Том 18 (XVII век, силлабическая поэзия)

Страж 1

Господие! Молим вас, зволте мало стати,
Царю Ироду о вас требе докладати,
В нынешнее бо время Юдея смутися,
Аки бо царь си новый некий народися.

Царь 1

Творим царя вашего наю повеленно.
Изволте доложити, молим, немедленно.

Страж 2

Се иду и возвещу монарсе воскоре.
Изволте помедлити мало при семь дворе.

Сенатор 1

Господин наш, царь Ирод, любезно желает
У престола своего вас да созерцает.

Сенатор 2

Гости вожделенныя! Зволте посетити
Монарху лицем вашим и увеселити;
3 охотою чекает[1809] и радостно прииметь,
Яко другов любезных любовно обымет.

Царь 1

3 охотою на двор царск рады поступаем,
Лице его пресветло узрети желаем.

Царь 1

(к Ироду глаголет)

Преславнейший монархо Июдейския страны,
Саном царства почтенный над всех царей саны!
Здравствуй благополучен лета безчисленна!
Всякаго супостата имей покоренна!

Царь 2

Доколе Феб не станет в бегу златополучныи,
Дотоль царь юдейский будет благополучный.

Царь 3

Четверовластный скипетр четыре мира части
Скоро твоей господской да покорит власти!
Се и мы главы наша тебе покаряем,
Единыя свободы точию желаем,
Да даси нам путь мирен без всяка порока
Посетити новаго рожденна отрока.

Ирод

Радуюся, яко вас здравых созерцаю,
За приветство равные слова воздаваю.
По трудех путьшествия изволте почити,
Хощу нечто ко любве вашой предложити:
Коим случаем все три, не з едныя страны,
В едно намерение и путь сей собранный?

Царь 1

Мы трое равны есмы в учении значном[1810],
В звездочетстве. Но егда на небе презрачном
Увидим что ново и не можем пояти
Всяк своим умом, звыкли в едино збирати.
Пред деветмя месецами узрехом на небе
Нову звезду — о том нам сбратися[1811] было требе, —
Яже не на небесех была утвержденна,
Но в облацех над небо пречюдно явленна
И, як звездам обычно, не в запад течаше,
Но противу естества на юг та идяше.
Ту звезду разсуждая, надолзе[1812] пребыхом,
Многих волхвов искусных в память приводихом.
Егда же помянухом славна Валаама,
Имже та проречеся звезда еще здавна:
«От Иякова, — рече, — звезда возсияет»;
Ерифрея сивилла то же провещает:
«Таже от Израиля востанет человек
Славен, честен и премудр, вожделенный от век,
Тому вся земля имать быти покоренна,
Того царя познает над всех прославленна».
К тому, звезде ведущой, и мы путьшествуем
Да поклоном и дарми того почествуем[1813].

Ирод

И где есть она звезда, по нейже идосте?
Дадите ми ю зрети, о нейже рекосте.

Царь 2

По той звезде идуще, егда зде приспехом,
Абие бысть, аки бы никогда видехом —
Скрыся и оттоле наю не есть зрима,
Не вемы, или будет паки нам видима.

Ирод

Кия дары хощете тому царю дати?
Молю, возвестите ми, и аз хощу знати.

Царь 1

Аз злато.

Царь 2

Аз же ливан.

Царь 3

Аз приношу смирну:
Сия дары прилична суть царю всемирну.

Ирод

По-премногу, о друзи, мне ся возлюбисте
За честь, юже толику царю сотвористе.
Хотел бых приветствовать с вами царя нова,
Но дарствия моя ту еще не готова.
Молю, где обрящете, и мне возвестите,
Вестию мене о нем, молю, ввеселите.
Мею сребра и злата, камене добуду;
Витати царя нова, сколь мне мощно, буду.

Царь 1

Благослови ны, царю, во путь намиренный[1814],
Ты же здрав живи семо, мирен, надаренный!

Ирод

За посещение вам благодарю зело,
Землю ми июдейску проходите смело.
Егоже желаете, царя посетите,
Аз паки желаю, мне о нем возвестите

Царь 1

к рожденному глаголет

От чиста злата в небе имея полаты
И град святый, емуже блещат стены златы,
На драгих камениях красно основании,
Тебе в вечно жилище, Боже, зготованны, —
Ты же почто оставил красоту толику
И восприял еси ты нищету велику?
Над всех царей честнейший, так себе смиряеш,
Егда между скотами тебе водворяешь!
Порфиры и мяхкия одежды дарствуешь
Людем, а на твердейшом сам сене бедствуешь.
Солнца огня теплоту даеш твоей твари,
Греешь землю бездушну воздушными пары, —
Сам в глубоком вертепе себе на хлад давы,
Аки над всего мира нищих обнищавы!
Прийми убо малую от мене часть злата,
Прийми, дражайший злата, злато от мя, блата!
Не придох, — не могу бо, — тя обогатити,
Вся в руку имущаго, но токмо вручити.
Прийми, а мя помилуй, Боже милосердый!
Паки реку: помилуй, Боже милосердый!

Царь 2

Аз пред тобою, Боже, тощ да не явлюся, —
Ливан от мене прийми, смиренно молюся.
Вем, яко ты Бог еси безсмертный, нетленный,
Безбоязненный, во век сущий неизменный,
Человека, чрез змия в рай поврежденна,
Пришел еси целити и живить мертвенна,
Но не инак, точию чрез смерти и раны
Целба, жизнь человеку паки будут даны.
Врачю душам и телам! Ливан ти приличен,
Плотию смертен сущий, божеством же вечен!
Прийми врачевания знак — ливан, молюся,
Ино что болшо несть ми, тем да умилюся.
Твоим даром никаков дар будет сравненный,
За велик от мя прийми сей дар умаленный.
Пребогаты, преславный над все человеки,
Буди благословенный, Боже, во вся веки!

Царь 3

Вечный Боже, на земли ныне воплощенный,
От века Бог, под леты человек рожденный!
Кую ти аз дам титлу яко человеку,
Иже царем и князем даешь титлы з веку?
Царь, иже тебе злато за дар приношаше,
Царя тя быти миру прообразоваше;
Вторый, иже принесе тебе ароматы,
Врачем душ и тел дерзнул тебе нарицати.
Аз тя архиереем, Боже, нарицаю,
Яко архиерею, смирну предлагаю.
Вже бо не смрадна повелиш пасити,
Но со кадилом смирну тебе приносити.
Проженешь[1815] сень ветхую, егда тя на жертву
Богу Отцу принесешь за тварь твою мертву.
Архиерею, за весь мир молящи Бога!
Да будет твоя милость и на нас премнога!
Благослови отити во страны своя здравым,
Путем благополучным, веселым и правым.

Вси три

Удаляемся телом, духом же с тобою
Хощем быти, ты нас имей со собою.
Подобает нам иным путем шествовати,
Да не зволим Ироду о сем возвещати,
Да коварен сый царя не убиет,
Крови невинной всуе да не излиет.

Пение

Весь мир ныне веселися, веселися,
Христос Спаситель родися;
(дважды).
Пришли к нему трае цары, трие цары,
Поклон дают, кладут дары;
(дважды).
Ливан, смирну, купно злато, купно злато,
3 различных стран дар той взято;
(дважды).
Мы же ему сердце даймо, сердце даймо,
Чистым сердцем величаймо.