Том 3 (XI-XII века, священная история)

Видевъ же воя, яко не довлеють противу варваромъ, повеле тироны собрати; и написаны быша книгы от царя во вся грады и въ вся веси Римьския области. Приключи же ся и в ту весь, идеже беста въспитена сына Еустафьева, доити написанию цареву. Вси же сущии в той веси оба юноши та, якоже странна сущи, предаша а́ воиномъ; беста же растомъ и видениемъ красна зело. Събраномъ же всемъ тирономъ, и приведеномъ бывшимъ къ стратилату, видевь я́ вся учинены на нумеры, видев же она юноши оба паче всехъ краснейша, учини а́ себе на службу. Зря же ею тако красну, повеле има всегда ести с собою на трапезе. И расчинь воа, иде на брань; и страну, юже бяше прьвее отъяли варвари, свободи; оны же побеждь, прееде реку, нарецаемую Идаспая.[16] Преехавше же, внидоша в Вышнюю страну варварьскую,[17] и ту победиша. Мышляше же ехати и на другую, Божии же воли водящи и, идеже бе жена его съхранена от иноплеменника того. Умершю бо ему, отшедши и хижину створши, стрежаше вертограды тех людий. Пришед же в ту весь стратилатъ и повоевавь ю́, препочи с вои в ней три дни. Приключи же ся колимогу его близъ хижа еа поставлену быти при вертограде иже храняше жена его. Юноши же она обитаста в хыжицы жены тоя, не ведуща, яко мати има есть. В полудни же седяща, поведашета о младеньстве своемъ: помняшета бо мало что. Мати же ею послушаше. Рече же старей братъ, яко: «Азъ иного не помню ничтоже разве се, яко отець мой стратилат бе, мати же моя зело красна; иместа же два сына: мене и инъ мни мене, русъ власы, красенъ зело. И поимша ны, изыдоста из дому в нощи и влезоста в корабль с нама. Не вемъ, камо хотяша ити. Внегдаже излезохомъ ис корабля на землю, мати же наю не бе с нами, и не вемъ, како в мори оста. Отець же взят ны на раме, и идяше, плачася. Приидохомъ же на етеру реку, и пренесе меншаго брата, а мене остави на семъ полу. Хотящу же възвратити, да мя пренесеть, левъ прииде и въсхищь мя идяше, пастырие же овчии отъяша мя лву, и въспетеша мя въ веси, в нейже и самъ веси. Боле сего юже не вемь». Слышав же си словеса менший братъ, въскочи, и плачася глаголаше: «Тако ми сила Христова! Братъ ми еси ты. Познахъ бо яже ми поведа; такожде бо ми суть поведали иже мя въспитеша, яко волку тя отъяхомъ». Приимше лобызаше и́. Слышавши же се мати, и познавши беседу реченую до корабля, и разумевши, съжали себе зело, наипаче лобызающеся видящи, и плачющася, помышляюще, еда то еста сына еа, паче же слышавшиа, яко отець има стратилатъ бе. Въ другий же день прииде къ стратилату жена та, глаголющи: «Молюся тебе, господи мой, азъ римляныне сущи, пленена есмь семо, да веди мя на свою землю». И се глаголющи жена, зряше знамениа сущаго на мужи еа. И познавши и́, бояшеся вопросити его. Дерзнувше же, припаде к нему, глаголющи: «Молюся тебе, господи мой, не мози ся гневати на рабу твою, но кротко послушай. Повеждь мне древнее твое житие: азъ бо мню, яко ты еси стратилать Плакида, именовавыйся въ крещении Еустафий, емуже Христось явися еленемь, веровавый в онь и впадый в напасти, поимый жену свою, мя, и обе чаде свои Агапиа и Феописта, и въсхоте ити въ Египетъ; овогда же плавахове в корабли, науклиръ варваръ поятъ мя, иже мя приведе на сю землю. Сведитель же ми есть Христос, яко ни тъй, ни инъ никтоже не оскверни мене до днешняго дне. Аще бо ты еси, егоже азъ познахъ знамениими, повеждь ми. Тако ти сила Христова». Слышавше же се Еустафий от неа, и той такоже позна ю́. Възрадовавъ же ся, плакася велми и рече: «Азъ есмъ, егоже ты глаголеши». И воста абие и облобызашетася, славяще Христа Господа, избавляющаго рабы своя от многых скръбей. Рече же к нему жена его: «Господи мой! Еста зде чаде наю». Он же рече: «Зверемъ стравлена еста». И поведа еи, како я́ погуби. Она же рече: «Да хваливе Христа Господа, да якоже нама дасть обрестися, такожде нама имать дати чаде наю». Рече же к ней Еустафий: «Рех ти, яко зверми стравлене бысте». Рече к нему жена его: «Вчера седящи въ вертограде, слышахъ етера юноши два к себе глаголюща о младенстве своемъ и познахъ я́, яко та еста сына наю. Но и та не знаяшетася, яко брата си бяшета, токмо повестию старейшаго брата. Аще бо до днешняго дне сего неси виделъ, разумей, колика милость есть Христова! Слыши же от нею, и речета ти». Призвав же оба юноши стратилатъ, въпроси а́: «Кто еста и что ся приключило есть вама?» Поведаста же ему все, и позна я́, яко та еста сына ею. Приим же а́ Еустафий, облобыза я́; такожде же и мати облобызавше съ слезами, хвалящи Бога о славнемь обретени ихь. От вторыа же годины до шестыа прослу чюдо се по всемъ воемъ; и собрашася вои, веселяхуся о обретени их паче, нежели о бывший победе на варварех. Праздньство же велико сътвори Еустафий о познани ихь, въ другий же день Бога призвавъ и гласы похвалны въ славу Христову о велицемъ человеколюбии его. Побеждьше всю страну варварьску, възвратишася с победою велиею, обьдо много несый, боле же пленникы ведый.