Том 5 (XIII век, литература трагического века)

А се конець блаженаго и преподобнаго отца нашего Авраамиа и похвала граду сему, и заступление пречистей Богородици приснодеве, и похвала. Азъ же грешный и недостойный Ефремъ и в лености мнозе пребывая, и в последний всехъ, и празденъ, и пустъ бывъ всехъ благыхъ делъ, разве въ праздно имя облекохся, въ аггельскый сий санъ, именемъ черноризець нарицаюся, делы же злыми далече его отстою. А како нарекуся, абы последний нарещися не могу, дела бо злая, яже сдеяхъ, обличають мя и стужають, тем же последний въ житии и блаженому, рцемъ, быхъ ученикъ, иже ни по малу быхъ последуя житию, терпению, смирению, любви и молитве и всехъ его благыхъ нравовъ и обычай, но по вся дни пианъ и веселяся, и глумяся в неподобныхъ делехъ, иже въ правду быхъ празденъ. Онъ умиленый плачася, азъ же веселяся и глумляся; онъ иже на молитву и почитаниа Божественыхъ книгъ, на славословие въ Божию церковь тщася, азъ же на дремание и на сонъ многъ; онъ еже трудитися и бдети, азъ празденъ ходити и в лености мнозе, онъ еже непразденъ ходити, азъ же в лености мнозе; онъ еже не празднословити и не осужати, азъ же осужати и празднословити; онъ же страшный судный день Божий поминая, азъ же трапезы велиа и пиры; онъ паметь смертную и разлучение души отъ телеси, испытание въздушныхъ мытаревъ, азъ же бубны и сопели, и плясаниа; онъ еже подражати житие святыхъ отецъ и подобитися благому житью ихъ, и почитая святая жития ихъ и словеса, азъ же быхъ подражая и любя пустотная и суетная злыхъ обычая; онъ еже смирити себе и уничижити, азъ же веселитися и гордети; онъ нищету любя и безъименьство и вся раздавая требующимъ и сиротамъ, азъ еже събрати и не подати, побеженъ отъ многыя скупости и немилосердия; онъ по смерению ризы любя, азъ же красны и многоценны; онъ рогоже положи и постелю жестоку, азъ же постелю мяхъку и теплу; и не могый терпети студени и мраза и стерпяше, азъ же баню имеа утешену и теплу; онъ о нищихъ тужа, изволя самъ алченъ быти и не вкуся, азъ же отинудь ихъ ненавидя и презря; онъ нагыхъ видевъ плещу и неоденыхъ, мразомъ изъмерзъшихъ, оде, азъ же не вемъ, яко ти тако же отъ тоя же утробы произыдоша, и еще же мнози, утаившися, страньствують Господа ради, яко же рече Павелъ апостолъ, вселеныя учитель: «Их же ни весь миръ имать, яко ходиша въ овчинахъ и в козьяхъ кожахъ, заблужающе и скрывающеся по вселенней, не имуще ни дому, заблуждающе въ верьтепехъ и в пещерахъ земныхъ».[40]

Сего ради, господье, и отци, и братья, не могу дивнаго и божественаго, и преподобьнаго образъ и подобие похвалити, грубъ и неразуменъ сый, оного бо образъ светелъ, и радостенъ, и похваленъ, образъ же мой теменъ и лукавъ, и мерзокъ, и безстуденъ, аще хощу, не достигну. Како имамъ похвалити? Прошу милости, помощи отъ Господа и все упование имеа, надежу и помощь възлагаю на пресвятую и пречистую деву и Богородицю Марию, та бо имать боле всехъ дръзновение къ Сыну и Богу нашему Исусу Христу, молящися съ всеми бесплотными силами и съ всеми святыми, могущи мя спасти и избавити отъ всехъ бедъ. И та ми есть помощница и поручница животу и спасению, и зде и въ будущий день, та бо весть избавити и подати помощь своимъ рабомъ, елико и когда требуемъ ея на помощь, в доме, и на пути, и на мори, въ буряхъ и волнахъ, и на бранехъ, и въ всехъ бедахъ скорее молниа обретающися на помощь, в нощь же и во день, и на всякъ часъ изъбавляющи и хранящи отъ всехъ съветъ, сотонинъ, глаголю, и всехъ его демонъ, и отъ всякоя крамолы, и поганыхъ нашествия, и всехъ съветъ и съвещаниа испроверьзи. Святителя и черньца, и всего церковнаго чина, и сонма, князя же, и вся христианы въ молитве, Госпоже, испроси, пресвятая и приснодево Богородице Марие, Сына своего и Бога нашего молящи прилежно за порученное тебе стадо новыхъ людий, яже избра Сынъ твой и Богъ нашь Исусъ Христосъ, иже прииде на землю, родися отъ пречистыя ти утробы, и бысть Богъ и человекъ, и страсть, и смерть приятъ, яко же изволи, тако и бысть, и отъ гроба въскресъ, и царьство адово испровергь, и на небеса къ Отцю възыде, и раздруши всю неприязнину силу. И тако раздруши ныне измаилтескыя языкы,[41] разсыпли и расточи, яко прахъ отъ гумна ветру, молитвами пречистыя ти Матери, и възвесели новыя люди избранное стадо, гневъ свой устави, избавление и милость подати, да и еше прибудеть, твоею храними милостью, Вседръжителю Господи, да не ркуть языци, где есть Богъ их, но услыши и приими молитву всехъ молящих ти ся, иного бо упованиа и помощи не имамъ разве тебе.