Том 18 (XVII век, силлабическая поэзия)

Изидет старик, иский мудрости, придет малец школьный[1887]научити его

Старец

Бог в помощь, государи! Вси здрави будите,
Кручины на беднаго старца не кладите,
Что вышел дерзновенно между милость вашу:
Ума хощу набыти на потребу нашу.
Кто ведает, где разум в лавках продается?
Аршин з десять купити старик волочется.
Уже мне докучно без ума жити.
Аще бы возможно паки младым быти,
Принял бы ся за книгу руки и зубами,
Да бым ума набити в главу кулаками;
А ныне готов есм добраго стяжати,
Токмо бы кто изволил разума продати.

Малец учитель з свитком и с плетию

Бог ти в помощ, старче! О чем ти кручина?
Повеждь, аз тя утешу, искусный детина.

Старик

Ума хощу купити, да не обретаю;
Ходя, у добрых людей давно вопрошаю.

Малец

Не кручинся, о старче! Аз много имею
Ума и старых людей учити умею.
Точию есть потребно, что велю, творити
И ни в едином слове упорчивым быти.

Старец

Вся готовь есм творити, учителю честный!
Во мздовоздоянии не буду ти лестный[1888].

Малец показует свиток и глаголет

В сей хартии есть разум. Потребно ю сьясти,
Изрядно порозрезав на мелкия части.

Старец

То готов есм сотворити,
Точию бы мудрым быти.

Тогда Малец порежет, а Старец яст и глаголет

О! Вкус жесток есть, хощется блевати.

Малец

Терпи, аще тя хощет и прервати:
Горек труд ныне, но сладкий плод будет,
Егда в главе ти ума прибудет.

Егда сяст Старец, тогда Малец на таблицы написав азбуку и учит Старца.

Малец

Глаголи со мною. Аз.

Старик

Увяз.

Малец

Буки.

Старик

Учителя прибрать в руки.

Малец

Веди.

Старик

У меня уже суть дети.

Малец

Глаголь.

Старик

Учителя за хохол!

Малец

Мало памяти в главе, по телу расплыся;
Хощу в главу вогнати, токмо положися.

Старик ляжет, а Малец от ног плетию во главу память вгоняет и глаголет

Иди в главу, память! Ты, старче, учися,
Но за соху в дом паки приимися.

Старик

О! Есть память, есть! Уже добре знаю,
Изрядно писмо то прочитаю.

Малец

Чти гласно.

Старик читает

Аз, буки, веди, глагол.

Малец

Се память в главу вся добре собрася,
Се уже писмо добре прочитася.
Но днесь доволно, да ты не стужиши![1889];
Приходи рано, да ся болши учиши.

Старик

Кто ся не хощет в юности труждати,
Должно тому есть в старости страдати.

3