Том 3 (XI-XII века, священная история)

И рече же им Амир царь: «Братия моя милая! Отъедите вы прочь от шатра сего и измечите вы меж собою жребий, кому от вас со мною выиметца жребий битися; аще мя преодолеете, то и сестру свою возмете; аще азъ вас преодолею, и мне годно вас всех посещы». Братаничи же отъехаша от шатра его и начаша метати жребия, и вергоша жребия впервыя, и выняся жребий меншему брату на брань ехати. Братия жь въвергоша въ другой рядъ жребия, што не меншему ехать битися противъ Амира царя, понеже силен есть; и в другой рядъ выняся жребий меншему жь брату битися. Они же вергоша жребий и въ третей рядъ: выняся меншему жь брату на брань ехать битися со царемъ Амиром, занежь они съ сестрою из единыя матерни утробы въместе шли и во един день рожения их.

И начаша братаничи меншово брата крутити; а где стоятъ братаничи, и на томъ месте аки солнце сияетъ, а где Амира царя крутятъ, и тамъ несть света, аки тма темно. Братия же анггелскую песнь ко Богу возсылающе: «Владыко, не поддай создания своего в поругание поганымъ, да не возрадуютца погании, оскверня крестьянскую девицу». И седшы же они на кони своя и съехася они вместе со Амиромъ царемъ, и начаша ся сещы саблями и ударишася межь собою копьями. Видеша же то срацыняне и многия кмети дерзость меншого брата и рекоша Амиру царю своему: «Великий господине, Амире царю! Отдай имъ сестру их и приими миръ от них, се бо единъ меншый братъ их крепость твою побеждает; аще совокупятца вси три во едино место, то вся земля наша от них в работе будетъ». Меншы их братъ заеде созади Амира царя и удари его межь плечь и долу его с коня сверже, и ухватив же его за власы и примча его ко братии своей. И рекоша вси срацыняне велегласно Амиру царю: «Отдай, Амире царю, сестру их имъ, да тя не погубятъ до остатку». Рече же имъ Амир царь: «Помилуйте мя, братия милая, днесь крещуся во святое крещение, любве ради девицы тоя, да буду язъ вамъ зять».

Рекоша же братаничи: «Брате Амире царю! Власть имамъ посещы тя и власть имамъ пустити тя. Как намъ за холопа выдать сестру свою? А ныне повеждь намъ: где сестра наша?». Рече же имъ Амир царь слезно: «Братия! Видите оно поле прекрасно: тамо стоятъ многия шатры, а в них седит сестра ваша; а где сестра ваша ходит, и тут изослано поволоками златыми, а лице ея покрыто драгимъ магнитомъ[42], а стражие ея стрежаху далече от шатров». Слышав же то, братия радостьни быша и поскочиша к шатру ея и прискочиша; стражие же не рекоша имъ ничегоже, а чающе, яко приходцы суть, а не чающе, яко братия ея. И приидоша же братия к шатру, и внидоша в шатер к сестре своей, и обретше же сестру свою на злате стуле седящу, и лице ея покровенно драгимъ магнитомъ. Начаша же братаничи вопрошати слезно: «Повеждь намъ, сестрица, дерзость Амира царя, аще к тебе прикоснулся единомъ словомъ, то отымем же главу его и отвеземъ въ Греческую землю, да потомъ не будетъ похвалятися, осквернивъ крестьянскую деву».[43] (...) Рече же девица ко братии: «Никакоже, братия, не имейте никакова о мне во уме своемъ. Коли я исхищена Амиромъ царемъ, и тогда было при мне 12 кормилицъ, а ныне боюсь поношения отъ людей и от своих сродницъ, занеже бысть полоненица. И азъ поведала Амиру царю дерзость вашу, и Амир царь всегда ко мне приежьжаше единою месяцомъ и издалеча на меня смотряше; лице мое повеле сродичемъ своимъ скрывати, а въ шатеръ никто николиже вхождаше; а ныне, братия моя милая, хощу к вамъ глаголати, да прежь хощу вас заклинати молитвою матери нашея — да не преслушати вамъ заповеди моея. Аще толко отвержетца Амир царь правдою веры своея, и днесь креститьца во святое крещение, и иного вамъ зятя таковаго не обрести, занеже славою славен и силою силен и мудростию мудръ и богатествомъ богатъ». Рекоша же братия къ сестре своей: «Совокупитъ васъ материя молитва со Амиромъ царемъ».[44]

В то жь время Амир царь собра триста верблюдъ и наполни на них драгаго злата аравитцкаго и дал братаничамъ в даровях, любви ради девицы тоя, и рече Амир царь ко братаничемъ: «Помилуйте мя, братия моя, отвергусь я веры своея и днесь крещуся во святое крещение, любве ради девицы тоя, да буду вамъ зять». И рекоша братаничи Амиру царю: «Аще хощешы быти намъ зять, и ты отвергися веры своея поганыя, любве ради сестры нашея; днесь крестися во святое крещение и поеди к намъ в Греческую землю, по любимой своея девицы». И рече же имъ Амиръ царь: «Братия моя милая! Не дамся аз в сраме, да не рекутъ греченя, яко, полонив зятя, в домъ свой ведутъ. Нарекуся аз вамъ зять съ великою честию. Хощу прежь ехать и изобрать велблюды со всей земли и наполнити на них богатества, и хощу изобрати силные кмети, а хто хощетъ со мною итить во святое крещение; и прииду к вамъ в Греческую землю и нарекуся вамъ зять и буду славенъ и богатъ. А вы коней своих не томите, подожьдите мя на дороге». Братия же вземше сестру свою и поехаша путемъ своим.