Том 7 (Вторая половина XV века, литература эпохи исторических размышлений)

И исшед оттуду, приходить в монастырь архааггела Михаила честнаго его чюда, и вшед въ церковь его, молебная совершает, призывая на помощь того воеводу небесных сил съ многим умилением. И паки входит в той же церкви въ приделъ Благовещеньа Богородици, идеже бяху целбоносный гробъ, в немь же лежаху чюдотворныя мощи, иже въ святых отца нашего Алексеа митрополита, рускаго чюдотворца, и тамо такоже помолися съ многими слезами.

И потом паки приходить въ церковъ архистратига Михаила, честнаго собора его и прочих бесплотных, и такоже моления совершает, прося помощи и заступленья от них. Приходит же паки в той же церкви къ гробомъ прародитель своих, лежащих ту великих князей володимерских и новогородцих и всея Руси, от великаго князя Ивана Даниловича[446] и до отца его, великаго князя Василья, моля их и глаголя: «Аще духом далече есте отсюду, но молитвою помозите ми на отступающих православья державы вашея».

И оттоле исшед, обходит вся съборныя церкви и манастыря, повсюду молебная съвершаа и милостыня доволно подавая. По сем же паки приходит и къ отцю своему Филиппу, митрополиту всея Руси, прося благословения и прощенья. Святитель же огражает его крестом, и молитвою въоружает его, и благославляет его на противныя и вся воя его, якоже Самоил Давыда на Гольяда.[447]

Князь же велики Иван Васильевич, приим благословение от отца своего митрополита Филиппа и от всех епископъ земля своей и от всех священник, исходит с Мосъквы того же месяца иуния въ 20, в четверток, на память святого отца Мефодья епископа паторомска, а с ним царевич Данияръ и прочии вои великаго князя, князи его мнози и вси воеводы, съ многою силою въоружився на противныя, якоже преже прадед его благоверный велики князь Дмитрей Иванович на безбожнаго Мамая и на богомерзкое тое воиньство татарьское, такоже и сей благоверный и велики князь Иоан на сих отступник.

Аще бо християне нарицахуся, а дела их бяху горее неверных, всегда бо изменяху крестное целованье, преступающе, но и горее того начяша беситися, якоже преже написах: пятсот бо летъ и 4 въ крещении быша за великими князи рускими православными, ныне же на последнее время, за 20 лет до скончания седмыя тысящи,[448] въсхотеша отступити за латиньского короля, и архиепископа своего въсхотеша поставити от его митрополита Григорьа латынина; а князю великому много о сем посылающу к нимъ остатися от таковаго начинания. Такоже и митрополит Филип посылаше к ним, наказающе их, яко отець чада своя, по Господню словеси, еже рече въ Еуагельн: «Аще съгрешит к тебе брат твой, шед обличи его пред собою и тем единемъ; и аще послушает тебя, приобрелъ еси брата твоего; аще ли тебе не послушаетъ, поими с собою два или три, предусты бо двоих или трех сведетель станет всяк глаголъ. Аще ли и тех не послушает, повежь церкви; аще ли о церкви не радити почнет, буди ти, якоже иноязычникъ и мытарь».[449] Си же паки людие новогородстии о всем о том не внимаху, но свое зломыслие творяху; то не горее ли си иноверныхъ? Невернии бо изначала не знаху Бога, ни научишася ни от кого же православию, перваго своего обычая идолопоклония держахся, а си многа лета бывши въ християнства и на конець нача отступати к латынству. И тако поиде на них князь великий не яко на христиан, но яко на иноязычникъ и на отступникъ православья.[450]

Поиде же князь великий на Рождество Предотече на Волокъ. Такоже и братия великого князя поидоша кийждо их от себе: князь Юрья Васильевичь из своея отчины, а князь Андрей Васильевич из своея отчины, а князь Борис Васильевич из своея отчины, князь Михайло Андреевич с сыном Васильем[451] из своея вотчины. А на Москве князь великий оставил сына своего, великого князя Ивана, да брата его князя Андрея Меньшего.[452]

На Петровъ день[453] прииде князь великий в Торжек:[454] приидоша же к нему в Торжекъ воеводы великого князя тферьскаго, князь Юрья Андреевичь Дорогобужский[455] да Иванъ Микитинъ Жито,[456] со многими людми на помочь на новогородецъ же; а з Пскова прииде к великому князю в Торжекъ же посол Василей да Богдан съ Якушкою с Шачобалцовым, а присланы с темъ, что целование к Новугороду сложили, сами готови все. Князь же великий с Торжку посла к нимъ Богдана, а с нимъ Козму Коробьина,[457] чтоб не мочтая пошли к Новугороду, а Василья от себе не отпустил; и ис Торжку поиде князь великий.