Том 7 (Вторая половина XV века, литература эпохи исторических размышлений)

И срете его Филиппъ митрополитъ со кресты близ церкве, толико с мосту з болшего сшед каменаго да клядязя площаднаго со всемъ освященым соборомъ. А народ московстий и многое их множество далече за градом стречали его: ини за 7 верстъ пеши, а инии ближе, малии и велици, славнии, неславнии, безчисленое их множество. А сынъ его, князь великий Иванъ, и брат его, князь Андрей Меньший, и князи его, и дети боярские, и бояре, и гости, и купци, и лучшие люди сретоша его накануне Семеня дни, идеже бе ему ночевати. Велья же бысть радость тогода въ граде Москве.

О ноугородцех, како истопоша на озере Илмени. Того же лета месяца сентебря 2 день поидоша из Новагорода из осады многое множество людей[489] и з женами, и з детми по езеру в великих учанехъ,[490] кииждо их по своим местомъ. Глаголют бо, яко было суд тех великих 100 и 80, а по 50 человекъ в судне и поболе. Яко бывшимъ им в пучине озера того, и дохнувшу на них ветру велию и напрасну, и потопи все суды оны, ни едино же от нихъ не избысть, и вся люди, тавар их истопе.

Тое же осени к королю пришелъ изо Орды Икирей со царевым послом,[491] а король в ту пору заратился со иным королем, со угорским.[492]

Тое же осени месяца того же сентебря 10 прииде из Венеции Онтон Фрязинъ,[493] а с ним пришел посол к великому князю из Венецеи от дюки венецейского Ениколы Трона Иван именем, Тривизан прозвище,[494] а посланъ к великому князю от того дюки и от всех земль сущих под нимъ бити челом, чтобы пожаловал князь великий, велел того Тривизана приводити до царя Ахмута Болшие Орды, а послал к нему со многими поминки и з челобитьем, чтобы пожаловал, шел имъ на помочь на турского салтана къ Царюграду. Тот же Тривизан пришед на Москву, и первое прииде къ Ивану Фрязину, к денежнику московскому, понеже бо той Иван Фрязин Волпъ[495] тамошние земли рожение и знаем тамо, и зказа ему вся та, о чемъ пришел на Москву, а у великого князя еще не былъ. Фрязин же, нашъ денежникъ, не велел тому Тривизану о томъ бити челом великому князю, глаголя ему: «О сем ти ему бити челом, великому князю, да поминки великие подавати? А могу то яз зделати опроч великого князя и до царя допровожю тя». А к великому князю пришел Фрязин с темъ Тривизаномъ, назвалъ его князьком венецийскомъ, а к сабе племенником, а рекши, пришел до него своим делом да и гостьбою, да то у великого князя утаили.

А Онтон тогды от папы от Павла привезлъ листы к великому князю таковы, что послом великого князя волно ходити до Рима по всей земли Латинской и Немецкой, и Фрязкой, и по всем тем землям, котории земли под его папежство присагают, даже и до скончания века; а по царевну бы по Софию, Аморейскаго царя по Фомину дщерь,[496] посылал.

Тоя же осени Филипъ митрополит повеле готовити камение здати церковь святыя Богородица.[497]

О пермьском епископе Филофее. Тое же осени месяца ноября въ 8 поставленъ бысть Перми епископъ, Филофей именемъ,[498] митрополитом Филиппомъ.

О ноугородцкомъ владыце. Того же месяца въ 30 прииде на Москву ставитися на архиепископью Новагорода Великого нареченый их Феофилъ, а с ним посадници пришли Александръ Сапсонович да Лука Феодорович.[499] Тое же осени декабря въ 8 поставленъ Рязани епископъ Феодосий,[500] архимандрит чюдовский, митрополитом Филипомъ, а были на поставлении его архиепископъ ростовский Васьян, суздалский епископъ Евфимей, коломенский Горонтей, сарский Прохор, пермский Филофей.

О новгородцком архиепископе Феофиле, како поставлен бысть. Ве 15 того же месяца, в неделю, поставлен бысть Новугороду на архиепископью нареченной их Феофил преосвященым митрополитом Филипом всея Русии, а были на поставлении его вси прежереченнии епископи рустии и архимандрити, и протопопи, игумени честни и весь освященый соборъ славнаго града Москвы. По поставлении же своем билъ челом великому князю от себе и от всего Великого Новагорода с посадники и с тысячьскими, и со всеми с теми, котории пришли с ним, о плененых, о Казимире и о прочих товарищех его. Князь же велики приятъ челобитие их и тех всех отпусти с честию, а было их на Москве 30. Самого же архиепископа отпусти того же месяця въ 23.[501] Тоя же зимы повезоша камень на Москву на создание церкви святыя Богородици.

ПЕРЕВОД