Том 18 (XVII век, силлабическая поэзия)

Исходит Старик и глаголет

Увы, мне, бедну! Весь изнемогаю,
Частее стеню, неже отдыхаю:
Старость глубока зело ми стужает[1893],
Недугом тяжким велми озлобляет[1894].
Ноги не крепки, не служат и руце,
В новой на всяк день есм недугов муце.
Глава ми болит, стомах[1895] зазнобися,
Сердце печально, все тело растлися:
Уши не слышат, очи видят мало,
Бодрость и действо всех удов[1896] престало,
Язык не хощет усты глаголати,
И зубы хлеба не могут сожвати.
Живый хожду труп, весма неключимый[1897],
А от скудости зело есмь мучимый:
Хлеба не имам, риза вся раздранна,
Не вем над мене в мире окоянна[1898],
Зима лютая вельми досаждает,
Мертвеца суща в дрова[1899] изгоняет.
Сещи не могу, обаче[1900] искати,
Не возмогу ли готовых собрати?

Пойдет за завесу и абие з дровами изшед, глаголет

Бог ми пособил: найдох дрова сия,
Имиже моя сляцается[1901] выя.
Ох, утрудихся! Не могу носити.
Лучше умрети, неже в нужде жити.
Бог мя оставил за преступления,
Не посылает мне умерщвления.
Юный мнози везде умирают,
Старика тленна во гроб предваряют.
Ей, смерть есть слепа, не видит, что взяти,
Мало в ней ума, не весть разеуждати:
Юным есть горька, а тех похищает,
Мне бы была сладка, но мя оставляет.
О смерти! Где ты? Камо заблудила?
Вскую беднаго старика забыла?
Потщися ко мне, возми мя до себе,
О, коль аз давно ожидаю тебе!

Смерть изидет и глаголет

Что, старче древний, слезно вопиеши?
Чесо мя ради до себе зовеши?
Имя ми есть Смерть. Аз весь мир умерщвляю,
Души от телес людских разрешаю.

Старик

Честная Смерти, ничто мне с тобою,
Живи в дружестве добром ты со мною, —
Инии люди семо прехождаху,
Тии до себе тебе призываху.

Смерть

Не льсти[1902] мя, старче! По гласе тя знаю,
Чего хощеши? Повеждь, вопрошаю.

Старик

Прости мя, Смерти! Се правду вещаю,
На помощ милость твою призываю:
Пособи дрова на плеща взложити,
Твоим пособством престану тужити.

Смерть

Старче лукавый! Что се ты твориши?
Непрельстимую богатирку льстиши?
Не мое дело в дровах ти пособляти,
Аз вем телеса ваша во гроб хищати.
Обаче тебе имам пособити,
Да скорее в гроб возможеши прити.
Се коса моя дровам ся касает,
Гроб тя древяный в дому твоем чает.
Прощайся с людми и Богу молися,
Утро в могилу ко мне готовися.

Смерть отъидет, Старик глаголет

Увы мне, увы! Что имам творити?
Вскую аз дерзнух Смерть к себе гласити?
Сам ю возбудих, яже твердо спаше,
Мене мертвити не у[1903] помышляше.
Прельстихся, бедный, лучше бе молчати,
Воли Божия в готовости ждати.
Уже днесь иду в дом свой умирати,
Изволте вы мне прощение дати,
Бога за душу мою помолити,
В последней нужде любовь проявите.
Сами здравствуйте на лета премнога,
Званием Смерти не гневайте Бога.

И отъидет.