Том 9 (Конец XIV - первая половина XVI века, подъем общественного значения литературы)

О царствах же и о странах пременение — не от звездъ сие приходит, но от все дающаго Бога; о сем пророкъ Исаия глаголет: «Аще послушаете мене — блага земли снесте, аще ли не послушаете — оружие вы поястъ! — уста бо господня глаголаша сиа».[519] И пакы въпросиша апостоли: «Господи, аще в лето се устраяеши царство Израилево?» Иисус же рече: «Несть ваше разумети времен и лет, яже Отецъ положи своею областию».[520] Да внемли, Господа ради, в которую звезду стали христианскаа царства, еже ныне вси попрани от неверных, якоже пророкъ глаголет: «Кто дастъ на расхыщение Израиля — не Богъ ли, емуже съгрешиша?»[521] Девятдесят лет, како греческое царство разорися[522] и не созижется: сия вся случися грехъ ради наших, понеже они предаша православную гречскую веру в латынство. И не дивися, избранниче Божий, яко латыни глаголют: наше царство ромейское недвижимо пребываетъ, аще быхом не праве веровали, не бы Господь снабдел нас. Не подобает нам внимати прелестем их, воистину суть еретици, своею волею отпадше от православныа христианскиа веры, паче же опресночнаго ради служениа. Беша с нами в соединении семсотъ лет и 70, а егда отпадоша правыа веры семсот и 35 лет,[523] во аполинариеву ересь впадше, прелщени Карулом царем и папою Формосом. Глаголют о опресноце, яко за чистоту и безстрастие, но сие лжут, съкрывающе внутрь себе диавола. Аполинарий[524] же своимъ учением повеле опресночнаа служити за сию вину, глаголетъ бо сице, яко не прият плоти человечскиа от пречистыа девы господь наш Иисус Христос, но з готовою небесною плотию, яко трубою, девичьскою утробою прошед, ниже душа человечьскиа приат, но вместо душа Духъ святый в нем пребывает, до тем лстят незлобивых душа и неутверженых. Увы горкиа прелести и отпадения от Бога жива! Аще плоти человечскиа не приат Спасъ, то и падшаго Адама и всех от него рожденных человекъ плоть не обожися, и, аще ли душа человечскиа не приал Господь, то и ныне душа человечскиа не изведены от адскых.

Да хто не содрогнется, ниже въсплачется о таковых прелестеи и отпадения, гръдостию буйства своего еретичьскым учением последоваша и богоубийственеи чете жидом, яко же и при распятии Господни обещници беша с ними, о них же еуггелист глаголетъ: «Воини же гемонови ругающеся ему, прегыбающе колени свои и глаголюще: “Радуйся, царю июдейскыи!”».[525] Воини гемонови — Пилатови слугы, понеже Пилат от латын бяше, от Понта[526] града Римскиа области, тако и ныне в своем молении не прекланяют свою главу, токмо колени мало надгыбают латыни. О них же Давидъ издалеча духом святым прозрев, яко от лица Иисусова рече: «В поношение безумному дал мя еси».[527] Воистину людие буи, а не мудри, аще убо великаго Рима стены и столпове, и трекровныа полаты не пленены, но душа их от диавола пленены быша опреснок ради. Аще убо Агарины внуци[528] греческое царство приаша, но веры не повредиша, ниже насилствуют греком от веры отступати, инако же ромейское царство неразрушимо, яко Господь в римскую власть написася.[529]