Том 5 (XIII век, литература трагического века)

Видевше же сия тако отъидоша и яко несть имъ конца, в чемъ осудити и, и реша отъ епископа на се приготованнымъ крепко стреши и и блюсти и и ина два отъ ученикъ его, иже преподобному служаща добре. Наутрия же събравшимся игумени и ереи, и вины, яже преже глаголааху, укоривше, озлобивше, възложиша на нь. И отъ того времене пакы вниде в монастырь, иде же бе преже остриглъся блаженый, яко не приемшу ему никоего зла. Се же от сего времене многа зла пребысть: елико бяше блаженнымъ научено, вси ти обратишася на своя дела злыхъ грехъ. И слава Богу, терпящему сихъ всехъ! И еще тогда блаженому Лазарю иереемъ сущу и по Игнатьи епископу бывшу, истинною рещи, яко поборникъ и пастухъ Христовы церкве словесныхъ овець, сьй бо беаше Бога ради оставилъ епискупью свою и за многое обидение святыхъ церквей иже обидятъ и властели, отъимающе чюжая бес правды и обидящихъ вдовица и сироты. Сьй бо виде и слыша, яко вся бес правды, яже на блаженаго Авраамиа ону крамолу въздвигнули, Богу убо о семь възложившу, сьй пришедъ глагола къ епископу Игнатию: «Великой есть быти опитемьи граду сему, аще ся добре не опечалиши»; яко же и бысть. Блаженый Игнатий сего послуша, скоро посла по всемъ игуменомъ и к всемъ попомъ, заповедая и запрещая всемъ отъ всякого речениа зла престати, яже на блаженаго Авраамия. «Се бо, послушавъ васъ, на ся отъ Бога въсприяхъ въ векы опитемью. А вы, чада, покайтеся, а сами весте, что прияша отъ Бога въставшеи на великого Иоана Златаустаго;[25] аще же не покаетеся, то то же и вы подъимете». Сего же ради блаженый имя нареклъ себе, своего святьца подражая,[26] яко же бо и онъ, подражая, много пострадалъ отъ оноя веси и за ня моляся Богу обращая вся къ Богу и спасая, блаженый же терпя ихъ запрещение.

Тако же бе и сему ихъ запрещение, яко и никому же не приходити к нему, мнози же мечници на всехъ путехъ стрежааху, а неции разграблени быша. Богу же хотящу всемъ спастися, овогда же человеколюбие свое и милость являеть, овогда же казня, беда дая: глады, смерть, бездождье, сушу, туча тяжкыя, поганыхъ нахождениа, градъ пленение и вся, яже на ны отъ Бога приходятъ. И теми обращая и приводя к собе, да не бо есмы безъ греха, а терпяще сихъ, рассудимъ, помянемъ, колико злыхъ яже сътворихомъ и забытью предахомъ, в нощи же и въ день съгрешающе. Овии осужаютъ и хулятъ святителя и ереа, и черноризца, а сами яко безъ греха суще; а слышасте Господа, глаголюща: «Святителя моя, и черноризца, и ереа честьно имейте и не осужайте ихъ»,— да не сами отъ Господа приимете горкый судъ; да не забудете Господа, заповедающа, рече бо Господь: «За весь празднъ глаголъ въздати есть слово въ день судный».[27] А Павелъ апостолъ, вселеныя учитель, глаголеть: «Что осужаете чюжаго раба? Своему господину или стоить, или падаеть, или въстанеть; силенъ же Господь поставити и»;[28] и пакы: «Ихъ ради приходить гневъ Божий на сыны непокоривыя».[29] Тем же внимай мы кождо себе: кождо за ся въздати имать слово въ день суда.

Достойно же есть и сде помянути слово, яже отъ житья преподобнаго Савы и о патриарсе Ерусалимъстемъ Ильи,[30] его же Анастасьй царь бес правды повеле изгнати отъ престола, иного в него место възведе. Яко же се услышаша въ Иерусалиме гражане, яко изгнанъ бысть патриархъ, и зело порадовашася сему, яко за то прииде на ня гневъ Божий и бысть на ня 5 летъ глада, да накажуться не радоватися о зле ни о коемъ же. Яко же приити иконому къ преподобному Саве и глаголати: «Уже суть братья не ядше всю неделю, да уже есть намъ не ударити в трапезе било». И преподобный же Сава, утешая, глаголаша, яко «не имать Богъ презрети рабъ своихъ». По глаголу же преподобнаго бысть: некто христолюбецъ 30 велблудъ имеа, яже къ блаженому посла въ лавру, всякого брашна наполнивъ до изъобилья. Яко же призва иконома Сава и глагола к нему: «Есть ли ударити въ било?» Икономъ же повелику похули себе. А и еже о цари Анастасьи рекохомъ, иже патриарха Илью съ престола отгна, и гневъ за то постиже Божий, яко сказають смерть его: яви бо ся облакъ и молниа разве о полате цареве, тако гонимъ, убьенъ бысть гневомъ.