Том 3 (XI-XII века, священная история)

«Поимъ же мя человекъ старый приведе къ хресту, егоже бяше высота до небесе и бльщаше ся паче солнця. И поклониста ся предъ крьстомъ и сътвориста молитву». И тако начать Агапии тьрьпети свет. И поимъ приведе и идеже стояше одръ Ему и трьпеза украшена отъ камения драгааго. И лежаше хлебъ на неи белеи снега, видехъ бо у одра кладязь белеи млека и слажьи меду. Виногради же стояху различьно имуще грьздовие: ово багъряно, ово чьрьвлено, ово бело, и овоща имуща различьны, и цветьци и житие, егоже не виде никътоже. И рече Агапии старому человеку: «Господи, съкажи ми, чьто се, еже вижю?» И рече ему: «О брате мои Агапие, почьто глаголеши ми “Господи”, ельма же жидове не нарекоша Бога нашего Богомъ, нъ рекоша льстьць есть и злодеи? И имъше убиша и распяша и́ на крьсте, али ты мне глаголеши “Господи”, а хотящу умрети и съ пьрьстию съмесити ся, нъ обаче съкажю ти, да ся не блазниши. Азъ есмь Илия Тезвитенин, егоже възнесоша колесниця огньны и кони огньни, и Господь благослови мя подъ небесьмь. И съниде и посади мя сьде, и сьде живу до вътораго пришьствия Господня. Си же вься, яже видиши, душе суть человечьскыя, тобе явилыся грьздовиемь, поне бо живь человекъ не можеть видети душь человечьскъ. Сь же кладязь порода ся наричеть и исходить въ древа раиская, сь же светъ ангельскъ есть и правьдьныихъ душь. Сь же одръ и трьпеза творение руку Господию. Хлебъ же сь небесьныи есть и правьдьныихъ душь, источьникъ же сь ангели пиють и правьдьнии человеци». — «Видехъ же и ина брашьна, ихъже сласти несть удобь съказати, несть бо имъ притъча на семь свете. Ихже бо сласти и воне человечьска уста не могуть исповедати. Простая же ядь яко и млеко и медъ. И възьмъ дасть ми отъ источника въкусити. И просвьте ми ся умъ и поимъ мя приведе къ трьпезе. И видехъ хлебъ целъ и яко не уломлено отъ него ничьтоже. Илия же съказа ми вся, ихъже неудобь съказати никомуже, и приведе мя пакы къ хресту и сътвори молитву съ мною. И изведе мя изъ окъньця и яко поклонихове и целовахове. И рече ми Илия: “Миръ ти буде, Агапие, иди въ пути Господня и Господь Богъ съ тобою”. Азъ же поклонивъ ся поидохъ по пути, иже ми показа Илия. И тако шьдъ многы дни доидохъ моря и поглядахъ по морю, и видехъ корабль идущь къ себе и 12 мужа въ немь. И егда приближиша ся къ мне, глаголахъ имъ: “Добре ходите и добръ вы буди путь”. Отвещаша и рекоша: “Послушаи тебе Богъ твои, добрыи старьче”». Агапие же рече къ нимъ: «Възьмете мя съ собою въ корабль и иду съ вами въ градъ, въ ньже хощете ити». Они же глаголаша къ нему: «Мы се третиее лето заблудихомы въ мори и не вемы, камо ити. Братия же наша измьроша отъ глада и зимы и отъ буре морьскыя. Мы же доселе живи есмъ, яко ни хлеба ни воды многы дни не насытихомъ ся, и не днесь не ночьсь умремъ. И аще тя приимемъ и ты съ нами умреши и болии намъ грехъ приложиши». Агапии же рече къ нимъ: «Възьмете мя съ собою; Господь Богъ печеть ся животъмь нашимь».