Том 9 (Конец XIV - первая половина XVI века, подъем общественного значения литературы)

А звезды зодейные 12 и планит 7, не чювствены, ни животны сут, но точию невещественаго огня существо. В первый день Богом сътворен есть, иже рече Богь: «Да будет свет»,[512] — и ничтоже ино свет, токмо огнь. И егда въсхоте разлучити свет от тмы, тогда повеле спрятание тому огню быти, и бысть тма. И разлучи Богъ межу светом и межу тмою, и нарече Богъ свет день, а тму нарече нощь,[513] и ничтоже ино нощъ, токмо света отъятие. Въ вторый день твердь, въ третий день сушу, моря, садовиа, траву, семена, пол водъ возводит на твердь. Того ради, еже хотяше сътворити светилникы, в четвертый же день от того огня, иже свет нарече, сътвори две светиле велице: светило великое въ освещение дни, еже есть солнце, светило меншее въ просвещение нощи, еже есть луна, таже звезды, яко мудрый златарь ово на сосуды, ово же на златици разсыпа.

И нарече 12 звездъ, иже глаголются от нас зодеи, иже суть пути солнцу и луне. Солнце же шествие имея воединои зодеи днии 30 и часовъ 5 и пакы в другую зодею исходит, и тако в двунадесяти зодеях семо и овамо преходя, сътворяет годъ. Луну же полну сътвори, яко 15 дний, аще бо луне единаго дни сътворене, то пакость бы велика была светилником между собою, частаа отемнениа. Луна же обходит 12 зодеи в двадесят и девять дней и в пол дни и пол часа и пятую часть часа.

А о седми планитах и о двунадесят зодеях, и о прочих звездах, и о злых часех, и о нарожении человечьстем въ которую звезду, или часъ золъ или добръ, и получаа с частком, и богатству и нищете, и в нарожении добродетелем и злобам, и долголетству жития, и скращениа смертию, — сиа вся кощуны суть и басни. Первие от халдей[514] сие написася, иже к суете ума своего столпъ зиждуще и на высоте бывше, и о звездах съблазнишася. Богъ же, видя безумие ихъ съвет их разсыпа и дело раздруши, и писание их отверже. От них же еллини писание приаша, и тыа планиты и прочаа звезды богы нарекоша, и отступиша от сътворшаго вся и твари поклонишася; о них же пророкъ Давидъ глаголаше: «Рече безумен в сердци своем: несть Бога. Растлеша и омрачишася в начинаниих своих».[515] По еллинехъ же еретицы прияша а насеяша горкыа плевелы по среде пшеницы в православной христианской вере, на прелщение малоумных человекъ, верующе в злыа дни и часы, да о сем и покаания не приемлют, мнящеся, яко истина сутъ, и в день судный страшен ответ приимутъ и съ еретикы осужени будут, пременивше свет на тму и истину на лжу. Аще бы злыа дни и часы сътворил Богъ, почто грешных мучити ему? Богъ имат винен быти, яко злая человеки народил.

А сие, честный человече, разумей, яко от царя царевич родится, а от князя князь, и аще и не достижет малым чим отчаа славы и чести, но земледелец не бывает, ни за земледелцев царие дщерей не дают, ни у них за своа сынове дщерей взимают, но все то состоится по неведомым судбам вся строящаго бога.

А о звездном течении и о солнци, и о луне да весть твоя честность, яко не самы тыа звезды двизаемы суть, ниже чювствены или животны и зрят ни на чтоже (но огнь невеществен ничтоже весть, ниже знает), но преносимы суть от аггельских невидимых силъ. Самовидец сему богоизбранный съсуд апостолъ Павел, иже третины тверди не дошед,[516] посреде самех звездъ быв, и тамо виде самыа тыа аггельскиа силы, како непрестанно служение имеют человека ради: ови солнце носят, друзии луну, иныя звезды, овы въздуха правят ветры, облакы, громы, от последних земля воды возносят облаком, и лице земли напаяют на ращение плодом, на весну и жатву аггели, на есен и зиму. Сего ради показа Господь апостолу, како непрестанно служение имут аггели человека ради, да научит его непрестанно тещи на проповедь спасения ради человечскаго и не лениву быти; он же видев тамо неизреченнаа видениа, въ своих посланиих глаголет: «Не вси ли суть служебнии дуси, на службу посылаеми за хотящих наследовати спасение?»[517] — и пакы глаголет, яко: «Сама тварь свободитца от работы тлениа въ свободу славы чад Божиих».[518] Видиши ли, любимиче, како тварию зовет аггелы, чада же Божиа — человекы, свобожение аггелское глаголет, еже от службы своеа престанут в последнии день?