Том 4 (XII век, литература эпохи «Слова о полку Игореве»)

А оттуда есть веръсты вдалее место на взгории, к полуднию лиць от Сигора, и ту стоитъ жена Лотова столпом каменым. А от Жены Лотовы до Содома есть две версте.[162] И то все видехом очима своима, а ногама своима не могохомъ дойти до Содомскаго места, боязни ради поганых. И не даша ны ити тамо правовернии человеци, рекоша ны тако: «Ничтоже вы тамо видети добра, но токмо муку, и смрад исходить оттуду. И болети ти будет, реша ны, от смрада того злаго». Да ту ся възвратихомъ опять къ Святому Аврааму и, благодатию Божиею съблюдаеми, проидохомъ по здраву в Сугубую пещеру, в градок, и ту поклонихся святымъ местом всемъ, и почихом ту два дни. Благодатию Божиею обретохомъ добру дружину многу, идущу въ Иерусалимъ; и ту пристахом мы к нимъ, и идохомъ с радостию с ними безь боязни, и доиддохомъ по здраву святаго града Иерусалима, и похвалихомъ Бога, сподобившаго нас недостойных видети святаа та места, и неизреченнаа, и не сказаннаа.

И есть на полудне лиць отъ Вифлеема манастырь святого Харитона, на той же реце Афамьстей; и есть близь моря Содомьскаго в горах каменых, и пустыни около его. Гроздно и безводно есть место то, и сухо. Есть под ним дебрь камена и страшна зело. Около был весь градом оделанъ, посреде же града того есть 2 церкви, в велицей есть церкви гробъ святаго Харитона.[163] Вне же есть града усыпалница, создана гораздо, и в той усыпальници лежат святии отци, телесы яко живи; и лежит ихъ ту боле 7-сот. Ту лежит святый Кириякъ Исповедник[164] телом весь целъ; ту лежита Ксенофонтова сына, Иоаннъ и Аркадие,[165] и благоюхание чюдно от них исходит. И ту поклонихомся на месте том святомъ, и взидохом я на гору на угь лиць, от манастыря того верста едина вдалее.

И ту место есть равно на ниве, и на том месте всхищен бысть пророкъ Аввакум, идущу ему на поле к женцемъ съ брашном и с водою. И несе его аггелъ в Вавилон к Данилови пророку в ровъ; и ту накормивъ Данила и напоивъ, и паки всхищенъ бысть аггелом; в то же час в том же дни паки опять бысть на том же месте у жнець и дасть им обед.[166] И ныне есть на месте том аки теремець созданъ, знамениа ради. Есть же Вавилон оттуду вдале 40 дний.

И от того места близь церкви велика, клетьски создана, во имя святыхъ пророкъ. И ту есть исподи под церковию тою пещера велика, и в той пещере лежита 12 пророка въ трех раках: Аввакум, Наумъ, Михей, Иезекий, Авдий, Захария, Иезекия, Измаил, Савеиль, Варухъ, Амос и Осий.[167]

И ту есть близь на горе село велико велми, и седят в немь срацини мнози, и христиане суть же ту, въ селе томъ, мнози. И то село есть святыхъ пророкъ: ту ся суть родили святии пророци, и то их есть отчина село то. И ту лежахом нощь едину в селе том, Божиею благодатию храними. И почестиша ны добре в селе том християне. И ту опочивше добре нощь ту и заутра вставше рано, идохом к Вифлеему. Старейшина бо срациньский сам со оружиемъ проводи ны олне до Вифлеема, и та места вся тоже ны проводил. А лапь не дойти до техъ местъ поганых ради: туда бо ходять мнози срацини и разбивають в горахъ тех. И доидохом по здраву о святаго града Вифлеема, и ту поклонихомся Рождеству Христову и, ту почише, идохомъ с радостию въ святый град Иерусалимъ.

ИДЕЖЕ УБИ ДАВЫДЪ ГОЛИАФА

И есть ту место близь Иерусалима, на всток лиць отъ столпа Давыдова яко дострелить, и на том месте уби Давыд Голияда.[168] И есть место подобно близь истерны, и ту есть ныне нива добра.

И оттуда дострела есть вдалее до пещеры, и в той пещере лежат мощи многих святых мученик, избиеных въ Иерусалиме во царство Ираклиево; и зовется место то Агаиа Мамила.[169]

ИДЕЖЕ ВЗРАСТЕ ЧЕСТНОЕ ДРЕВО

И от того места до Честнаго Креста есть врьста едина; и есть место за горою, на запад лиць от Иерусалима, и на том месте посечен есть подножекъ Христовъ, на нем же пригвоздиша пречистеи нозе Господа нашего Исуса Христа. И есть место то градом оделано, и посреде града того создана есть церкви велика вверхъ во имя Честнаго Креста, исписана есть добре вся. И под великым олтарем, под трапезою глубоко, и есть пень древа того честнаго. И утвержено есть велми, и покрыто есть над пнемъ тем дъсками мрамора белаго. И оконце проделано противу древу тому, и есть кругло. И то есть манастырь Иверьскый.

О ДОМУ ЗАРЬИНЕ

И от того манастыря до дому Захариина суть версты 4, и есть место то под горою, к западу лиць от Иерусалима. В тот домъ Захариинъ прииде Святаа Богородица в подгорие къ Иелисавефи и целова Иелисавефь. И бысть, яко услыша Иелисавефь целованье Марьино, и взаграся младенець, радущами въ утробе ея, и рече Иелисавефь: «Откуду се прииде ко мне мати Господа моего? Благословена еси в женах, и благословенъ плод утробы твоея».[170] В том же дому Иоаннъ Предтеча родился есть. И есть ныне на месте том создана была церькви вверхъ. Идуще въ церковь ту, на левей руце под малым олтарем есть пещерка мала, и в той пещере родился Иоаннъ Предтеча. И есть место то было оделано градом каменым все.

О ГОРЕ, ИДЕЖЕ БЕЖА ЕЛИСАВЕФЬ СЪ ПРЕДТЕЧЕЮ