Том 3 (XI-XII века, священная история)

А Амир царь, приехав к матери своей и к брату своему, и нача имъ прелестию глаголати, да чтобы его не уняли. И рече матери своей: «Мати моя милая! Что ходих в Греческую землю и полоних себе любимую девицу, и приидоша во следъ ко мне братия ея и начаша со мною битися. И единъ отъ них, меншы братъ, крепость мою победилъ. Аще бы совокупилися все три брата во единое место, то и вся бы земля наша от них в работе была». Рече же мати ко Амиру царю, сыну своему, гневно и власы главы своея нача терзати и лице свое, и рече ему: «На што нарекаешься царемъ и силный кметь у себя имеешы, прибытку емлютъ по 1000 и по 2; и ты иди ныне и совокупи войска своего, и иди въ Греческую землю и победи братию, и любимую девицу приведи ко мне». Амир же рече к матери своей прелестию: «Мати моя, азъ хощу то жь сотворить, собрати воя своя много и идти пакости творить в Греческую землю». И рече братъ Амиру царю: «Поидемъ, брате, вскоре, собравъ войско свое, да не допустимъ братию с любимою девицею во градъ». И рече Амир царь ко брату своему: «Сяди ты, брате, на престоле моемъ, а язъ единъ хощу ехати пакости творити въ Греческой земле». В то же время Амиръ царь посади брата своего на престоле своемъ, и самъ собра войска много, и собра богатества и веръблюды со всей земли и наполни на них драгаго злата аравитцъкаго и камения драгаго многоценного. Видев же то срацыняне, яко на рать не ходятъ тако, а не глаголаше ему ничего.

Доиде же Амир царь до сумежия Греческия земли, и рече Амир царь ко аравитяномъ: «Братия моя милая, силнии и храбрии аравитяне! Хто хощетъ со мною дерзость творити, той поди со мною в Греческую землю пакости творити». И рече от них един аравитянин, во устех имея у себя дванадесять замковъ, и рече велегласно ко Амиру царю: «Великий государь, Амире царю! Приидоша отъ Греческия земли в нашу Срацынскую землю три юноши, и един от них крепость твою победи; аще бы въсе были три совокупилися во едино место, то бы и земля наша от них вся в работе была; а ныне ты хочешь итить в Греческую землю, то они нас и до остатку всехъ погубятъ». Амир же царь, отпустив богатество, наполненныя казны верблюды вперед в Греческую землю, и взяв немного кметей своих и поиде в Греческую землю.

Братанича же не доидоша Греческаго града за пятдесятъ поприщь и сташа на поле; сестра же ихъ начат имъ молитися: «Братия моя милая! Не введите мя в срамъ великий от человекъ и от своих сродникъ, занеже азъ исхищена была рукама Амира царя; подождите зятя своего нареченного Амира царя». По мале же времяни приидоша к нимъ Амир царь со всемъ богатествомъ и съ верблюды, наполненныя златомъ и сребромъ. И рече Амир царь: «Слава Богу, благодеющему мне, яко сподобил мя Богъ братию в очи видети». И рекоша братия ко Амиру царю: «Рабе Христове, буди ты намъ зять». Два же брата, болшый и середней, с сестрою своею поехаша во градъ нощию, народа ради, и внидоша в домъ матери своея, и видевъ же матерь два сына и дщерь свою и рече имъ слезно: «Сестрицу вы свою добыли, а братца изгубили есте!» И рече ей сынове ея: «Радуйся, мати, и веселися, братъ нашь меншый пребывает зъ зятемъ нашимъ нареченнымъ, со Амиромъ царемъ, а ныне ты, мати, доспевай бракъ великъ, занежь есми добыли зятя — славою славенъ и силою силенъ и богатеством богатъ, а ныне намъ ево въвести во святое крещение».

И вземше патриарха града того со всемъ соборомъ и приидоша на Ефрантъ реку[45] и сотвориша купель. И выидоша из града множество народа. Видевше же то братаничи истомна Амира царя отъ народа, братаничи же повеле Амира царя вскоре крестити во имя Святаго Духа, и крести его самъ патриархъ, а отецъ былъ крестной царь града того. И поидоша в домъ матери своея и сотвориша бракъ великъ, преславенъ зело, и сотвориша свадбу по 3 месяцы. И потомъ Амир царь сотвори себе особый дворъ и полаты и жити нача с своею любимою девицею.

По том же времяни услыша мати Амира царя, что он крестися и отвергъся веры своея, любве ради девицы тоя, и нача терзати власы главы своея, и собра войска своего много множество и рече имъ: «Кто имеетъ дерзость внити в Греческую землю къ господину своему Амиру царю и извести его из Греческия земли с любимою девицею его?» И рекоша жь ей три срацыняне: «Мы, госпоже, идемъ въ Греческую землю и отнесемъ какъ книги ко господину своему, царю Амиру». И она же имъ даша много златницъ и даша имъ три кони: конь, рекомый Ветреница, вторый — Громъ, третий — Молния.[46] «Аще внидете в Греческую землю и увидите господина своего Амира царя, и изведите его из Греческия земли, и сядете на Ветреницу, и вы невидими будете никимъже. Аще внидите в Срачинскую землю с господиномъ своимъ Амиромъ царемъ и со девицею его любимою, и сядите вы на Громъ-конь, и тогда услышат все аравитии Срацынские земли. Аще сядете на Молнию, и невидими будете въ Греческой земле».