Том 5 (XIII век, литература трагического века)

Тогда блаженный Игнатий въскоре посла по блаженаго Авраамия, и призвавъ, и испытавъ, яко все лжа и оглаголание по зависти и злобе диаволи бысть, и прости и, глаголя: «И благослови, честный отче, за неведение мое се ти сътворихъ, и весь градъ благослови, и прости послушавшихъ лживыхъ клеветникъ и оглагольникъ». И благослови пакы пречистую и честную литургию съвершати: «И моли Бога о граде и о всехъ людехъ, да помилуеть Господь и подасть богатно дождь свой на земьлю». И глагола блаженый къ святителю: «Кто есмь азъ грешный, да сице повелевае ми выше силы моея?» Но глагола: «Воля Божиа да будеть о всехъ насъ! И ты преже о насъ помолися, честный о святителю, о своемъ ти богопорученемъ избраннемъ святемъ стаде словесныхъ овець». Отшедшу же блаженому и молящуся Богу, и глаголющю: «Услыши, Боже, и спаси, владыко Вседръжителю, молитвами твоего святителя и всехъ иерей твоихъ, и всехъ людий твоихъ. И отврати гневъ твой отъ рабъ твоихъ, и помилуй градъ сьй и вся люди твоя, и приими милостиве всехъ въздыхание и съ слезами молящих ти ся, и пусти, и одожди, напои лице земли, человекы и скоты възъвесели. Господи, услыши и помилуй!» — еще преподобному не дошедшу своея келия, одожди Богъ на землю дождь, яко славити Бога всемъ и глаголати: «Слава тебе, Господи, яко скоро послуша своего раба!» И бысть многа радость въ граде. И оттоле начаша притекати въ градъ, и вси глаголати, яко «помилова Богъ, избави ны отъ всехъ бедъ твоими, господи отче, молитвами». И отселе боле просветися по благодати Христове.

Лепо же есть помянути и о житьи преподобнаго отца Феодосья Печерьскаго[34] всеа Руси. Хотя Богъ веру раба своего явити и отъ того места на другое преселити, и пресветлейшу и пространнейшу церковь възградити и уже умножившися братьи, и показа Богъ чюдо в нощи, яко сказують, рекуще: бысть яко дуга въ образъ отъ верха церковна, а другый холмъ конець еа, и преподобнаго отца Феодосия идуща съ иконою пречистыя Богородица и братьи въследъ идуща и поюща, яко же и бысть потомъ. Тако же ныне помянемъ о преподобнемъ Авраамии и о молитве пресвятыя Богородица, и братьи въследъ идущи и поюща, яко же и бысть потомъ, и хотящимъ показати место, на нем же блаженый о Бозе хощетъ жити, и инемъ мноземъ, иже имуть с нимъ спастися. Преподобный и благочестивыый Игнатий епископъ мышляше создати церковь камену въ имя святаго Игнатья, в память собе, и есть въне града и таково суще место близь и равьно, угодно на поставьление церкве и вся могуще въсприяти рядъ монастырескъ. И скупи ограды овощныя окрестъ его, и постави церквицю во имя Богоносца,[35] и потомъ ту раздрушивъ и на ино место пресели, и основа болшу, и нарече во имя святое владычица нашеа Богородица Положение честные ризы и пояса.[36] И быша в немъ неколико братье, блаженымъ питаеми епископомъ Игнатием. Некотории же буяци несмыслении уничижаху, глаголюще: «Аще хощетъ кто, да идеть на игуменьство», имя нарицающе. Преподобный же епископъ к мнозем глаголаше и благодатию же Божиею прозря духовныма очима, яко имать прославити Богъ место се и молитва пресвятыя Богородица, и мнози имутъ в немъ спастися о Христове Благодати о Бозе, пребывающе и в немъ притекающе христолюбивии людие. По мнозе же времени, Богу о семъ промысляющу, стужаше же бо в себе блаженый Авраамий, яко далече сущу града приходящимъ. Тако же блаженый помянувъ епископъ Божию волею тогда, призва единого отъ своего честнаго крилоса перьваго отъ старейшихъ протопопу, именемъ Георгий, глагола к нему о блаженемъ Араамии, помянувъ, яко далече ему сущу града, скорбь ему велья, да призоветь и скоро.

Скоро же блаженный приде по повелению епископа, и вшедъ, сътвори поклонение, глаголя: «Благослови, владыко святый, раба твоего» Призва блаженаго Авраамиа епископъ, утешая, глаголаше: «Како, отче, о Господи пребываеши?» Оному же рекшу: «Ей, владыко святый, истинною молитвами твоими добре»,— и рече к нему епископъ: «Хощу дати ти благословение, аще е приимеши». Отвещавъ блаженый, глаголаше: «Честно есть благословение яже нъ и даръ». И глагола к нему епископъ: «Се благословение: поручаю ти и даю пресвятые Богородици дом: поиди, похваля Бога и славя, и моли о всехъ». Блаженый же радоваашеся и хваляше Бога, таку даровавшаго благодать рабу своему молитвами святыя Богородица. И входящу ему въ врата монастырьская, некако светъ восия ему въ сердци отъ Бога и с радостью просвещая душю его и помыслъ, яко же се всемъ поведааше. Яко же сице Иаковъ во сне виде лествицю, досязающу до небеси, и глаголаше, яко «есть Господь на семь месте»,[37] то же то и сему открываашеся, уже бо Господь искусна и яви. И събысться псаломъ Давидовъ: «Възведе человекы на главы наша, и проидохомъ сквозе огнь и воду, и изведе ны в покой».[38] Яко же бо царь по многыхъ победахъ и трудехъ на болший санъ и честь възводить своего воина, да уже и сему Господь Богъ самъ подаеть рабу своему утешение, яко трудившуся, и всех сердца обращая своею благостью, далнимъ же и ближнимъ, и просвещая всехъ душа.