Том 5 (XIII век, литература трагического века)

Оттуда король поиде ко Володимерю. Пришедшу же ему Володимерю, дивившуся ему, рекъшу, яко: «Така града не изобретохъ ни в немечкыхъ странахъ!» Тако сущу, оружьникомъ стоящимь на немь, блистахуся щити и оружници подобни солнцю. Мирославъ же бе во граде; иногда же храбру ему сущю, Богъ ведать, тогда бо смутися умомъ, створи миръ с королемь, бе-света князя Данила и брата его Василка. Рядомь же дасть Белъзъ и Червенъ Олександру, королеви же посадившу сына своего Андрея в Галичи, светомъ неверьныхъ галичанъ. Мирославу же запревъшуся, яко: «Рядомь Чьрвьна не предалъ есми». Порокъ же ему имуще великъ от обою брату: «Пошто миръ створи, сущю ти с великими вои!»

Королю стоящу во Володимери, князь же Данилъ прия великъ пленъ, около Бозку воюя. Король же воротися Угры.

Володимеръ же посла Данилови река: «Идеть на мя Михаилъ, а помози ми, брате!» Данилови же пришедшу створити миръ межи има. Данилъ жь из Руской земля взя собе часть Торцький, и паки да и детемь Мьстиславлимъ, шюрятомъ своимъ. Рекъ имъ: «За отца вашего добродеанье приимете ни держите Торцький городъ».[469]

По тех же летехъ движе рать Андрей королевичь на Данила и иде к Белобережью.[470] Володиславу же ехавшу во стороже от Данила ис Кыева, и стрете рать во Белобережьи. И бившимся имъ о реку Солучь[471] и гониша до рекы Деревное[472] из леса Чертова.[473]

Приде весть Кыеву Володимеру и Данилови от Володислава. Рекшу же Данилу князю Володимеру: «Брате, ведаюче обею наю идуть наю. Пусти мя, да поиду имъ взадъ». Они же, уведавше, возвратишася к Галичю.

Данилови же снемшуся с братомъ и постиже и у Шумьска, и повестоваста с ними о реку Велью.[474] Бе бо с королевичемь Олександръ и Глебъ Зеремиевич, инии князи Болоховьсции и угоръ множество. Видевшу же ся Данилу о реку Велью с королевичемь, и некое слово похвално рекшу, егоже Богъ не любить. Наутрея же переидеть реку Велью на Шумьскъ и поклонився Богу и святому Семеону, исполчивъ полкы свое, поиде ко Торчеву.[475] Уведав же Андрей королевичь, исполчивъ полыкы свое, иде противу ему, сиречь на сечю. Идущу ему по ровни, Данилови же и Василкови съехати бе со высокихъ горъ; и инии же браняху, да быхомъ стали на горах, браняху сохода. Данилови же рекшу: «Якоже Писание глаголеть: "Мьдляй на брань страшливу душю имать"».[476] Понудивъ ихъ, ускори снити на не.

Василкови же идущу противу угромъ, а Дьмьяну тысяцькому идущю и инемь полкомъ многимъ ошуюю, Данилъ же идяше полкомъ своимъ посреди. Велику же полку бывшю его, устроенъ бо бе храбрыми людми и светлымъ оружьемь. Онемъ же видящимъ, не хотяхуть сразитися с нимъ, но клоняхуться на Дьмьяна и на иные полкы. Приехавшимъ же соколомь стрелцемь[477] и не стерпевъшимъ же людемь, избиша е и роздрашася. Дьмьянови же сразившуся со Судиславомъ князю же Данилови заехавъшу в тылъ имъ, и бодущим е, Дьмьянови же мнящу, яко все ратнии и суть и возбегоша пред нимъ. Данилъ же вободе копье свое[478] в ратьного, изломившуся же ся копью, и обнажи мечь свой. Позревъ же семь и семь и види стягъ Василковъ стояще и добре борющь и угры гонящу, обнаживъ мечь свой, идущу ему брату на помощь, многы же язви, и инии же от меча его умроша. Снемшеся с Мирославомъ и видевъ, яко угре сбираються, и ехаста на не два. Онем же не стерпевшим оскочиша, другим же приехавшимъ и сразившимся, и ти не стерпеша. Гонящимъ же има разлучистася. Потом же видивъ брата добре борющася, и сулици его кроваве сущи, и оскепищю исечену от ударенья мечеваго.

Въ лето 6740.[479] Глебъ Зеремеевичь собравъ угры приеха на стягъ Василковъ. Данилови жи приехавши к нимъ и понужаюшу ихъ, и никого не веде въ нихъ воиника, но отрокы держаща коне. Онем же познавшимъ и и хотящимъ мечи посечи конь его. Милостивому же Богу безъ язвы изнесъшу и из ратныхъ, якоже от конца остроты мечевыи шерьсти претяте бывши на стегне коня его. Приехавъ же к нимъ, понужаше свое ехати на не.

Василковъ полкъ гнаше угры до становъ и стягъ королевича подътяли беаху, друзии же многи угре бежаща, оли во Галичь становишася.

Стоящим же симь на горе, и симъ на удолъ. Данилови же и Василкови понужающима людий своихъ соехати на не. Богу же тако извольшу за грехы: наворотися дружина Данилова на бегъ, онем же не смевшимъ гонити, и не бысть пакости во полкохъ Даниловых, разве техъ убьеных пяти.

Данилови же наутрея собравшуся, не ведаше о брате, с кимъ кде есть. Королевичь же обратися в Галичь, зане бе уразъ великъ в полкохъ его: инеи же угре бежаша, оли в Галичи становишася.

И бысть брань велика во день тъ. Техъ бо падшихъ много угоръ, а Даниловыхъ мало бояръ, ихже имена се быша: Ратиславъ Юрьевичь, Моиси, Степанъ, брать его, Юрьи Яневичь.

Потом же Данилъ уведавъ брата своего во здарвьи, не престаяшеть строя на не рать.

Бе бой Торцьвьскый в Суботу великую.

Потомь присла Олександрдъ ко брату Данилу и Василку: «Не лепо ми есть быти кроме ваю!». Она же прияста и с любовью.