Том 18 (XVII век, силлабическая поэзия)

Ирод

на престоле седяй глаголет

Непреодоленныи мужие и мудри,
В бранех, советех, словех ваших богомудри,
Державы моей столпы непоколебимы,
Дражайшие бисеры моей диадимы!
Четверовластный скипетр[1785] под солнцем сияет,
Егоже ваша храбрость в мире распространяет.
Десница ваша мою умножает славу,
Яко никогда кому преклоняю главу.
Сердца ваша моему сердцу сопряженный
Так в мире, яко егда на брань воруженныи.
Сего ради сердце ми радуется зело,
Яко вас еднодушных себе приобрело.
Но яко любове вашой возблагодарствую?
Киим вас саном и мздою за то ударствую[1786]?
На коем кедре вашу начертаю славу?
Коим дафном[1787] премудру венчаю вам главу?
Кто санов, кто богатства от мене желает,
Обогащу и почту, токмо да вещает.

Сенатор 1

Четверовластны земли юдской[1788] господине!
Светило очес наших ты еси едине;
Мзда наша и богатство, наша то и слава,
Егда благополучна видим тя и здрава.
Довлеет нам любов ти, иже нас, нижайших,
Насыщаешь монарших словес ти сладчайших.

Сенатор 2

Добре некто от мудрецов сице поведает,
Яко кротость то творит, что сила не знает.
Влагаешь на нас узы сладкиа, монархо!
Владей убо, здравствуй, крепчайший тетрархо!
Торжествуй над врагами! Мы же неотступно
Верно пособствовати будем тебе купно.

Сенатор 3

Радуйся, о преславный царю, во вся роды!
Прославляйся во веки веков и вся годы,
Не подаждь дремания мечу изощренну,
Да имееш вселенну тебе покоренну.

Сенатор 4

Спрягл еси любовию нам сердца к своему.
Златым узом[1789] Фортуна престолу твоему
Да припряжется[1790]! Буди ты победоносный,
Долголетно носящи венец светоносный!

Ирод

Благодарен приветства и любви вашой,
Не отпадут от мысли долго сия нашой.
Радость ныне к радости моей приложися,
Веселися, Ироде, ныне веселися!
Певцы! Сладкиа гласы в устах растворете,
Господина своего песнми веселете!
Вели, да медоточне поють немедленно.

Отрок 1

Воскоре господина творю повеленно.

Пение

Апполлио! Музы! Семо воспешете,
Сладкиа песни с нами воскликнете!
Да веселится велегласный Ирод,
Да торжествует отселе в род и род!

Ирод

Гряди, вели что ино воспети любезно.

Отрок 2

Вскоре ушесам вашим воспоют полезно.

Пение

Ио! Ио! Восклицайте!
Ирода увеселяйте!
Воскликнете сладки гласы,
златые бо имать часы.
А Ионе, бий у струны![1791]
Направо, коло Фортуны,
Направо точится пильно[1792]
и будет так неомыльно[1793].

Посланник от триех царей

Поклоненна восточна тебе дал трое царь:[1794]
Мелхиор стара, Гаспар, третьяя Валтасар.
Волил царь новый Юды в земля твой родити,
Они схотели ему дары понести:
Ливан[1795] одна, друга смирн[1796], а третяя злато.
Просим тебе, ты не зволь оскорбити за то.
Твою землю Вифлеем пошол поклонился
Нову царю юдейску, да дом воротился.
То моя господина у тебе желае,
Да твоя путешество им вольно дае.

Ирод

Что новаго посланник сей наю[1797] приносит?
Мира ли, или брани, или чего просить?

Сенатор 1

Сего послаша семо восточны три цары,
Дабы мели[1798] путь вольный со драгими дары,
Чрез землю ти идуще со многими труды
Поклон дати коему не вем царю Юды.

Ирод

И кто есть царь юдейский, еще мне живущу?
И кто скипетр обыймет ту в десницы сущу?
Аз есмь царь и властелин, кроме мя никтоже.
Кто ми треокаянный соцарствовать може?
Ты же, глупче, приносишь весть о царю Юды
Кую? Се тя, извлек мечь, разсеку на уды.

Посланник

Воля твой, царю Юда, голова рубати.
Я невинна — мой цар зде схотел мя послати.

Сенатор 2

Не изволь умертвити, монархо, посланна,
Не от его бо воли сия содеянна.
Господие послаша того к твоей власти,
Да им бы путь был мирен и кроме[1799] напасти.

Ирод

Како путь мирен дам им? Не будут без борбы,
Иже ми нанесоша нечаянной[1800] скорби.

Сенатор 2

Скорбь сия кая есть скорбь? Пусти его в мири,
Да и тых увещает в истой к тебе веры.
Рцы, да царя новаго честно привитают,
Привитствовавшы, тебе о нем возвещают,
Или тамо идуще, зде изволят быти.
Вем, яко и сам схощеш от них вопросити:
Где рождейся? Потом сам схощешь привитати,
О приветствии же не леть[1801] теперь глаголати.

Ирод

Встань и гряди к господам, глаголи же тако,
Яко о их шествии радуюся всяко,
Да изволят идуще мене посетити,
Молю; рад и что от них вопросити.
Где узнали рожденна, и аз хощу знати,
Яко они, подобный тому поклон дати.

Посланник

Добро. Моя рада, что здорова ходила,
Больше того не буду кому говорила.

Ирод

Верные ми велможи! Предлежит нам дело,
Еже ми ныне радость на скорбь претворело.
Подобает уведать, кий то нарожденный
Новый царь на престол мой будет посаженный:
От моея ли крове или прежде бывших
Монарших наследников, себе утаивших?
Но ближайший наследник Иркан фрону бывый[1802]
Не встанет, мечем моим главу положивый.
Такожде Аристовул, внук его любимый,
Не востанет, на престол праотцем садимый.
И кто оста таковый, фрон мой наследствуяй,
Усмотрете разсудне, всяк гадательствуяй.

Сенатор 1

Превеликий монархо! Всуе ум смущати
Не требе, ниже послов в страны посылати:
О нем ти восточные принесут весть цары,
Где обрящут и дадут нову царю дары.

Сенатор 2

О сем дело настоит[1803]: егда волсви[1804] приидут,
Без согласна от тя все да не изыйдут.
Рцы, да тебе возвестят о царю рожденном,
От них приветствованном и дарми почтенном.
Таже и ты обещай ему дары дати,
А втайне[1805] оружия вели готовати.
Поклоним ти под нозе его выю горду,
Вели быти готову мечу и оскорду[1806].

Ирод

Аще же не восхощут о нем дати вести,
Кто нам может о цари рожденном повести?

Сенатор 3

И как не изволят, в руках твоих суще?
Не могут тя минути, вести не несуще.

Сенатор 4

Да мысль ти, о монархо, свободна пребудет,
Вели, да на их пути крепкая страж будет:
Аще к царю тещи имут, вели удержати,
Аще же воспять пойдут, вели зде предстати.

Ирод

Добри вои! На стражи будите не спящи,
Всех путем шествующих опасно[1807] хранящи,
Наипаче егда цари пойдут от Востока
Вожденнаго на царство почтити отрока.
Тем без сумнения их скоро удержете
И к престолу моему семо приведете.
Мы же на мало время в своя си отъидем,
Таже в время обычно паки семо придем.

Вои

С охотою, монархо, творим повеленна.
На время та завеса буди закровенна[1808]!
Стоимо ж и сохраняймо наж заповеданна:
Не хотем царя наша быти поруганна.