Том 5 (XIII век, литература трагического века)

И оттоле вниде въ градъ, и пребысть въ единомъ монастыри у Честьнаго Креста.[17] И ту начаша боле приходити, и учение его множайшее быти, а врагъ сетоваашеся, а Господь Богъ раба своего прославляаше и съблюдааше на всяко время, благодать и силу подавая рабу своему. И пребысть мало время, и отъ многъ приемля утешение: подавааху ему на потребу и лише потребы, и потомъ скоро раздаваше вдовицамъ и нищимъ, а самъ еже на потребу собе приимаше. Украси же церковь иконами, и завесами, и свещами, и мнози начаша отъ града приходити и послушати церковнаго пениа и почитаниа Божественыхъ книгъ. Бе бо блаженый хитръ почитати, дасть бо ся ему благодать Божиа не токмо почитати, но протолковати, яже мноземъ несведущимъ и отъ него сказаная всемъ разумети и слышащимъ; и сему изъ устъ и памятью сказая, яко же ничто же ся его не утаить Божественыхъ писаний, яко же николи же умлъкнуша уста его къ всемъ, к малымъ же и к великымъ, рабомъ же и свободнымъ, и рукоделнымъ. Тем же ово на молитву, ово на церковное пение, ово на утешение притекающихъ, яко и в нощи мало сна приимати, но коленное покланяние и слезы многы отъ очью безъ щука излиявъ, и въ перси биа и кричаниемъ Богу припадая помиловати люди своя, отвратити гневъ свой и послати милость свою, и належащимъ бедъ избавити ны, и миръ и тишину подати молитвами пречистыя девы Богородица и всехъ святыхъ. Написа же две иконе: едину Страшный судъ втораго пришествиа, а другую испытание въздушныхъ мытарьствъ, их же всемъ несть избежати, яко же великый Иоанъ Златаустъ учитъ, чемеритъ день поминаеть, и самъ Господь, и вси святии его се проповедають, его же избежати негде, ни скрытися, и река огнена предъ судищемъ течеть, и книгы разгыбаются, и Судии седе, и дела открыются всехъ. Тогда слава и честь, и радость всемъ праведнымъ, грешным же мука вечная, ея же и самъ сотона боится и трепещеть. Да аще страшно есть, братье, слышати, страшнее будетъ самому видети. Се же оставльше, на се пакы обратимся, яже о блаженемъ Аврамьи.

И сего убо не престааше Страшнаго поминая суда, испытаниа бояся, и не престая прилежно Бога моля и в нощь, и въ день, и къ всемъ приходящимъ оного страшнаго дне не престая о томъ глаголя и почитая великаго оного и светлаго учителя вселеныя Иоана Златаустаго и преподобнаго Ефрема, и всехъ богогласныхъ святыхъ, Святаго Духа, глаголанаго ими, собе внимая и всемъ проповедая. И бе блаженый съ въздерьжаниемъ отъ многаго пития, пьяньства же отинудь ненавидя, ризы же по смирению любя, драгыхъ велми бегая и смирение присно имеа. На трапезы же и на пиры отинудь не исходя многыхъ ради зазираний, яже бывають отъ места избирающихъ, и инехъ ради многыхъ, яже бывають отъ многаго ради пьяньства и беды, и того ради сего убегааше. Образъ же блаженаго и тело удручено бяше, и кости его, и състави яко мощи исщести, и светлость лица его бледъ имуще отъ великаго труда и въздержания, и бдения, отъ многъ глаголъ, яже тружаашеся, поя и почитая, и молитву принося къ Богу. И къ божествному егда приступаше жертвенику на божествное приношение отъ Господа преданую апостоломъ на вечери, и апостолы намъ оного завета въ оставление греховъ, съ благобоязньствомъ и съ вниманиемъ, отинудь запрещаще же въ церкви не глаголати, паче же на литургии, и заповедая, и уча, всю имети веля мысль и съ душею тогда къ Богу стройно же, по чину, лепо. Егда устраяшеся въ священчьскый санъ, образъ же и подобье на Великого Василья:[18] черну браду таку имея, плешиву разве имея главу. Но не зазрите ми, братье, моей грубости, не лжа бо си глаголю или какою хытростью, или мудростью, но многыхъ ради, иже его не видеша и не слышаша. И въспоминаю Господа, глаголюща: «Рабе ленивый и лукавый! подобааше ти дати сребро мое купцемъ, да азъ быхъ на нихъ взялъ с лихвою».[19] Темъ, бояся сего осуждениа, сия написаю, да сего послушавше, прославимъ Бога, давшего сию благодать и помощъ граду Смоленьску, блаженаго Авраамья.

Хотящу же ми и еще глаголати, помозете ми в молитвахъ вашихъ, да ми подасть Господь и конець свершити — положити хотящимъ почитати и поревновати житью преподобнаго или преписати и велику отъ Бога милость прияти сде и въ будущий и страшный день възданиа Христова.