Том 5 (XIII век, литература трагического века)

О побоищи новогородцемъ съ Ярославом.[66] В лето 6724. Марта 1 въ вторник поиде князь Мстислав с новгородци на зять свой на Ярослава,[67] а в четверток побегоша кь Ярославу крестопреступници[68] Володислав Завидович, Гаврила Игоревич, Юрьи Олексинич, Гаврилець Милятичь, и с женами, и съ детми. Новгородци же поидошя Серегиром,[69] и быша връху Волзе, оселъ Святославъ Ржовку;[70] городець Мстиславль с полкы въ 10000. Мстислав же с Володимеромъ съ Псковскым[71] поиде вборзе въ 500, толико бо всех вой бяше, и пригони, а они бяху побегли проч. А Ярунъ[72] бе затворился въ граде въ 100 и отбись у них, и Мстислав взя Зубцев[73] и бышя на Возузе. И прииде Володимеръ Рюрикович[74] съ смолняны.

И послаша на Торжокъ Ярославу о миру, а сами сташя на Холохне[75]. Ярослав же ответъ да: «Мира не хочю, пошли естя, поидете же, нони сту нас достанется одинъ вас». И ркошя промеж себе князи: «Ты, Ярославе, съ силою, а мы съ крестом».

Ярославли же мужи изчиниша твердь, а пути от Новаграда засекошя, и реку Тферцу. И ркошя новгородци князем: «Поидем к Торжку». И князи ркоша: «Аще поидем к Торжку, то попустошимъ Новгородскую власть».[76]

И тако поидоша къ Тфери, начашя имати села и жечи, а на Ярослава не бе вести, в Торжку ли или въ Тфери. И Ярославъ же слышав, оже емлют села, еха ис Тръжку въ Тферь, поимав с собою старейшая мужи новгородскыа, и молодых избором, а новотръжци вси. И посла сто мужь избранных в сторожу, они же выехавше за 15 верстъ от града явишась, ту бо стали бяху князи наши,[77] поставивше полкы, творяста рать велику. И посла Яруна с молодыми людьми, и наехаша на него сторожи Ярославли, и пособи Богъ Яруну, изымаша сторожов Ярославлих 33, а седмь их убишя, а ины убежаша въ Тферь, то же бысть перваа победа на них них на Благовещенье Богородици,[78] 5 неделя поста.

И бе весть у тех, что Ярославъ въ Тфери, и тако ездяху в зажитие не боящеся. И оттоле послаша Яволода, боярина Володимеря,[79] к Костянтину Всеволодичю в Ростов,[80] а Володимера Псковского съ псковичи и смолняны на рубежь послашя проводити и́. А сами с новгородци поидошя по Влъзе воююще, и пожгошу Шешу и Дубну.[81] И Володимеръ съ псковичи и съ смолняны взяшя город Коснятин[82] и пожгоша и́ и все Поволъжие. И срете и́ воевода Еремий от князя Констянтина из Ростова, наших князей, и рече: «Констянтин ся вамь кланяет: яз рад, слышав вашь приездъ; се вам от мене в помочь 500 муж рати, да пришлите ко мне съ всеми речми Всеволода, шюрина моего».[83]

И ту и отрядиста Всеволода с дружиною, и послашя къ Констянтину, а сами поидоша по Волзе вниз, и ту пометашя возы, а на кони полезошя и поедоша к Переяславлю воюючи.[84] И бышя на Городищи на реце Сарре[85] у Святей Марины априля 9 в Велик день, и ту приеха Констянтин князь с ростовци. И възрадовашася видевшеся, и крестъ целовашя, и отрядиша Володимера Псковского с дружиною в Ростов, а сами, пришедше с полки, сташя противу Переяславлю в Фомину неделю. И ехавше ис плъков под град, яшя человека, и испыташя, оже Ярослава в граде нетъ: пошол бяше к брату Юрьеви с полки, скопив волость свою всю с новгородци и с новоторъжци.

Юрьево княжение Всеволодича в Суждале.[86] А Юрьи съ Святославомъ и с Володимеромъ[87] вышол бяше из Володимеря съ всею братиею. И бяху полци силни велми: муромци, и бродници,[88] и городчане,[89] и вся сила Суждалской земли; бяше бо погнано ис поселий и до пешца. Оле страшно чюдо и дивно, братье! Поидошя сынове на отцы, а отцы на дети, брат на брата, рабы на господу, а господа на рабы. И ста Ярослав и Юрьи з братьею на реце Кзе.[90] А Мстислав же и Володимеръ с новгородци постависта свои полкы близ Юрьева, и ту стоаста. А Констянтин дале стоаше съ своими полкы на реце Липице.[91] И узреша плъкы стояща Ярославли и Юрьевы, и послаша Лариона соцкого къ Юрью: «Кляняем ти ся, нету намъ с тобою обиды; обида нам съ Ярославом». Отвецав же Юрьи: «Одинъ есмы брат съ Ярославом».

И посласта къ Ярославу, ркуще: «Пусти мужи нвогородци и новотръжци, и что зашол еси волости новгородскыа, Волок вспяти. А миръ с нами възми, а крестъ к намъ целуй, а крови не проливай».

Отвеща же Ярослав: «Мира не хочу, а мужи у мене, но далече есте шли, а вышли есте как рыба на сухо». И сказа Ларьян ту речь князем и новгородцемъ.

И пакы посласта къ обема князема с последнею речью: «Мы пришли есме, брате Юрьи и Ярославе, не на пролитье крови, не дай Богъ створить того! Управимся, мы бо есмы племенници собе, а дадим старейшинство Констянтину, а посадите его в Володимере, а вам земля Суждалскаа вся».

Юрьи же рече: «Рци брату Мстиславу и Володимеру: пришли есте, да куды хотите отъити? А брату Констинтину молвимъ: перемогай нас, тобе вся земля».