в Росийскомъ государстве хотя и немного было, не токмо что все, никако же бы темъ нашимъ врагомъ и злым волкомъ было в нашу землю входно, отнюдь, просто рещи, — и повадно.