Том 5 (XIII век, литература трагического века)

И свершившим же ся днемъ рождению, родиста блаженаго детища, таче въ осмый день принесоста къ святителю божью, яко же обычай есть христианомъ, имя детищу нарещи. Прозвитеръ же, видевъ детища, сердечныма очима и благодатью Божиею прозряше о немъ, яко хощеть измлада Богу датися. Таче минуша 40 дни детищу, крещениемъ освятиша и. Отрочя же ростяше и кормимо родителема своима, и благодать Божиа бе с нимъ,[5] и Духъ Божий измлада в онь вселися. И егда же бе отрочатемъ Христовою благодатью въ возрастъ смысла пришедшу, родителя же его даста и книгамъ учити. Не бо унывааше, яко и прочая дети, но скорымъ прилежаниемъ извыче, к сему же на игры съ инеми не исхожааше, но на божественое и на церковное пение и почитание преже инехъ притекая, яко о семъ родителема радоватися, а инемъ чюдитися таковому детища разуму. Господня бо бе благодать на немъ, просвещающи разум его и наставляющи на путь заповедей Христовыхъ. Егда же въ болший възрастъ прииде, всею телесною красотою и добротою яко светъ сияше. Родителема же его къ браку принужающимъ, но тъй самъ не въсхоте, но паче поучивъ ею и наказавъ презрети и възненавидети житейскую сию славу, прелесть мира сего, и въсприяти мнишескый чинъ.

Тема же отшедшима житиа сего къ Богу, онъ же повелику обрадовася и дасть Богу славу, тако изволшему, богатьство же, яже остависта родителя его, убогымъ раздаде, вдовицамъ и сиротамъ, и черноризцемъ все, бояся, и како бы бес печали всехъ земныхъ отъити и наставити мысль свою къ Богу, и утвержая, и уча ся Господню словеси, глаголющему: «И аще кто не възметь креста своего, не поидеть въследъ мене, несть мне подобенъ».[6] Богодухновеныя же книгы и святыхъ житиа почитая, и како бы ихъ житиа и труды, и подвигъ въсприяти, изменися светлыхъ ризъ и в худыя ся облече, и хожааше яко единъ отъ нищихъ, и на уродство ся преложь, и расмотряя, и прося, и моляся Богу, како бы спастися и в кое место приити. И утаився всехъ, Богу наставляющу, отшедъ отъ града дале 5 поприщь,[7] острижеся, яко же мнози ведятъ святые Богородици монастырь, къ въстоку, Селища нарицають.[8] И бысть оттоле по благодати Христове болий на подвигъ, и на вся труды подвизаяся, и мыслью въспоминая святаго града Иерусалима и гробъ Господень, и вся честная места иже избавитель Богъ и Спасъ всего мира иде же страсть приятъ нашего ради спасениа, вся честная места, и преподобныхъ отець пустыня, иде же суть подвигъ и трудъ свершивше; дивнаго началника всемъ и восиявшаго, ангеломъ равна, великаго меню Антониа, бывшаго крепка, храбра и победившаго силою крестною духы неприязненыя,[9] Илариона, бывъшаго ученика его; по немъ светлаго в постьницехъ чюдотворца Еуфимья;[10] иже по нихъ Саву и Феодосья архимандрита[11] ... старейша всехъ наставника черноризцемъ, сущимъ окрестъ Иерусалима.

Изъ всехъ любя часто почитати учение преподобнаго Ефрема[12] и великаго вселеныя учителя Иоанна Златоустаго,[13] и Феодосия Печерьскаго,[14] бывшаго архимандрита всеа Руси. И вся же святыхъ богодухновенныхъ книгъ житиа ихъ и словеса проходя и внимая, почиташе день и нощь, беспрестани Богу моляся и поклоняяся, и просвещая свою душю и помыслъ. И кормимъ словомъ Божиимъ, яко делолюбивая пчела, вся цветы облетающи и сладкую собе пищу приносящи и готовящи, тако же и вся отъ всех избирая и списая ово своею рукою, ово многыми писци, да яко же пастухъ добрый, вся сведый паствы и когда на коей пажити ему пасти стадо, а не яко же невежа, неведый паствы, да овогда гладомъ, иногда же по горамъ разыдуться, блудяще, а инии отъ зверей снедени будуть. Тако всемъ есть ведомо невежамъ, взимающимъ санъ священьства. Тако же и корабленикъ, и хитрии кормници, ведуще путь и пристанище ихъ, милости ожидающе отъ Бога и подобна ветра, а не противу бури и волнамъ морьскымъ, но съ Божиею помощью како ити нареченнаго града бес пакости и потопления. Аще ли в градъ далний хотяще поити, тъ ведущихъ просимъ, егда суть пути различнии и места сущихъ разбойникъ, и того всего боимся и молимъ Бога, дабы безъ всякоя беды дойти.