Том 4 (XII век, литература эпохи «Слова о полку Игореве»)

Хеврон же гора есть велика, и град был на горе той велик и твердъ велми, и зданиа его суть ветхаа силно. Множьство людей седело прьво по горе той, и ныне же есть пусто.

На той бо горе Хевроньстей и первое селъ внук Ноевъ, сын Хамовъ, Ханаонъ, по потопе пришед отъ столпотворениа; и населил был землю ту всю около Хеврона; да тако земля та зоветься Хананея.[156] И ту землю обеща Богъ Аврааму, и еще ему сушу въ Месопотамии и в Хараоне; ту бо есть был домъ отца Авраамля. И рече Богъ Авраамови: «Изиди от земля твоея, и от дому отца твоего, и иди в землю Хананейскую, и тобе дам землю ту и семени твоему до века и азъ буду с тобою».[157] И ныне поистинне есть земля та Богомъ обетованна и благословена есть от Бога всем добром: пшеницею, и вином, и маслом, и всяким овощом обилна есть зело, и скотом умножена есть; и овци бо и скоти дважди ражаются летом; и пчелами увязло ту есть в камении по горамъ темъ красным; суть же и виногради мнози по пригорием темъ, и древеса много овощнаа стоятъ бес числа, масличие, смокви, и рожцы, и яблони, и черешни, инородия. И всякий овощь ту есть; и есть овощетъ лучи и болий всехъ овощий, сущих на земли под небесемъ, несть такого овоща нигдеже. И воды добры суть в месте том и всемъ здрави. И есть место то и красотою и всемъ добром. Неисказанна есть земля та около Феврона! И ту есть был домъ Давыдовъ на той горе Февроньстей; и ту бо есть был Давыдъ 8 лет, егда бяше выгнал сынъ его Авесалом.[158]

А от Феврона до Сугубыа пещеры Авраамовы близь яко полъ врьсты ближе. Сугубаа пещера в каменей горе есть и в той пещере есть гроб Авраамовъ, Исааковъ и Яковль. Ту бо пещеру Сугубую Авраамъ купил у Ефронь Хетфеянина на погребение всему роду своему,[159] егда прииде от Месопотамиа в землю Хананескую. И ино не притяжа ничтоже прьвее, но токмо пещеру Сугубую на погребение себе и всему роду своему. И есть ныне созданъ градокъ малъ около пещеры тоя, но твердъ зело. И есть градок созданъ есть великим каменем, чюдно и несказанно хитростию, и стены его высокы суть велми. Посреде градка того дне утвержена есть пещера твердо. И помощенъ есть градокъ тъ весь дсками мраморными, белаго мрамора. И есть пещера та под мостом исподи утвержена велми, идеже лежит Авраам, Исаакъ, Иаковъ, и вси сынове Ияковли; и жены их ту лежат, Сарра, Ревека. А Рахиль кроме лежить на пути у Вифлеема. Суть же въ градце том дне над пещерею создани гроби разно себе; над гробы теми созданы церковци малы круглы. И есть близь себе гробъ Авраамовъ и жены его, Сарринъ; и гробъ Исааковъ и жены его, Ревекинъ, близь себе; гробъ Ияковль и жены его, Ревекинъ, близь себе; гробъ Ияковль и жены его, Илиинъ, близь себе еста.

О ГРОБЕ ИОСИФОВЕ

Иосифа Прекраснаго гробъ[160] вне градка того, кроме пещеры Сугубыя вдалее, яко довержеть до градка того. И то место ныне — Святый Авраамъ. И ту есть близь гора высока, на полуде лиць, отъ Сугубыя пещеры вдалее верста едина; и на ту гору взиде Святаа Троица со Авраамом; до тоя бо горы проводи Авраамъ Святую Троицу от дуба Мамбрийскаго. И ту есть место на верху горы тоя, красно и высоко зело, и на том месте Авраамъ, пад на лици своемъ, поклонися Святей Троици, моляшеся и глаголаше:

О МОЛИТВЕ АВРААМЛЕ

«Господи! Да не погубиши праведнаго с нечестивыми в пагубу! Но аще, Господи, обрящеши 50 праведник в Содоме, не помилуеши ли, Господи, всего града того 50 ради праведникъ?» И рече Господь Авраамови: «Аще обрящу в содомлянех 50 правеникъ, не погублю всего града того, 50 деля праведникь». И паки поклонився Авраамъ Богови и рече: «Аще обрящется в содомехъ 30 праведникъ, не помилуеши ли всего града того?» И рече Господь Богъ Аврааму: «Аще обрящется 30 праведникъ в содомех, не погублю всего града того». И поклонився Авраамъ Господеви, и рече: «Многомилостиве и трьпеливе о беззакониих наших Господи! Да не прогневаешися на мя, раба твоего, и възглаголю еще единою: аще обрящется в содомех 15 праведник, не помилуеши ли, Господи, всего града того, 15 ради праведник?» И рече Господь Богъ къ Авраамови: «Аще обрящется в содомех 15 праведник, не погублю всего града того 15 деля праведник, ни 5 ради праведник, не погублю всего града того». И умолче Авраам, и не приложи к тому глаголати ничтоже. С тоя же горы посла Святаа Троица два аггела в Содом, да изведуть Лота сыновьца Авраамова.[161] Ту, на томъ месте, тогда Авраамъ жертву принесе Богови пшиницею, всыпавъ на огонь; и темъ зоветься место Жертва Авраамова. И есть место то высоко велми, и видети есть оттуда всю ту Хананейскую.

И отъ Жертвы Авраамовы до дебри Грезновы верста едина, а от дебри Грезновыя до гумна Анататова веръста 1.

О ГРОБЕ ЛОТОВЕ, ИЖЕ ВЕ СИГОРЕ

А оттуда до Сигора есть две версте. И ту есть гробъ Лотовъ и обою дщерю его 2 гроба еста. И в той же горе пещера велика, и в ту пещеру въбеглъ Лотъ со дщерма своима. Ту есть градищо близь первых людий, и был на горе той высокь, и то зоветься Сигоръ.