Том 3 (XI-XII века, священная история)

(...) Создати въ земли Мадиамстей человека, вземъ земли горсть ото осьми частей: 1) отъ земли — тело, 2) отъ камени — кости, 3) отъ моря — кровъ, 4) отъ солнца — очи, 3) отъ облака — мысли, 6) отъ света — светъ, 7) отъ ветра — дыхание, 8) отъ огня — оттепла. И поиде Господь Богъ очи имати отъ солнца, и остави Адама единаго лежаща на земли; прииде же окаянный Сотона ко Адаму и измаза его каломъ и тиною и возгрями. И прииде Господь ко Адаму и восхоте очи вложити во Адама, и виде его мужа измазанна; и разгневася Господь на диявола и нача глаголати: «Окаянне дияволе, проклятый, не достоить ли твоя погибель? Что ради человеку сему сотворилъ еси пакость, измаза его? и проклять ты буди», — и дияволъ исчезе, аки молния, сквозь землю отъ лица Господня. Господь же, снемъ съ него пакости сотонины, и въ томъ сотвори Господь собаку, и смесивъ со Адамовыми слезами, и теслою очисти его аки зерцало отъ всехъ сквернъ, и постави собаку и повеле стрещи Адама, а самъ Господь отъиде въ горний Иерусалимъ по дыхание Адамлево. И прииде вторые Сотона и восхоте на Адама напустити злую скверну, и виде собаку при ногахъ Адамлевыхъ лежаща, и убоя си вельми Сотона. Собака начала зло лаяти на диавола, окаянный же Сотона, вземъ древо, и истыка всего человека Адама, и сотвори ему въ немъ 70 недугов. И прииде Исусъ изъ горнево Иерусалима, и виде Адама древомъ исколота, и милосердова о немъ и рече Сотоне: «Проклятый дияволе, что сотворилъ человеку сему, почто вложилъ недуги сия?» Тогда отвеща дияволъ, окаянный Сотона, Господу, глаголя: «Аще приидетъ кая болезнь человеку сему, да не постигнетъ, до скончания всего тобя не помянетъ; аще ль поболитъ, кой недугъ въ немъ постраждетъ, тогда всегда тебя имать на помощь призывати въ недузехъ сихъ». И отгна Господь диявола и исчезе дияволъ, прогнанъ аки тма светомъ, и обороти вся недуги въ него.

И посла Господь ангела своего, повеле взяти «азъ» на востоце, «добро» на западе, «мыслете» на севере и на юзе. И бысть человекъ въ душу живу, нарече имя ему Адамъ. А костей сотвори Богъ во Адаме 345, и бысть Адамъ царь всемъ землямъ и птицамъ небеснымъ и зверемъ земнымъ и рыбамъ морскимъ, и самовласть дасть ему Богъ. И рече Господь Адаму, глаголя: «Тебе работаетъ солнце и луна и звезды, и птицы небесныя и рыбы морския, и птицы и скоты и гади». И насади Господь Богъ Рай на востоце, и веле Адаму пребыти, а жена Адаму еще не сотворена бысть. И вложи Господь Богъ сонъ во Адама, и успе Адамъ, и взятъ его ребро левое, и въ томъ ребре протяже руце и нозе и главу, и созда ему жену въ шестый день, и показа ему Господь свою смерть и распятие, и воскресение, и провиде вознесение за полшесты тысящь леть. И виде Адамъ Господа распята, а Петра въ Риме ходяща, а Павла въ Дамасце учаща народъ и проповедующе Твое воскресение, и вознесеся Господь...

И воста Адамъ отъ сна своего и трепетень бысть во ужасе велице о провидении. И вожда Господь Адама въ рай ходящя и рече ему: «Адаме, Адаме, повеждь ми». Адамъ же убояся велми, не смея Богу поведати того видения. И рече ему Господь Богъ: «Адаме, Адаме!» — Адамъ же рече ему: «Господи владыко, Тебе видехъ на кресте распята во Иерусалиме, а ученики Твоя видехъ ходяща — Петра въ Риме, а Павла въ Дамасце, проповедующе Твое распятие и воскресение». И рече ему Господь: «Подобаетъ ми тебе ради снити на землю и распяту быти и въ третий день воскреснути; а ты же не поведай никомуже видения сего, дондеже увидиши мя въ Раю седяща одесную Отца, и ты о томъ поскорби, Адаме».

И бысть Адамъ въ Раи 7 дний, прообразуя Господь Богъ житие человеческое: десять летъ исполнится рожение, 20 летъ — юноша, 30 летъ — свершение, 40 летъ — средовечие, 50 летъ — седина, 60 летъ — старость, 70 летъ — скончание.

И сотвори Господь Богъ всю тварь, море и реки, и скоти своею хитростию, а та 7 дней противъ седми тысящь летъ. И постави Господь Богъ две светиле велице на тверди небесней осветити землю, и разлучи между днемъ и нощию да будетъ во знамении дне и лета, а будетъ просвещение на тверди небесней: светила великая въ начатокъ дни, второе светило — въ начатокъ нощи. И звезды постави Господь Богъ на тверди небесней, яко светити по земле и обладати днемъ и нощию, и разлучити между днемъ и нощию и светомъ.

И бысть вечеръ и бысть утро — день четвертый.

Постави Господь Богъ планиты и облацы зарьныя и дуги на облацехъ, еже пущати дожди, и громи, и молния человекомъ всея земли просвещати древа плодовитая. И рече Господь Богъ: «Изведу воды живыхъ во веки, птицъ перящеся по заводемъ, на тверди небесней».

И бысть, яко сотвори Господь Богъ четыре киты великия, изведе отъ нихъ всяку птицу и всякъ гадъ на земли; и иныя благослови ясти, и глаголя: «раститеся и умножитеся и наполните землю и обладайте ею».

А в семъ бо дней обходитъ кругъ, а 7 летъ за всю 7000 летъ, и осмой тысящи несть конца, еще есть безконечный.

Въ неделю, день рекомый неделя, въ той же день воскресе Христосъ от мертвых, и в той же день Господь на облацехъ судити всему миру, иже не имать конца света, и воздастъ комуждо по деломъ его.

ПЕРЕВОД