Том 5 (XIII век, литература трагического века)

И оттоле нача пребывати в первемъ подвизе, и всемъ же притекающимъ с радостью великою, ибо велиа благодать Божиа на граде, вся просвещающи, и веселящи, и хранящи, избавляющи, тишину же и мир, и всехъ благыхъ на многа лета подающи, и еще не оскудети имать молитвами святыя Богородица и преподобнаго ради Авраамия и всехъ святыхъ его. И оттоле прослави и Господь боле, зане же зле блаженаго оскорбивше обращатися начаша и припадати на ногу, просяще прощениа. Иже всеми ненавидимъ бывъ, всеми любимъ бысть, да иже преже бояхуся приити, то убо не боящеся, но радующеся приходяху, не точью гражане едини приходяху, но съ женами и съ детьми, но и отъ князь, и отъ вельможь работнии же и свободнии притекааху, вси своя грехы к нему исповедающи, и тако отхожааху в домы своа радующеся. Приемь же блаженый домъ святыя Богородица и украси ю яко невесту красну же, яко же и преже и боле, рцемъ, иконами и завесами, и свещами; яко же и ныне есть видети и всемъ притекающимъ в домъ ея милости и заступлению, въ хвалу Богу и угодника его. Мнози же хотяху быти черноризцы, но не ту абие постризааше, ведый трудъ, искушение велико отъ общаго всего врага, и се братьи числомъ 17. Сице же блаженый искушааше отъ Христовы благости,— вся бо ему Господь откровенно даяше разумети,— жити хотящимъ и к нему притекающимъ, тако отвещевая: глаголаше къ послушливымъ и смеренымъ, веля имъ часто притекати к собе, елико бо ихъ отъ златолюбьства и злобы, техъ удаляшеся. Сице бо и отъ своихъ напастий много, и отъ черноризець приимаше искушение, да того ради скоро не приимаше и. Искушаше же сице, ведый по книгамъ, но слыша некоего игумена сице бывша, точью до 12 числомъ имяше мнихъ, два же въ искусе. А егда кто хотяше отъ него пострищися, то знаменаше преже, къ коему брату внидеть: да аще поидяще къ подвижну брату, то стоя славяше Бога, руце въздевъ и о немъ моляся къ Господу, аще ли не къ такому, то печаленъ бываше. То же на собе блаженый помышляше, ведый, яко нудьно есть ленящимся сий подвигъ черноризьцемъ, а подвизающимся рече Господь: «Възмете иго мое на ся, и научитеся отъ мене: яко кротокъ есмь и смиренъ сердцемъ; и обрящете покой душамъ вашимъ и утешение. Ибо яремъ мой благъ, и бремя мое легко есть»,[39]— всемъ притекающимъ к тобе истиннымъ сердцем.

Велику же любовь потомъ стяжаста блаженая: епископъ радоваашеся, яко таковаго дарова ему Богъ свята и блаженна мужа, Авраамий же радоваашеся, яко тако дарова ему Богъ свята и блаженна епископа; Авраамий же пакы радовашеся, яко такъ даръ благодати приемъ от него. Мало же по такой любви поживъ епископъ, и преставися къ Богу, по правде рещи, воистинну святу и преподобну и къ Богу тако подвизався, отъ уности потрудився и до самоя седины великаго священичьства. И тако преставися къ Богу святитель великый Игнатий града Смоленьска, яко же въ преставленьи его мнози поведають о немъ, глаголюще, яко великъ светъ сниде на нь съ небесе, яко и страхъ нападе на вся, и тако взиде радуяся на небеса, свершивъ течение добре о Господе Бозе. И вси въпросимъ милости от Бога, да помилует ны по милости своей, яко дарова святителя таковаго граду сему. И оттоле боле начатъ подвизатися блаженый Авраамий о таковемъ разлучении преподобнаго въ смерении мнозе и въ плачи отъ сердца съ воздыханиемъ и съ стенаньми, поминааше бо о собе часто о разлучении души от тела. Блаженый Авраамий часто собе поминая, како истяжуть душу пришедшеи аггели, и како испытание на въздусе отъ бесовьскыхъ мытаревъ, како есть стати предъ Богомъ и ответъ о всемъ въздати, и в кое место поведутъ, и како въ второе пришестие предстати предъ судищемъ страшнаго Бога, и какъ будеть отъ судья ответъ, и како огньная река потечетъ, пожагаюши вся, и кто помагая будеть развеи покаяниа и милостыня, и беспрестанныя молитвы, и кто всемъ любы, и прочая иная дела благая, яже обретаются помагающия души. Мы же сего ни на памяти имамы, но ово о семь, а другое о иномъ станемъ, не имуще ни единого слова отвещати предъ Богомъ.

Пребысть же блаженый в таковемъ подвизании вся дни летъ живота своего, о семь бдя и моляся съ въздыханиемъ, многы же научивъ и наказавъ пребывати въ добремъ труде, въ бдении же и въ молитве, въ терпении же и смирении, въ милостыни же и въ любви. И сице утверди вся съ слезами многами сихъ не забывати николи же и глаголаше: «И мене смиренаго не забывайте въ молитвахъ вашихъ, молящися Владыце и Богу и пресвятей его Матери съ всеми святыми его». И потомъ болезни на блаженаго нашедши, и тако преставися, предавъ блаженую и святую свою душю Господеви, его же желааше и получи, царьство небесное. И пребысть блаженый Авраамий подвизаяся летъ 50, подвизаяся отъ уности до конца живота своего о Христе Исусе Господе нашемъ, ему же слава и дръжава съ Отцемъ и Святымъ Духомъ ныне и присно въ вся бесконечныя веки. Аминь.