Том 3 (XI-XII века, священная история)

Уключи же ся, даже Еустафий не възвратися со брани, умретъ царь Траиянъ. Поставленъ же бысть инъ царь в него место, именемъ Андреянъ,[18] еллинъ и той такожде, лющий всех царь древних. Възвращьшю же Еустафию с победою, срете и́ царь, якоже обычай есть римляномъ. Увидев же победу, юже сътвори, и обретение жены его и сынову его, болшиими радоваше и иде въ церковъ неприязнену жрътвы принести идоломъ. Влазящю же ему въ церковь Аполоню, не вниде с нимъ въ церковь Еустафий, но вне оста. Призвав же и́ царь, рече: «Почто не пожреши богомъ, приехавъ с победы? Достоить бо тебе не победы ради токмо, но и обретениа ради жены твоеа и сынову жрътвы сътворити». Рече же Еустафий къ царю: «Азъ Христу своему всылах и вослю молитвы и молениа: иного же бога ни знаю, ни чту, токмо сътворшаго словомъ всячьская». Тогда повеле царь изврещи и́ от чести тоа, стати же пред нимь яко простому человеку; жену же его привести и сына его и тако испытати а́. Видев же царь непреложную веру его, повеле самого и жену его и дети его пустити къ звери. Тек же левъ и ста близъ блаженых, и поклонься имъ, отьиде, хотя излести изъ игралища; и изыде ис позорища. Тогда царь, видевъ дивное то чюдо, яко не прикоснуся ихъ зверь, повеле ражжещи волъ медянъ и въврещи святыа в онь. Собраша же ся вси вернии, от еллинъ немало, хотяще видети вметаемыя въ медь. И егда близъ приидоша, въздевше рукы своа на небо, помолишася, глаголюще: «Господи, Боже силъ, и всемъ невидимъ, намъ же видимъ! Якоже въсхотелъ еси, послушай насъ молящихся тебе! Се бо молитва наша скончася, зане совокупихомся. И сподобил ны еси части святых твоих: яко и трие отроцы въвержении в Вавилоне въ огнь[19] и не отвръгшеся тебе, тако и ны сподоби скончатися огнемъ симъ, и да прияти тобою будемъ, яко жрътва благоприятна. Даждь же, Господи Боже, всякому поминающему память нашу участие въ царствии небеснемь твоемъ, ярость же огня сего преложи на хладъ и сподоби ны, да в немъ скончаемся. Еще же, Господи, сподобиши, да не разлучатся телеса наша, но да вкупе лягуть». Сице же помолшимся имь, гласъ бысть съ небесе, глаголя: «Буди тако, якоже просита. И боле вамъ будетъ, яко многы напасти претрьпесте и не побеждени бысте; идете в миръ, приимете венца победныя, почивайте въ векы векомъ за страсти ваша». И си слышавше святии с радостию предашася огню. И яко вьвержени быша во огнь, и абие огнь угасе. Прославльше же Пресвятую Троицу, предаша в миръ душа своа, и не прикоснуся огнь ни поне власехъ. По трех же днехь приде нечьстивый царь на место то, и повеле отвръсти медяный тъй волъ, да видить, что есть сътворено телесемь святыхъ мученикъ. Обрете же цела телеса ихъ и мне, яко живи суть. Изнесше же, положиша я́ на земли; дивиша же ся вси стоящии, яко и власех ихъ не прикоснуся огнь; светяху же ся телеса их паче снега. Убояв же ся скверненый царь, отиде. Людие же възопиша: «Въ истинну велий есть Богъ кристианескъ! Единъ истиненъ Богъ Иисус Христос и несть инъ, иже съхрани святыа своа!» Крестиане же тай, украдше телеса святыхъ мученикъ, положиша вь честне месте; и егда преста гонение, храм честенъ създаша кристияне, и положиша телеса святых мученикъ, славяще Господа нашего Иисуса Христа, емуже слава, честь и покланяние съ безначалным Отцемь и с пресвятымъ Духом, и ныне и присно и въ векы векомъ. Аминь.

ПЕРЕВОД

В ТОТ ЖЕ ДЕНЬ. ОПИСАНИЕ ЖИТИЯ И МУЧЕНИЯ СВЯТОГО ЕВСТАФИЯ, И ЖЕНЫ ЕГО ФЕОПИСТИИ, И ДЕТЕЙ ИХ АГАПИЯ И ФЕОПИСТА