Том 7 (Вторая половина XV века, литература эпохи исторических размышлений)

О нареченем Феофиле и о новогородцех, како приидоша к великому князю бити челом. А в той же день на усть Шолоны в судех озером Ильменем нареченный Феофилъ с посадники и с тысяцскими и съ житьими людьми со всех конецъ, и начяшя преже бити челом княземъ и бояромъ, и воеводам великого князя, чтобы печаловалися братьи великого князя, а они бы печаловалися брату своему великому князю, да и сами бы бояре печаловалися. Бояре же пришед с ними, бишя челом братьи великого князя, братья же великого князя, князь Юрьи, князь Андрей, князь Борис и князь Михайло Ондреевич съ сыномъ и бояре их биша за них челомъ великому князю. Князь же велики их деля пожаловал, велел тому нареченному черньцю Феофилу, и посадником, и тысячким, и прочим быти к себе на очи. Они же вшед к великому князю и начяша бити челом о своем преступлении и что руку противу его подняли, чтобы пожаловал осподарь, смиловался над ними, възвратил бы гневъ свой не их ради челомъ битьа, но свое бо благосердие показал и согрешающимъ, не велел бы боле того казнити, и грабити, и жещи, и пленити. Милосердовав же, князь великий показа к ним милость свою и прият челобитье их, утоли гневъ свой, и в той часъ повеле престати жечи и пленити, плен, которой туто есть, отпустити, а которай отслан и отведенъ, и тех отдати.

А добиша челомъ великому князю 16 тысяч сребра новгородцкых рублевъ[479] опроче и братьи великого князя, и князей, и прочихъ: бояр, и воевод, и прочих всех, котори не печаловалися о них; а земля их вся пленена и пожжена, и до моря,[480] не токмо бе те, кои были с великим князем и з братьею его, но из всех земель их пешою ратью ходил на них, а Псковская вся земля от себе их же воевали; не бывала на них такова война, как земля их стала.

О псковичех. А что послал Севастьяна Кушелева князь великий против псковичь, и тот сретил их за Порховымъ,[481] а они идут от своего городка от Дубскова,[482] взялъ из него 6 пушокъ, к Порхову. Савастьянъ же сказа имъ великого князя здравие да и победу на новгородци, а имъ велелъ князь великий борзее поити к Новугороду. Псковичи же ис-под Порхова отпустиша Савастьяна к великому князю, а с ним послы своя, Козму Сысоева[483] да Стефана Афонасьева Винкова,[484] а сами поидоша со всею силою своею к Новугороду. И не дошед Новагорода за 20 верстъ, стали у Спаса на Милцей, а Совостьянъ с теми послы с псковскими, с Кузмою да Стефаном, приидоша к великому князю на усть Шолоны иуля въ 30 на заговение на Оспожине, а князь Василей Феодорович Шуйской, воевода пьсковский, с посадники и прочими и с лутчими людми после пословъ своих приидоша к великому князю туто же на усть Шолоны.

И после тех прихода стоял туто на единомъ месте князь великий 11 день, управляя новгородецъ, и пожаловал их, дасть имъ миръ на своей воле, как сами восхоте,[485] а псковичемъ доскончание взял с новогородци все выше перваго, как псковичи хотели. По том же князь великий дастъ новгородцемъ мир, и любовъ, и милосердие, и почтив нареченаго их Феофила и посадниковъ их, и тысяцкых, и прочих, котори с нимъ ходили, и отпусти их во свой им град. А за ними послалъ в Новъгород боярина своего Феодора Давыдовича привести Великий Новъгород весь к целованию от мала даже и до велика и сребро на них имати; они же шед в Новъгород, сотвориша, якоже повелено бысть имъ.

А князь великий Иван Васильевичь володимерский и новгородцкий, всея Руси самодержецъ, возвратися оттуду к Москве с победою великою месяца августа 13; тако же и вся братья его, и князи, и воеводы, и вся воя их и со многою корыстью.

А того же лета князь великий, ида к Новугороду, послал в Поле Никиту Беклемишева искати царевича Муртазы, Мостофина сына,[486] звати его к себе служити. Никита же наеде его в Поле и перезва его к великому князю, и прииде с ним къ сыну великого князя на Москву наперед прихода великого князя из Новагорода.

А того же лета вятчане, шед суды Волгою на низъ, взяша Сарай[487] и много товара взяша и пленъ много поимаша. Слышавше же си татари Болшие Орды, понеже близъ ту начевали за единъ день, и тако многое их множество поидоша переимати их, и поимавше суды, и всю Волгу заступиша суды своими, хотяще их перебити. Они же единако пробишася сквозе их и удоша со всем. А под Казанью такоже хотеша приняти их, и тамо поидоша мимо тех со всем в землю свою.

О великого князя приходе, как прииде из Новагорода на Москву. Лета 6980 месяца сентебря въ 1 день, в начале индикта, еже есть новое лето,[488] на память преподобнаго Семиона Столпника прииде князь великий в отчину свою, въ славный град Москву, победивъ супостаты своя, казни противящихся ему, и не хотящихъ повинутися привед во всю волю свою, и многу корысть и славу приобрете.