Том 5 (XIII век, литература трагического века)

То слышавъ великий князь Юрьи посла сына своего Всеволода[508] со всими людми и с нимъ кюръ Михайловичь. Батыеви же устремлешюся на землю Суждальскую, и срете и Всеволодъ на Колодне,[509] и бившимся имъ и падъшимъ многимъ от нихъ от обоихъ. Побежену бывшу Всеволоду, исповеда отцю бывшую брань устремленыхъ на землю и грады его. Юрьи же князь, оставивъ сынъ свой во Володимере[510] и княгиню, изииде изъ града, и совокупляющу ему около себе вои, и не имеющу сторожий, изъеханъ бысть безаконьнымъ Бурондаема,[511] всь городъ изогна и самого князя Юрья убиша. Батыеви же стоящу у града, борющуся крепко о градъ, молвящимъ имъ льстью гражаномъ: «Где суть князи Рязаньстии, вашь град, и князь вашь великий Юрьи? Не рука ли наша емши и смерти преда и?»

Услышавъ о семь преподобный Митрофанъ епископъ,[512] начатъ глаголати со слезами ко всимъ: «Чада, не убоимся о прельщеньи от нечестивых и ни приимемь си во умъ тленьнаго сего и скороминующаго житья, но ономь не скоро минующемь житьи попечемься, еже со ангелыи житье. Аще и градъ нашь пленьше копиемь возмуть и смерти ны предасть, азъ о томь, чада, поручьникъ есмь, яко венца нетленьнаа от Христа Бога приимете». О сем же словеси слышавше, вси начаша крепко боротися. Тотаромъ же порокы градъ бьющемь, стрелами бе-щисла стреляющимъ. Се увидевъ князь Всеволодъ, яко крепчее брань належить, убояся, бе бо и самъ младъ, самъ изъ града изииде с маломъ дружины и несы со собою дары многии, надеяше бо ся от него животъ прияти. Онъ же, яко сверпый зверь, не пощади уности его, веле предъ собою зарезати, и градъ всь избье. Епископу же преподобному во церковь убегшу со княгинею и с детми, и повеле нечестивый огньмь зажещи, ти тако душа своя предаша в руце Богу.

Град ему избившу Володимерь, поплени грады суждальские и приде ко граду Козельску. Будущу в немь князю младу именемь Василью. Уведавъши же нечестивии, яко умъ крепкодушьный имеють людье во граде, словесы лестьными невозможно бе града прияти. Козляне же светъ створше не вдатися Батыю, рекше, яко: «Аще князь нашь млад есть, но положимъ животъ свой за нь, и сде славу сего света приимше, и тамъ небесныя венца от Христа Бога приимемь». Тотаром же бьющимся о град, прияти хотящимъ град, разбившимъ граду стену, и возиидоша на валъ татаре. Козляне же ножи резахуся с ними. Светъ же створиша изиити на полкы тотарьскые, и исшедше изъ града, исекоша праща ихъ, нападше на полъкы ихъ, и убиша от татаръ 4 тысящи, и саме же избьени быша. Батый же взя городъ, изби вси, и не пощаде от отрочать до сосущих млеко. О князи Васильи неведомо есть, и инии глаголаху, яко во крови утонулъ есть, понеже убо младъ бяше есть. Оттуду же ву татарехъ не смеють его нарещи град Козлескъ, но град злый, понеже бишася по семь недель. Убиша бо от татаръ сыны темничи три.[513] Татари же искавше и не могоша ихъ изнаити во множестве трупъ мертвыхъ.

Батыеви же вземшю Козлескъ, и поиде в землю Половецькую. Оттуда же поча посылати на грады русьскые и взять град Переяславль[514] копьемь, изби всь, и церковь архангела Михаила скруши, и сосуды церьковьныя бещисленыя, златыа и драгаго каменья взятъ, и епископа преподобнаго Семеона[515] убиша.

В то же время посла на Черниговъ, обьступиша град в силе тяжце. Слышавъ же Мьстиславъ Глебовичь нападение на град иноплеменьных, приде на ны со всими вои. Бившимъся имъ, побеженъ бысть Мьстиславъ, и множество от вои его избьенымъ бысть, и градъ взяша и запалиша огньмь. Епископа оставиша жива и ведоша и во Глуховъ.

Меньгуканови[516] же пришедшу сглядатъ града Кыева. Ставшу же ему на оной стране Днепра во Градъка Песочного,[517] видивъ град, удивися красоте его и величеству его, присла послы свои к Михаилу и ко гражаномъ, хотя е прельстити, и не послушаша его.

В лето 6746. Михаилъ бежа по сыну своемь передъ татары Угры, а Ростиславъ Мьстиславичь Смоленьского[518] седе Кыеве. Данилъ же еха на нь, и я его, и остави в немь Дмитра,[519] и вдасть Кыевъ в руце Дмитрови обьдержати противу иноплеменьныхъ языкъ, безбожьныхъ татаровъ.

...яко бежалъ есть Михаилъ ис Кыева в Угры, ехавъ я княгиню его[520] и бояръ его поима, и город Каменець взя. Слышавъ же се Данилъ, посла слы река: «Пусти сестру ко мне, зане яко Михаилъ обеима нама зло мыслить». И Ярославъ услыша словеса Данилова, и бысть тако, и приде к нима сестра, к Данилу и Василку, и держаста ю во велице чести.

Король же не вдасть девкы своей Ростиславу[521] и погна и прочь. Идоста Михаилъ и Ростиславъ ко уеви своему в Ляхы и ко Кондратови.[522] Присла бо Михаилъ слы Данилу и Василку, река: «Многократы согрешихо вам и многократы пакости творях ти. Что ти обещахъ и того не створих. Аще коли хотяхъ любовь имети с тобою, невернии галичане не вдадяхут ми. Ныне же клятвою клену ти ся, яко николи же вражды с тобою не имамъ имети».