Том 9 (Конец XIV - первая половина XVI века, подъем общественного значения литературы)

Наша же христианскаа тайна сице съдержит о священнем причащении. Приступиша ученици ко Иисусу, глаголюще: «Господи, где хощеши уготоваем ти ясти пасху?» Он же рече им: «Се входящема вама во град, срящет вы человек, в скудели воду нося; последуйте ему и дому владыце рцете: “Учитель глаголетъ, у тебе сътворю пасху со ученикы моими”».[530] Дому есть владыка отецъ Ивана Богослова Зеведей, сему повеле Иисус надвое сътворити: едину по обычаю законному, еже опреснокъ, другую же тайную, иже хлеб съвершен квасную. Сего ради тайная вечеря глаголется,[531] понеже в жидох от 11 до 14[532] не обретается квасной хлеб в домех. Да первее законную пасху ядоша по обычаю, опреснок и агнец з горчицею, стояще опоясани и жезлы подпирающеся, клобукы на главах их. По ядении же седъ, учаше их, еже не старийшенствовати, таже о предателстве вносит слово, и, по семъ волиа воду во умывалницу, и нача нозе умывати учеником, образ дасть им святого крещениа. По сих же пакы возлеже и повели представити хлеб и вино точию, начат жалостнаа словеса простирати, възвед убо божественаа свои очи на небо и рече: «Отче, прииде час, прослави сына своего, да и сынъ твой прославит тя, яко дал еси ему власть всякой плоти, да все, еже дал ми еси, и аз дам им живот вечный. Иже есть живот вечный, да знают тебе единаго истиннаго Бога, и егоже посла Иисуса Христа; и аз прославих тебе на земли и дело съвръших, и ныне прослави мя, Отче, славою, иже имех у тебе преже сложениа мира».[533] И паки рече ко учеником: «Аз есмь виноград, вы же рождье, иже пребудет въ мне и аз в нем».[534] И паки возвед очи свои и рече: «Отче, святи их во имя твое, зане аз свящюся сам, да будут и сии освящени воистинну, и не о сих молю токмо, но и о верующих словесем их в мя; да вси бо едино будут, яко же, Отче, аз в тебе, и ты въ мне, да и ти въ нас будут».[535] Разумей же обое зде, еже молится о онех, освятив их во святых тайнах, да научит свящати архиереа и священики у святыа трапезы; идеже чин действа, ту и слуга поставляти подобает священнодейству. И ту, абие приим предложенный хлеб на святых своих пречистых руках и воздвиг горе, показуя Богу Отцу, благодарив, преломив, дасть святым своим учеником и апостолом, рек: «Приимете и ядите, се есть тело мое, еже за вы ломимое и за многы во оставление грехов».[536] По ядении же приим чашу от плода лознаго иже есть вино, и растворив с теплою водою, и сию дасть учеником глаголя: «Пиите от неа вси, се есть кровь моа Новаго Завета, еже за вы изливаема и за многы во оставление грехов».[537] Обаче учеником дааше, тоже и сам ядяше и пиаше с ними. По сих же паки глаголеть: «Желанием въжделех ясти сию пасху с вами, прежде даже не прииму мук; отселе уже не имам пити от плода винограда, но ново испию с вами въ царствии Отца моего»,[538] — и, по сем, «въспевше, изыдоша в гору Елеонскую».[539]

Видиши ли, христолюбче, какова есть священьства тайна и божественаго причастия начало, еже убо сам их освяти и научи священиа действовати? Зри, любимиче, якоже испи вино, с водою растворив, такоже и на кресте от своих божественых ребръ два источника, кровь и воду, источи. Да и сие внемли, господа ради, како в тридесят лет възраста своего по всяко лето яде Спасъ законную пасху, а ни единою не рече: «Желанием вжелах ясти пасху сию», но токмо о сей новеи благодатнеи вечери тайней, еже устрои смотрение нашему спасению.